Azərbaycanın pravoslav xristianları Milad bayramını qeyd edirlər

Pravoslav xristianlar yanvarın 6-dan 7-nə keçən gecə İsa Peyğəmbərin mübarək mövludunu - Milad bayramını qeyd edirlər.

Böyük bayram Müqəddəs gecədən başlayır. Həmin gün pravoslavlar üçün 40 günlük pəhrizin sonuncu günü və Milad bayramına hazırlıq dövrüdür. Günəş batandan sonra bütün ailə masa arxasında toplaşır. Süfrəyə İsa peyğəmbərin həvarilərinin sayına uyğun olaraq 12 pəhriz yeməyi qoyulur və bu yeməklərin hər birindən mütləq dadmaq lazımdır. Masada canlı alov - şam yanır. Müqəddəs gecənin ən başlıca yeməyi kutyadır. Adətən onu buğdadan hazırlayırlar. Amma üyüdülməmiş başqa yarmadan da istifadə etmək olar. Taxıl dənləri vahid bəşəriyyətin rəmzidir. Kutyada birləşdirici vasitə kimi bal və ya siropdan istifadə olunur. Bu şam yeməyi ilə Milad pəhrizi başa çatır. Yanvarın 7-də bütün yemək məhdudiyyətləri aradan qaldırılır və əsl bayram ziyafəti təşkil edilir.

Deyilənə görə, Milad bayramında evdən darçın və vanil ətri gəlməlidir. Yəni məxsusi yemək olmadan bu bayramı təsəvvür etmək mümkün deyil. Qədim zamanlarda daha bir ənənə olub: bayram günlərində yalnız təzə libaslar geyinirdilər.

Qədim adətə görə, Milad gecəsində ürəkdə ən ümdə arzunu tutmaq lazımdır, onda bu arzu mütləq həyata keçir. İnanclara görə, məhz bu gecədə su, təbiətin özü və hava sanki sehrlə dolaraq, bütün arzuların həyata keçməsinə kömək edir. Milad ənənələrinə görə, bayram günlərində insanlar vaxtlarını şən keçirməli, qəm-qüssədən uzaq olmalı, həyatdan zövq almalıdırlar.

Azərbaycanın pravoslav xristian icması da Milad bayramını təntənə ilə qeyd edir. Təsadüfi deyil ki, Qafqazda ilk xristian məbədləri məhz ölkəmizin ərazisində yaranıb. Müxtəlif dinlərin nümayəndələri əsrlər boyu torpağımızda dinc yanaşı yaşayır, öz adət-ənənələrini sərbəst şəkildə icra edirlər. Azərbaycanda heç vaxt milli və irqi zəmində ayrı-seçkilik, dini dözümsüzlük olmayıb. Digər konfessiyaların nümayəndələri kimi, xristianlar da cəmiyyətimizin tamhüquqlu üzvüdürlər. Ölkədə bir neçə pravoslav kilsəsi fəaliyyət göstərir.

Azərbaycan Prezidenti İlham Əliyev hər il olduğu kimi, bu il də pravoslav xristian icmasına Milad bayramı münasibətilə təbrik ünvanlayıb. Təbrikdə deyilir: “Azərbaycanda tarixən sivilizasiyalararası və mədəniyyətlərarası dialoq mühitinin mövcudluğu, etnik-mədəni müxtəlifliyin günümüzədək qorunub saxlanılması çoxmillətli və çoxkonfessiyalı cəmiyyətimizdə ümummilli mənəvi-ictimai dəyərlərin, zəngin multikulturalizm və dözümlülük ənənələrinin formalaşmasında, vətəndaş həmrəyliyinin bərqərar edilməsində müstəsna rol oynamışdır. Biz bu tarixi nailiyyəti milli dövlətçiliyimizin mühüm uğuru kimi qiymətləndirir, dilindən, dinindən, etnik mənsubiyyətindən asılı olmayaraq, bütün ölkə vətəndaşlarının hüquq və azadlıqlarının, eyni zamanda, vicdan və dini etiqad azadlığının təminatını dövlət siyasətinin prioritet istiqamətlərindən biri hesab edirik.

Məmnuniyyət hissi ilə qeyd etmək istəyirəm ki, ölkəmizin bütün milli azlıqları kimi, pravoslav xristian icması da millətlərarası və dinlərarası münasibətlərə öz layiqli töhfələrini verməklə, Azərbaycanda gedən böyük inkişaf prosesində və vətəndaş cəmiyyəti quruculuğunda yaxından iştirak edir.

Əziz dostlar!

Milad bayramı yeniliyin, əmin-amanlığın, insanlar arasında mərhəmət və şəfqət duyğularının rəmzi kimi hər il Azərbaycanda təntənə ilə qeyd edilir. Bu nurlu bayram münasibətilə bir daha hamınıza səmimi təbriklərimi yetirir, ailələrinizə xoşbəxtlik, süfrələrinizə bol ruzi-bərəkət arzulayıram”.

Yenilənmə, əmin-amanlıq, şəfqət və mərhəmət rəmzi olan bu bayram ilə əlaqədar yanvarın 6-dan 7-nə keçən gecə Azərbaycanın bütün pravoslav kilsələrində təntənəli ibadət mərasimləri keçirilib.

Rus Pravoslav Kilsəsinin Bakı və Azərbaycan Yeparxiyasının arxiyepiskopu Aleksandr Ata müsahibəsində deyib: “2017-ci il ölkəmiz üçün uğurlu il olub. Həmin il Azərbaycanda “İslam Həmrəyliyi İli” idi. Ölkəmizdə bir çox tədbirlər, beynəlxalq konfrans keçirilib. Din xadimləri xaricə tez-tez səfərlər edib, multikulturalizm, dinlərarası əməkdaşlıq sahəsində təcrübələrini bölüşüblər. Arzu edirəm ki, 2018-ci il də firavan, uğurlu il olsun. Xristian məzhəbinin təsisçisi İsa Məsih yer üzündə doğulub, insanlar arasında yaşayıb. İnsanlar onun dünyaya gəlişini minnətdarlıqla iki min ildir qeyd edirlər. Bu, sevinc, barışıq bayramıdır. Betlehem çobanları İsa Məsihin doğulmasını mələklərin mahnılarından eşidiblər. O vaxtdan iki min ildən çox keçir. Bəzən torpaqda münaqişələr, müharibələr, terror aktları baş verir. Biz sülhün qədrini bilirik. Amma sülh öncə insanlar arasında deyil, bizim qəlbimizdə, ailələrdə, işdə, qonşular arasında olmalıdır. Əgər biz sülhü yaratmağı öyrənsək, onda sülh dövlətləri arasında da yaranacaq. Ölkəmizə, Azərbaycan xalqına sülh, firavanlıq arzulamaq istəyirəm. Arzu edirəm ki, Prezidentimiz İlham Əliyevin himayəsi altında Azərbaycan bundan sonra da sabitlik, tərəqqi, firavanlıq şəraitində yaşasın. Prezident İlham Əliyev ölkəmizdə yaşayan xristianları hər il olduğu kimi, bu il də təbrik edib. Azərbaycan xalqının ümummilli lideri Heydər Əliyev bu nurlu bayramda xristianlara həmişə təbrik ünvanlayıb. Prezident İlham Əliyev də bu xoş ənənəni davam etdirir. Prezident İlham Əliyev ölkəmizdə baş verən dini həyata, dini problemlərə daim diqqətlə yanaşır, bu işə fəal dəstək verir”.