Gülər Əhmədova üçün 6000 nəfərin...

18:54 / 13.01.2014

Sabiq deputat Gülər Əhmədovanın həbsdən azad edilməsi üçün prezident İlham Əliyevə müraciətlər göndərilir. Bunu “Media forum” saytına Gülər Əhmədovanın vəkili Əfsər Talıbov deyib.

Vəkilin sözlərinə görə, indiyədək prezidentə 6000 nəfərin imzası ilə müraciətlər olub və bu proses davam edir: “Gülər xanım həmişə xalqın, el-obanın içində olan, mətbuata açıq bir insan kimi tanınıb. Bu səbəbdən ona mənəvi dayaq duran insanların sayı çoxdur. Gülər xanımın həbsdən azad olunması, ona atılan şər-böhtandan qurtulması üçün cənab prezidentə artıq 6000 nəfərin – onların arasında ictimaiyyət nümayəndələri, deputatlar, tanınmış ziyalılar var – imzası ilə müraciətlər göndərilib. Gülər xanımın özünün və ailəsinin adından həmin şəxslərə bir daha minnətdarlığımı çatdırıram”.

Yanvarın 11-də Bakı İstintaq Təcridxanasında Gülər Əhmədova ilə görüşmüş vəkil qeyd edib ki, sabiq deputatın hərəkətsizlikdən ayağı tutulub, ürəyində dəyişikliklər var, müalicə alır: “Gülər Əhmədovanın səhhəti gündən-günə pisləşir”.

“Media forum” saytının “Gülər Əhmədovanın həyata baxışında, dünyagörüşündə nə kimi dəyişikliklər var” sualını vəkil belə cavablandırıb: “Gülər xanım insan azadlığının qədrini bilir”.

Həbs cəzasında bir məqsədin də insanı islah etmək olduğu barədə “Media forum” əməkdaşının qeydinə cavab olaraq vəkil bildirib ki, islah cinayət işlətmiş qatillər, narkomanlar üçündür: “Gülər xanım nə qatil, nə də narkomandır”.

Gülər Əhmədovanın məhkəməsi ötən ilin ikinci yarısında olub. Məhkəmədə jurnalistlərin diqqətini çəkən məqamlardan biri də sabiq deputatın prosesdə dini qiyafədə görünməsi olub. Həbsxanaya düşməmişdən əvvəl Gülər Əhmədova dini ayinləri icra edirdimi, namaz qılırdımı, oruc tuturdumu? Vəkil Əfsər Talıbov bu suala belə cavab verib: “Namaz Allahla rabitədir. Namazı nümayiş etdirmək onun batil olması deməkdir. Buna görə də Gülər xanım heç vaxt bu barədə danışmağı sevmir”.

Son vaxtlar mediada Gülər Əhmədovanın həbsdə yazdığı şeirləri də yayılıb. Vəkil bununla bağlı “Media forum”a deyib: “Gülər xanımın yeni şeirlər yazıb-yazmadığını bilmirəm. Çox yazı yaza bilmir, çünki gözlərində və beyin qan-damar sistemində problemləri var. Ümumiyyətlə Gülər xanım şeirlərini çox xəsisliklə bölüşür, çünki özünü şair saymır”.

Sabiq deputatın nə mütaliə etdiyinə gəlincə, vəkil bildirib ki, kitabları Gülər Əhmədovaya ailə üzvləri aparır: “Daha çox fəlsəfi, tarixi, əsasən türk tarixi, islam tarixi barədə kitablar istəyir. Gülər xanım Avropa filosoflarının və psixoloqlarının əsərlərini mütaliə edir”.

Gülər Əhmədovanın Bakı Ağır Cinayətlər Məhkəməsində keçirilən məhkəməsi ötən il oktyabrında yekunlaşıb.

Sabiq deputatın ölkədə gedən siyasi proseslər haqda məlumat ala bilib-bilmədiyi barədə suala cavabında vəkil qeyd edib ki, o, saxlandığı təcridxanada xəbərlərə baxa bilir: “Gülər xanım hər zaman olduğu kimi cənab prezidenti və Heydər Əliyev siyasi kursunu dəstəkləyir”.

Sonda vəkil vurğulayıb ki, Gülər Əhmədova günahsız yerə həbsdədir: “İnanırıq ki, zaman özü Gülər xanımın günahsız olduğunu sübut edəcək. İctimaiyyət də məhkəmədə iştirak edən media işçilərinin vasitəsilə Gülər xanıma atılan şər-böhtanların heç bir əsası olmadığını gördü”

Gülər Əhmədova üçün 6000 nəfərin...

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə