Yasamal rayonunun oxucuları “SEHİRLİ DÜNYA”nın qonağı oldular

08:59 / 20.11.2018

Yasamal rayonunun fəal oxucuları Bakı Şəhər Mədəniyyət Baş İdarəsi Yasamal rayon MKS-inin direktoru Lətifə Məmmədova və kitabxanaçı İradə Hüseynova ilə birgə ilk dəfə olaraq “Azərbaycan” nəşriyyatına yollandılar.

Yasamal rayon MKS-inin X.B.Natəvan adına 4 №-li kitabxana filialının əməkdaşı İradə Hüseynova oxucular və valideynlərlə birgə “Azərbaycan” nəşriyyatında yerləşən “Sehirli dünya” uşaq jurnalının redaksiyasında oldular.

O zaman, “Sehirli dünya” uşaq jurnalının baş redaktoru Gülzar İbrahimova (Gülzar nənə) gərgin işləyirdi. Amma buna baxmayaraq, o, uşaqları mehriban qarşıladı. Uşaqlarla görüşdə onlara vətənpərvərlik haqqında şeir və hekayələrini təqdim etdi. Yazıçı uşaqların arzularını dinlədi, həyat yollarında qarşılarına çıxan bütün çətinliklərə hazır olmaq üçün mütaliənin vacibliyini vurğuladı.

Bu vaxt redaksiyaya “Mədəniyyət” kanalının əməkdaşları daxil oldular. Uşaqlar və valideynlər Gülzar İbrahimovanın “Mədəniyyət” telekanalına verdiyi müsahibəni diqqətlə dinlədilər, onun yaradıcılıq planları ilə tanış oldular. Sonra isə redaksiyaya qonaq gələn uşaqlar da “Mədəniyyət” kanalına çəkildilər.

Tədbirdə X.B.Natəvan adına 4 №-li kitabxana filialının əməkdaşı İradə Hüseynova Gülzar İbrahimovanın əsərlərindən söhbət açdı və bildirdi ki, yazıçı uşaqların dostu və sevimlisidir. O, qeyd etdi ki, müasir dövrdə yazıçılarlarla, tanınmış elm xadimləri ilə yeniyetmələrin görüşlərinin təşkil olunması mütaliəyə marağın artırılması üçün görülən vacib tədbirlərdən biridir. Mütaliə uşaqların dünyagörüşünün formalaşmasında mühüm amildir. O, uşaqların elmə, ədəbiyyata marağını artırır, onları pis vərdişlərdən uzaqlaşdırır.

Görüşə gələn uşaqların hər birinə Gülzar İbrahimova nağıl və şeirlərdən ibarət CD və DVD-lər hədiyyə etdi. Görüşdə iştirak edən Yasamal rayon MKS-inin direktoru Lətifə Məmmədovaya da yazıçı çoxlu sayda uşaq kitabları, CD və DVD-lər bağışladı. Tədbirdə kiçik yaşlı uşaqlar,Yasamal rayon 53 №-li tam orta məktəbin 6-ci sinif şagirdi Aysu Babayeva, Azərbaycan Yazıçılar Birliyində “Sehirli dünya”nın tədbirində iştirak edən şagirdlər də özlərinin qələmə aldığı şeirləri və nağılları söylədilər, rəsmlərini

nümayiş etdilər. Gülzar İbrahimova “Dostlaşmış nağıllar” kitabı haqqında danışdı, uşaqları maraqlandıran sualları həvəslə cavablandırdı. Uşaqlar və valideynlər Gülzar nənəyə maraqlı görüşə görə təşəkkürlərini bildirdilər və belə görüşlərin tez-tez keçirilməsini arzuladılar.

Yasamal rayonunun oxucuları “SEHİRLİ DÜNYA”nın qonağı oldular

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə