Məsləki həqiqət, silahı qələm, döyüşən yazıçı

İstedadlı yazar Sevinc Ağa Xəlilqızı (Basqallı) oxucuların görüşünə bu dəfə “Bu dünyanın fidanları. Дети – сияние планеты” adlı ikidilli kitabla gəldi.

Elə bir insan yoxdur ki, kitabın xeyri nədir? Sualına cavab verə bilməsin.Lakin çoxları bu sehirli əşyanın dəyərini bilmirlər.Amma birmənalı olaraq onun – həyatımızın ən sadiq dostu kitabın bir missiyası danılmazdır: o insanın, bəlkə də, ən yaxın dostudur, əzizidir. Çox vaxt heç kimdən ala bilmədiyin məlumatları, sənə həyatda var olmaq üçün, düzgün yaşamaq və insanlara münasibət qurmaq üçün lazım olan informasiyanı kitab verir. Hər bir insanın özünüdərk etdiyi gündən ilk dostu onun birinci kitabı olub. Kitablar müxtəlifdir: dərsliklər, elmi ədəbiyyat, uşaq kitabları, bədii ədəbiyyat. Elə haqqında danışdığımız kitab da onlardan biri, faydalı və aktual mövzuludur. Çünki uşaqlar üçün yazmaq, onların dünyasına varmaq çox vacibdir və bu heç də hər yazıçıya müyəssər olmur.

Sevinc Ağa Xəlilqızının (Basqallı) 2018-ci il may ayında “Məryəm” kitabı, 2018-ci il dekabrın 27-də isə “Bu dünyanın fidanları. Дети – сияние планеты” kitabı çapdan çıxmışdı. Müəllif bədii ədəbiyyatdan sonra uşaq ədəbiyyatına müraciət etdi.Kitab Azərbaycan kitabxana tarixində ilk dəfə olaraq M.Ş.Vazeh adına Yasamal rayon MKS-i və şair, yazıçı-publisist, “Yeni təfəkkür” qəzetinin müxbiri Sevinc Ağa Xəlilqızı ilə birgə layihəsi əsasında nəşrə hazırlanıb.

Layihənin rəhbəri və ideya müəllifi, kitabı rus dilinə tərcümə edəni tarix üzrə fəlsəfə doktoru Lətifə Məmmədovadır. Kitab ibtidai və orta sinif şagirdləri üçün hazırlanmışdır. Kitabda Vətənə, torpağa, təbiətə sevgi hissləri aşılanır. Uşaqlara dostluq, mərdlik, cəsarət, xeyirxahlıq haqqında maraqlı və faydalı məlumatlar verilir.Kitabda vətənpərvərlik mövzusu xüsusi yer alıb. İlk dəfə olaraq oxuculara xeyirxah insan, tanınmış mesenat H.Z.Tağıyevə həsr olunmuş poema təqdim edilir. Kitabda Milli Qəhrəman Mübariz İbrahimova, nakam şair Mikayıl Müşfiqin 110 illiyinə həsr olunmuş, alimlərimizə, balaca balalara həsr olunmuş şerlər var.

Görkəmli rus yazıçısı M.Qorki demişdir: “Məndə olan bütün yaxşı keyfiyyətlərə görə kitablara borcluyam”. Sevinc Ağa Xəlilqızının (Basqallı)3-cü kitabının təqdimatı fevralın 2-nə – Gənclər Gününə təsadüf etdi. Təqdimat Atatürk Mərkəzində keçirildi.

Tədbiri mərkəzin şöbə müdiri, baş redaktor, AYB-nın üzvü Dəyanət Osmanlı açaraq kitab haqqında məlumatı iştirakçıların nəzərinə çatdırdı. Tədbirdə alimlər, ziyalılar, həkimlər, qələm sahibləri iştirak etdilər. Bütün iştirakçılar müəllifin ailəcanlı olduğundan, səxavətidən, xeyirxahlığından, vətənpərvərliyindən söhbət açdı.

Tədbirlərdə qeyd olundu ki, müəllif yanvarın 10-da Səhiyyə Nazirliyinin Psixo-Nevroloji Mərkəzində uşaqlarla görüşürək onlara kitab hədiyyə edib. Kitab uşaq bağçalarına və Basqal məktəbinə də hədiyyə olunub.

Sevinc xanımın ixtisası fizioloq olsada o həm tarix, həm də filologiyanın sintezindən gözəl kitablar yarada bilmişdir. Məclisin sonunda hekayələrin qəhrəmanları Lalə, Həmid,Murad, Aminə, Əsma, Nəzrin, Ayxan, Aylin, Anar şerlər söylədilər. Onlar “Biz müstəqilAzərbaycanın gələcəyiyik, gələcək bizimlə gələcək!” sözlərini fəxrlə dedilər.Əyilib Dövlət Bayrağını öpüb, başlarının üstünə qaldırdılar.

Bəli Tanrının səltənəti – uşaqlardır.

Bu səltənətin qapıları isə uşaqların pak, saf qəlbləridir! Gəlin bu əmanətə layiqincə sahib çıxaq.

Sonda Sevinc xanım söz alaraq kitabın ərsəyə gəlməsində əməyi olan Lətifə xanıma, M.Ş.Vazeh adına Yasamal rayon Mərkəzi Kitabxanasının kollektivinə minnətdarlığını bildirdi, gələn qonaqlara təşəkkür etdi, yeni maraqlı əsərləri yaradacağına söz verdi. Sizə uğurlar, Sevinc xanım.

Elin sevincidir, qəlbinə məlhəm,

Elin min dərdini çəkən yazıçı.

Məsləki – həqiqət, silahı – qələm,

Ən öndə döyüşən əsgər yazıçı!

Səbinə Kərimli,

müstəqil jurnalist