Ekspert: Problemli kreditlərin həlli çox ciddi sosial layihədir və onun sonrakı nəticələri müsbət olacaq

12:02 / 07.03.2019

Kreditlərin ödənilməsi ilə bağlı vətəndaşlar ən müxtəlif üsullara əl atır. Şəxsi mülkiyyətlərində olan daşınmaz əmlak və ya minik avtomobillərini satmaq məcburiyyətində qalırdılar.

AZƏRTAC xəbər verir ki, bu sözləri vətəndaşların maddi və mənəvi yükdən azad olunması üçün problemli kreditlərin həll edilməsi sahəsində Prezident İlham Əliyevin verdiyi Fərmanı şərh edərkən Vətəndaşların Əmək Hüquqları Müdafiə Liqası İcraiyyə Komitəsinin sədri Sahib Məmmədov deyib: “Mən dövlət başçısının bu Fərmanını alqışlayıram. Onu da qeyd etməyi özümə borc bilirəm ki, heç bir dövlətin vətəndaş qarşısında onun banklara olan münasibətlərinə hansısa formada dəstək vermək barədə pozitiv öhdəliyi yoxdur. Təbii, yaxud texnogen fəlakət nəticəsində daşınmaz əmlak sıradan çıxa bilərsə, əmlakın sahibi onu sığortalamalıdır. Məsələn, bu yaxınlarda Şamaxıda baş verən zəlzələ zamanı dövlət başçısı hadisə yerində olarkən sakinlərə söz verdi ki, onların sıradan çıxan əmlakı dövlət hesabına bərpa olunacaq. Bunun ardınca çox böyük vəsait tələb edən problemli kreditlərin həlli məsələsini göstərə bilərik. Dünyada ABŞ da daxil olmaqla elə bir ölkə yoxdur ki, orada banklara birbaşa dəstək siyasəti yeridilsin. Qonşu Rusiyada da məsələni qeyri-bank üsulu ilə deyil, ya kollektor agentlikləri və ya borcların satılması, yaxud qapalı investisiya fondları yaratmaq vasitəsilə həll etdilər. Hətta Avropa ölkələrinin qanunları imkan vermir ki, dövlət ona hansısa formada müdaxilə etsin. Son illər bunun bir nümunəsi Yunanıstanda yaşanıb. Həmin ölkədə banklar birləşərək pis kreditlər bankı yaradıb məsələni bu yolla həll etmək istəyiblər və s.”.

O, daha sonra bildirib: “Problemli kredit məsələsi hökumətin içərisində həmin problem yaranandan başlayıb. Biz bilirdik ki, bu sahədə uzunmüddətli müzakirələr gedirdi, hesablamalar aparılırdı, müxtəlif variantlar götür-qoy edilirdi. İllərlə davam edən bu proses barədə manatın stabilləşməsindən sonra qərar qəbul olundu. Yeri gəlmişkən, postsovet məkanına daxil olan bir sıra ölkələrdə, məsələn, qonşu Gürcüstanda və Qazaxıstanda da dövlət büdcəsində transfer nəzərdə tutulmurdu, onlarda da qeyri-bank üsulu təklif olunmuşdu. Ölkəmizdə həyata keçirilən proses banka deyil, əhaliyə verilən böyük dəstəkdir. Bu, yalnız vətəndaşın maraqları naminə atılmış addımdır. Lakin bu addım eyni zamanda bankların da inkişafına və onların birbaşa böhrandan çıxmasına təsir göstərəcək, bankçılığın daha yaxşı qaydada qurulmasına kömək edəcək.

Bizim ölkədə isə birbaşa dəstək yolu seçildi və bu dəstək də dövlət büdcəsinin vəsaiti hesabına oldu. Mənim bildiyimə görə bu, müstəsna bir haldır. İstehlak kreditlərinin əksəriyyəti vətəndaşların təcili ehtiyaclarını ödəmək üçün ortaya çıxan kreditlərdir və bu məsələdə devalvasiyanın nəticəsi olaraq onlar çarəsiz vəziyyətdə qalmışdılar. 2009-cu ildə dövlətin sosialyönümlü olması Konstitusiyaya edilən dəyişikliklərə daxil edildi. Dövlətimiz sosialyönümlü xəttinə sadiq qalaraq bu məsələnin həllində əhalinin yanında oldu. Bu, çox ciddi sosial layihədir və onun sonrakı nəticələri müsbət olacaq”.

Ekspert: Problemli kreditlərin həlli çox ciddi sosial layihədir və onun sonrakı nəticələri müsbət olacaq

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə