Milli Qəhrəman Vahid Quliyev: "Hər birimiz döyüşə hazır olmalıyıq"

10:57 / 11.08.2014

Strategiya.az-a verilən məlumata görə, "Milli Qəhrəmanlarımızı tanı!" layihəsi çərçivəsində gənclərlə görüş keçirilib

Gənclər Fondunun dəstəyi ilə Nizami rayonunda yerləşən 129 saylı orta məktəbdə "Milli Qəhrəmanlarımızı tanı!" layihəsi çərçivəsində gənclərlə görüş keçirilib. Yerli icra hakimiyyəti nümayəndələrinin, milli qəhrəmanların, gənclərin, KİV və QHT təmsilçilərinin iştirak etdiyi tədbirdə çıxış edərək, məlumat verən layihə rəhbəri Sevinc Nəcəfovanın sözlərinə görə layihənin əsas məqsədi ermənilərin Azərbaycana olan ərazi iddialarının qarşısını almaq amalı ilə savaşa atılaraq şərəfli döyüş yolu keçən və hazırda da həyatda olan və yenə də şərəflə xalqına, vətəninə xidmət edən Milli Qəhrəmanlarımızın gənclərimizə tanıdılmasıdır:

" Ölkə gənclərinin vətənpərvərlik, azərbaycançançılıq və dövlətçilik prinsipləri əsasında tarixi-mədəni irsimizə, milli-mənəvi və ümumbəşəri dəyərlərimizə hörmət ruhunda tərbiyə olunması, ölkənin inkişafında onların intellektual və yaradıcı potensiallarının ümummilli məsələlərin həllinə yönəldilməsi müasir dövrün tələbi olaraq qalır. Bunun üçün biz düşünürük ki, gənclərimizin hazırda sağ olan və yenə də Azərbaycan Respublikasına ləyaqətlə xidmət edən Milli Qəhrəmanlarımızı daha yaxından tanıması çox vacibdir. Bunun üçün həyata keçirilən bütün işlərə dəstək olmaq, qəhrəmanlarımızı tanıtmaq missiyasını öz üzərimizə götürmüşük".

S. Nəcəfova həmçinin vurğulayıb ki, layihə çərçivəsində hazırda həyatda olan qəhrəmanlarımızın keçdiyi döyüş yolu, eyni zamanda onların hazırki fəaliyyətləri ilə bağlı məlumatverici bukletlər və videoroliklər hazırlanıb.

Görüşdə Milli Qəhrəman Vahid Quliyev gənclərə keçdiyi döyüş yolundan danışıb. O, işğal altında olan torpaqlarımızın düşməndən azad edilməsi naminə yenidən döyüşə getməyə hazır olduğunu deyərək tədbir təşkilatçılarına və iştirakçılarına minnətdarlığını bildirib.

Tədbirdə həmçinin Nizami rayonu İcra Hakimiyyəti başçısının müavini Gülnaz İsrafilova, tərəfdaş təşkilat “Yeni həyat” Humanitar və Sosial Dayaq İctimai Birliyinin sədri Nailə İsmayılova, “Milli Qəhrəmanlarını Tanıtma” İctimai Birliyinin sədri Elşən Uluxanlı, "Saf Həyat Naminə" Gənclər İctimai Birliyinin sədri Səbinə Abbasova, layihənin mətbuat xidmətinin rəhbəri və gənc yazar Qurbanəli Ömər, YAP Nizami rayon təşkilatının aparat rəhbəri Ramil Vəlibəyov və 129 saylı orta məktəbin direktoru Samir Mehdizadə çıxış edərək bildiriblər ki, gənclər xalqımızın yaşadığı faciələr, soyqırımları haqqında məlumatlı olmaqla yanaşı, vətənimizin azadlığı uğrunda gedən döyüşlərdə qəhrəmancasına vuruşub düşmənə sarsıdıcı zərbələr endirmiş milli qəhrəmanlarımızı tanımalı və onlardan nümunə götürməlidirlər. Vurğulanıb ki, gənc nəslin vətənpərvər ruhda böyüməsi üçün belə canlı qəhrəmanlar təbliğ edilməlidir, çünki onların keçdiyi döyüş yolu gənclərimiz üçün bir örnəkdir.

Onu da qeyd edək ki, 14-25 yaşları arasındakı gənclərin faydalanmasını nəzərdə tutan layihə çərçivəsində Milli Qəhrəmanlarımızla növbəti görüş Binəqədi rayonunda keçiriləcək.

Milli Qəhrəman Vahid Quliyev: "Hər birimiz döyüşə hazır olmalıyıq"

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə