Bişkek şəhərində görkəmli ədib Mircəlal Paşayevin anadan olmasının 110 illiyi anılıb

08:36 / 06.04.2018

Azərbaycan Respublikasının Qırğızıstandakı Səfirliyinin və Qırğızıstan Respublikası Mədəniyyət nazirliyinin təşkilatçılığı ilə Bişkek şəhərində Mircəlal Paşayevin anadan olmasının 110 illiyinə həsr olunmuş tədbir keçirilib. Bişkek Opera və Balet teatrının binasında təşkil olunmuş tədbirdə Qırğızıstan Respublikasının Mədəniyyət Nazirinin müavini və bir sıra dövlət xadimləri, ölkənin siyasi - mədəni həyatında mühüm rol oynayan çoxsaylı ictimai xadimlər, yazıçı və şairlər, incəsənət nümayəndələri və elm adamları iştirak ediblər.

Tədbirdə çıxış edən Azərbaycan Respublikasının səfiri cənab Hidayət Orucov Mircəlal Paşayev yaradıcılığının geniş təhlilini verib, onun elmi-pedaqoji fəaliyyəti, Azərbaycanda ədəbiyyatşünaslıq elminin təşəkkül tapmasında və inkişaf etdirilməsində misilsiz xidmətləri barədə tədbir iştirakçılarına ətraflı məlumat verilib. Görkəmli yazıçının 50 illik bədii yaradıcılığının nəticəsi olaraq 58 kitabının nəşr olunması, elmi fəaliyyətinin müxtəlif istiqamətləri üzrə çoxsaylı tədqiqat işlərinin aparılması və nəhayət 10 il öncə bu dahi şəxsiyyətin 100 illik yubileyinin YUNESCO tərəfindən dünya miqyasında qeyd olunduğu diqqətə çatdırılıb.

Görkəmli ədibin elmi-pedaqoji fəaliyyəti və bədii-estetik yaradıcılığının müxtəlif aspektləri haqqında çıxış edən millət vəkili Cavanşir Feyziyev Mircəlal Paşayev yaradıcılığını dünya bədii fikrini zənginləşdirən böyük və dəyərli irs olaraq səciyyələndirilib. Millət vəkili qeyd edib ki, doğulub böyüdüyü, təhsil aldığı və əmək fəaliyyətinə başladığı dövrlərin tarixi-siyasi çalarları onun taleyində dərin iz buraxdığı kimi, onun universal yaradıcılıq fəaliyyətinə də təsirsiz ötüşməyib. “...Mircəlalın bu günədək sevilə-sevilə oxunan əsərlərində - çoxsaylı hekayə, novella, oçerk və romanlarında özünün müasiri olduğu üç fərqli ictimai-siyasi dövrün hadisələri öz real təcəssümünü tapıb. Mircəlalın yaradıcılığında yaşadığı tarixi epoxanın ziddiyyətləri, siyasi və sosial qarşıdurmaların yaratdığı xaos, bu xaosdan qurtuluşa can atan insanların mənəviyyat və davranışlarında baş verən dəyişikliklər və bütün bunların doğurduğu psixoloji sarsıntılar çox aydın şəkildə sadə xalq dilində təsvir olunub. Bütün bu məziyyətləri ilə Mircəlal Paşayevin Azərbaycan ədəbiyyatı tarixindəki yeri XX əsr dünya klassiklərinin qlobal ictimai fikir tarixindəki yeri ilə müqayisə oluna bilər.”

Tədbirdə həmçinin Qırğızıstan Respublikası Mədəniyyət nazirinin müavini Aynura Temirbekova, Qırğızıstanın tanınmış dramaturqu, əsərləri dəfələrlə Azərbaycan səhnələrində tamaşaya qoyulmuş Mar Bayciyev çıxışlar etmişlər. Natiqlər Azərbaycan mədəniyyətinin təbliğatı istiqamətində Səfirliyimiz tərəfindən Qırğızıstanda həyata keçirilən çoxsaylı mədəni-kütləvi tədbirlərin, o cümlədən, xalqlarımızın Çingiz Aytmatov və Mircəlal Paşayev kimi görkəmli nümayəndələrinə göstərilən qarşılıqlı rəğbət və sevginin ölkələrimiz arasında mədəni-humanitar əlaqələrin inkişaf etdirilməsinə böyük töhfə verdiyini qeyd edib, xalqlarımız arasında dostluq və qardaşlıq münasibətlərinə əsaslanan əməkdaşlıqdan məmnunluqlarını ifadə ediblər.

Çıxışlardan sonra Azərbaycanın və Qırğızıstanın tanınmış incəsənət xadimlərinin ifasında Azərbaycan klassik musiqi sənətinin ən gözəl nümunələri səsləndirilib. Tədbir görkəmli ədibin xatirəsinə həsr olunmuş rəsmi ziyafətin verilməsi başa çatıb.

Bişkek şəhərində görkəmli ədib Mircəlal Paşayevin anadan olmasının 110 illiyi anılıb

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə