"Evinizdə yatın ki, əşyalarınız oğurlanmasın" - Ağdaş Rayon Polis idarəsinin əməkdaşı

19:28 / 23.04.2018

Strategiya.az bildirir ki, Xalqinfo.az xəbər portalının redaksiyasına Ağdaş rayon sakini Gülşən Kərimova tərəfindən evlərinin qarət olunması ilə bağlı şikayət daxil olub.

Şikayətçi bildirir ki, "bizim Ağdaş şəhər, M. Əsədov küçəsi 52, ünvanında yerləşən üç otaqlı evimiz 2016-cı il tarixdən dəfələrlə qarət olunub və mən bununla bağlı Ağdaş Rayon Polis idarəsinə dəfələrlə şikayət etsəm də heç bir nəticəsi olmamışdır. Hətta mən oğruların ad və soyadını belə polislərə bildirmişdim. Lakin sözügedən idarədən hər dəfə bizə bildirirdilər ki, "sizin şifahi ifadənizlə biz heç kimi həbs edə bilmərik"".

Şikayətçinin sözlərinə görə, bunu görən oğrular daha da arxayın düşərək təxminən 2018-ci il yanvar ayının əvvəlində yenə də eyni adamlar evə (həmin vaxt onlar evdə olmayıblar) girərək evdə olan məişət əşyalarımızı demək olar ki, nə mümkündürsə aparıblar. "Mən oğurluq hadisəsi ilə əlaqədar Ağdaş Rayon Polis idarəsinə müraciət etdim və oğruların tutulmasını tələb etdikdə həmin idarənin əməkdaşı Azad Məmmədov “mən sizə oğru, əşya tapanam?” deyə mənə bildirdi. Bu hadisədən bir həftə sonra oğrular bizim evin dam örtüyünü belə söküb aparıblar. Mən növbəti dəfə Ağdaş Rayon Polis idarəsinə şikayət ərizəsi ilə müraciət etdim və yenə də müstəntiq Azad Məmmədov bildirdi ki, “mən sizin evinizdə yatmalıyam? Evinizdə yatın ki, əşyalarınızı və dam örtüyünüzü aparmasınlar.” Hətta mən ona bildirəndə ki, oğruların barmaq izləri də sübut edir ki, onlar bir neçə nəfər olublar, cavabında isə yenə də Azad Məmmədov bildirdi ki; “İndi biz sizin üçün bütün Ağdaş əhalisinin bir-bir barmaq izlərini axtarmalıyıq? Sən sübut elə ki, əlavə dediyin iki nəfər də oğurluqda iştirak ediblər, ondan sonra mən onları həbs edəcəm”. Bizim təkidli şikayətlərimizdən sonra oğrulardan biri olan Səbuhi adlı şəxs tutuldu. Amma bizim və polislərin də dəqiq bildiyi digər oğru İbrahim və adını bilmədiyim başqa bir oğrunu isə Ağdaş Rayon Polis əməkdaşları tutmaq istəmirlər. Oğrulardan biri olan İbrahim adlı şəxs Ağdaş Rayon Polis nəfəri olan Samit adlı şəxsin qohumu olduğu üçün onu Ağdaş Rayon Polis idarəsinin əməkdaşları himayə edirlər. Evdən aparılan əşyaların çəkisi və həcmi sözügedən əşyaların bir nəfər tərəfindən aparılmasının mümkün olmadığını göstərir.

Ağdaş Rayon Polis idarəsinin əməkdaşları özlərini elə aparırlar ki, hər bir vətəndaş evdən gedərkən evinə ştatnı bir qarovulçu və ya gözətçi qoymalıdır. Azad Məmmədovun deməsindən belə çıxır ki, biz özümüz oğruları müəyyən edib tutmalıyıq, bundan sonra Polislər bu işlə məşğul olmalıdır. Bəs onda uca dövlətimizdən yüksək məvacib alan Polis əməkdaşları nə üçündürlər? Vətəndaşların canını və əmlakını qorumaq birbaşa polislərin qanuni vəzifəsidir. Şikayətimi nəzərə alaraq Sizdən artıq dərəcədə xahiş edirəm.

Bizim Ağdaş şəhəri, M.Əsədov küçəsi 52 ünvanında yerləşən evimizi qarət edən İbrahim və adını bilmədiyimiz üçüncü şəxsin tutulmasına, bizə dəymiş zərərin ödənilməsinə və bu işdə məsuliyyətsizlik etmiş Ağdaş Rayon Polis əməkdaşlarının cəzalandrılmasına yardım edəsiniz".

"Evinizdə yatın ki, əşyalarınız oğurlanmasın" - Ağdaş Rayon Polis idarəsinin əməkdaşı

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə