Təqdimata heç bir ehtiyacı qalmayan, ölkə ictimaiyyətinin yaxşı tanıdığı Leyla Yunus

Artıq təqdimata heç bir ehtiyacı qalmayan, ölkə ictimaiyyətinin yaxşı tanıdığı Leyla Yunus vətəndaşı olduğu ölkəyə qarşı yeni kampaniyaya başlayıb.

Belə ki, Sülh və Demokratiya İnstitutu yanında Repressiyalara Müqavimət Mərkəzi 2015-ci ildə Bakıda keçiriləcək Avropa Oyunlarını boykot kampaniyasına başlayıb. Bu haqda müvafiq müraciət artıq Avropa Olimpiya Komitəsinə və bu komitənin Avropa İttifaqındakı ofisinə göndərilib. Onun bu hərəkəti əslində çox da təəccübləndirici durum kimi qəbul olunmayıb. Amma təbii ki, belə bəyanat sükutla qarşılanmayıb.

Təəssüf ki, Azərbaycan kimi inkişaf etməkdə olan ölkələrə qarşı bu cür planlar həmişə qurulub. Məlum xarici dövlətlər hər zaman ölkəmizin adını ləkələmək üçün müxtəlif yollara əl atıblar. Çox keçmişə qayıtmayaq. Elə “Evrovision” yarışmasını yada salmaq kifayətdir ki, Azərbaycanı nüfuzdan salmaq üçün özlərinə əl qatanların kim olduğunu aydın başa düşəsən. 2012-ci ildə yarışma ərəfəsində Leyla Yunus və ətrafındakılar “Demokratiya naminə oxu” layihəsini gerçəkləşdirməklə ortaya ölkəmizi gözdən salmağa hesablanmış fəaliyyət qoymuşdular. İndi də Azərbaycanın I Avropa Oyunlarına hazırlaşması bu cür məkrli insanların yenidən fəaliyyətə keçməsinə rəvac verib. Məlumdur ki, bu böyük idman tədbiri Azərbaycanın tanınması, təbliği baxımından böyük əhəmiyyətə malikdir. Avropa ölkələrindən gələn qonaqlar Azərbaycanın hansı sürətlə inkişaf etdiyini, Bakının gündən-günə necə gözəlləşdiyini gözləri ilə görəcəklər. Təbii ki, bu da Azərbaycanın Avropa ölkələrində yaradılmasına cəhd edilən pis imicinə sarsıdıcı zərbə olacaq.

Azərbaycan haqda “geridə qalmış ölkə” kimi böhtan xarakterli təsəvvürlər darmadağın olacaq. Ona görə də Azərbaycanın olduğu kimi görünməsini istəməyən qüvvələr indidən hərəkətə keçiblər. Təbii ki, ilk olaraq bu işə başlayanlar, ölkəmiz əleyhinə iş quran qüvvələr, “5-ci kolon” təmsilçiləridir. L.Yunus və dostları hətta adını belə dəqiq bilmədikləri (Leyla Yunus “Avropa Oyunları”nı “Avropa Olimpiya Oyunları” kimi təqdim edir - red.) Avropa Oyunlarının Bakıda keçirilməsinə etirazları özündə ehtiva edən layihənin reallaşması üçün əllərindən gələni edirlər. Nəzərinizə çatdıraq ki, belə qarayaxma kampaniyaları təkcə Azərbaycana qarşı aparılmır. Yəni, ölkəmizin güclü dövlətlər tərəfindən təkləndiyini düşünüb pessimist hislərə qapılmağa ehtiyac yoxdur. Misal üçün, deyək ki, 2022-ci ildə futbol üzrə dünya çempionatının ev sahibi olmaq hüququnu əldə edən Qətərə qarşı indidən kampaniyalara start verilib. Guya bu dövlətin dünya çempionatına ev sahibliyi hüququnu çirkli yollarla əldə etdiyi iddia edilir. İş o yerə çatıb ki, İraqda və Suriyada terror fəaliyyəti ilə tanınan İŞİD də bu oyunların Qətərdə keçirilməsinə qarşı olduğunu elan edib. Buradan belə nəticə çıxır ki, orada İŞİD-in gördüyü işi Azərbaycanda L.Yunus görür.

Bu mövzuda fikirlərini bölüşən millət vəkili Jalə Əliyeva deyib ki, L.Yunusun gələn il Bakıda keçiriləcək ilk Avropa Oyunlarını boykot kampaniyasına başlamasını heç cür normal qəbul etmək olmaz və bu, yolverilməz bir addımdır: “Əslində, onun bu addımı başa düşüləndir və ondan başqa cür mövqe gözləməyə dəyməz. İnsan hüquqlarının müdafiəsi və müdafiəçisi adı altında “fəaliyyət göstərərək” öz hərəkətlərini, məkrli məqsədlərini pərdələməyə çalışan Leyla Yunus son 25-26 ildə hər zaman antiazərbaycan mövqeyi ilə seçilib, antiazərbaycançı qüvvələrin əlində Azərbaycana qarşı bir alət rolunu oynayıb”.

J.Əliyeva bildirib ki, bir müddət öncə “xalq diplomatiyası” adı altında Ermənistan xüsusi xidmət orqanları ilə əməkdaşlıq etməsi faktı üzə çıxan və bu əməkdaşlığı heç kimdə şübhə doğurmayan, bu yöndə “addımları” məlum olduqdan sonra isə Fransaya qaçmaq istəyən, həmçinin, evində, ofisində axtarış aparılarkən hüquq-mühafizə orqanlarının əməkdaşlarını aşağılamaqdan, təhqir etməkdən çəkinməyən L.Yunus son hərəkəti ilə bir daha göstərmiş oldu ki, yenə də öz ampluasındadır və heç zaman dəyişən deyil: “Leyla Yunus həqiqətən insan hüquqlarına bu qədər bağlıdırsa, niyə bir milyon Azərbaycan qaçqın və köçkünün acınacaqlı taleyindən, Azərbaycan torpaqlarının 26 ildən bəri davam edən işğalından, işğalçı Ermənistanın təcavüzündən, qeyri-konstruktiv mövqeyindən, ermənilərin və onların havadarlarının Azərbaycan xalqının başına gətirdiyi müsibətlərdən, bir sözlə, Qarabağ problemindən danışmır, bu məsələləri “əməkdaşlıq” etdiyi, “hesabat” verdiyi, qrant aldığı qurumların, beynəlxalq təşkilatların qarşısında bircə dəfə olsun belə, gur səslə qaldırmır? Məgər bir milyondan artıq insanın hüquqlarının ermənilər tərəfindən pozulması və bu pozuntuların hələ də aradan qaldırılmaması insan hüquqlarının müdafiəsinə aid məsələ, problem deyil? Yaxşı olardı ki, Leyla Yunus bu və bu qəbildən olan suallara cavab verəydi, heç olmasa, ömründə bircə dəfə bu suallar barədə düşünəydi. Ancaq görünür ki, Leyla Yunusu və onun kimiləri belə məsələlər, belə suallar maraqlandırmır, narahat etmir”.

Şübhə doğurmur ki, L.Yunus və havadarlarının arzuları bu dəfə də gözündə qalacaq və Azərbaycan sözü gedən çempionatı layiqincə təşkil edəcək. Çünki ölkəmizə belə məsuliyyətli beynəlxalq tədbir ilk dəfə deyil ki tapşırılır. Dünya ictimaiyyəti Azərbaycanın belə işlərdən üzüağ çıxdığını dəqiq bilir (Kaspi.az).