"Qadın geyimində Zatulin" - Mariya Zaxarovanı niyə belə adlandırırlar? - VİDEO

18:37 / 12.01.2019

Azərbaycana münasibətdə Mariya Zaxarovanın xüsusi bir yanaşma tərzi var. Hətta Azərbaycan-Rusiya münasibətləri ilə bağlı Moskvanın reallığı əks etdirən mövqeyini ifadə edəndə də Zaxarova konkret diplomatik sərhədləri olan bu rəsmi yanaşmaya ədviyyat olaraq zəhər əlavə etməyi də unutmur. Azərbaycanlıları dost xalq adlandırır və dərhal bu dost xalqın maraqlarını ifadə edən kütləvi informasiya vasitələrinin, jurnalistlərin ünvanına ən ağır ittihamları səsləndirir. İşğal altında olan Azərbaycan ərazilərinə Rusiya vətəndaşlarının səfərini onların şəxsi mövqeyi kimi dəyərləndirir, işğaldan azad edilmiş Azərbaycan ərazilərinə, Cocuq Mərcanlıya Rusiya ziyalılarının səfərini ikibaşlı ifadələrlə şərh etməkdən çəkinmir və hətta dolayısıyla Azərbaycanın ərazi bütövlüyünü şübhə altına almağı unutmur.

Moskvanın və təbii ki, Rusiya telekanallarının Ermənistanda hakimiyyət dəyişikliyinə aparan kütləvi aksiyalara kifayət qədər kəskin reaksiyasına baxmayaraq, Zaxarova "ən çətin anda birləşməyi bacaran erməniləri böyük xalq" adlandırır. Və bütün bunların fonunda belə bir təəssürat yaranır ki, Mariya Zaxarovanın xüsusi statusu var və o, rəsmi Moskvanın mövqeyi ilə üst-üstə düşməyə bilər. Və yaxud Mariya Zaxarova Rusiya dövlətini deyil, bu dövlətin maraqları ilə yanaşı hansısa digər maraqları ifadə edən, yarımüstəqil xarici işlər nazirliyini təmsil edir.

Mariya Zaxarova Azərbaycana səfər edən erməni əsilli Rusiya vətəndaşları ilə bağlı tuluğunda olan zəhəri son damlasına kimi püskürməyi özünə borc bilir, amma Azərbaycanın işğal altında olan ərazilərində, Qarabağda girov saxlanılan Rusiya vətəndaşı Dilqəm Əsgərovla bağlı məsələnin Bakı ilə İrəvan arasında həll edilməli olduğunu bildirir.

Maraqlıdır, erməni əsilli Rusiya vətəndaşlarının Azərbaycanı görmək üçün bu qədər canfəşanlıq etmələrinin və ölkəmizə buraxılmadıqdan sonra Rusiya Xarici İşlər Nazirliyini şikayət atəşinə tutmalarının səbəbi nədir? Bəlkə onları Azərbaycana elə məqsədyönlü şəkildə yönəldirlər. Nəticəsini bilə-bilə... Yönəldirlər ki, sonradan Azərbaycanda ermənilərə qarşı hansısa "diskriminasiya"nın olduğunu əsaslandıra bilsinlər. Axı Zaxarova da, onunla eyni mövqeyi bölüşənlər də yaxşı bilirlər ki, Rusiya vətəndaşı olan ermənilərin, eyni zamanda Ermənistan vətəndaşlığı var. Həmçinin hazırda Ermənistanda yaşayan ermənilərin də az qala yarıdan çoxunun Rusiya pasportu var. Zaxarovanın bildiklərini şübhəsiz ki, Azərbaycanda da bilirlər. Həmçinin Azərbaycanda da yaxşı bilirlər ki, ermənilər Rusiya pasportu ilə ölkəmizə xoş niyyətlə gəlmirlər. O zaman Rusiya Xarici İşlər Nazirliyinin əndişəsi çox güman ki, korporativ və bəlkə də tamamilə fərqli maraqlardan qaynaqlanır. Yoxsa Rusiya Xarici İşlər Nazirliyinin rəsmi təmsilçisi özünü Konstantin Zatulin kimi aparmazdı. Təsadüfi deyil ki, Zaxarovanı bəzən "qadın geyimində Zatulin" də adlandırırlar.

"Qadın geyimində Zatulin" - Mariya Zaxarovanı niyə belə adlandırırlar? - VİDEO

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə