“Azərbaycanlı dostlarım zamanı qabaqlayırlar”- Müsahibə

"Bilirik ki, Azərbaycan tolerant ölkə olaraq müxtəlif dini inanclara sahib əhalinin yaşadığı bir məkandır. Məncə, bu layihə həm məscidlərdə, həm kilsələrdə, həm də sinaqoqlarda “gizlənən” tarixi üzə çıxaracaq".

Strategiya.az xəbər verir ki, bunu Azərbaycan Prezidentinin yanında Bilik Fondunun əməkdaşına Tbilisi Dövlət Universitetinin professoru David Qotseridze deyib. 

Tbilisi Dövlət Universitetinin professoru, filologiya elmləri doktoru David Qotseridze Azərbaycana çoxdan bağlıdır. Uzun illərdir ki, onun Bakı Slavyan Universiteti ilə dostluq əlaqələri var. Universitetin tədbirlərində  istər fəxri qonaq, istərsə də məruzəçi kimi iştirak edib, auditoriyalarda ustad dərsləri aparıb.

Bu gün professor yenə Bakıdadır, bu dəfə Azərbaycan Prezidentinin yanında Bilik Fondunun qonağıdır. Fondun Himayəçilər Şurası üzvlərinin əməkdaşlarla növbəti  görüş-treninqində David Qotseridze dəiştirak edirdi. Tədbirdən sonra Tbilisi Dövlət Universitetinin professoru ilə söhbətləşdik.

-          Professor, həm Azərbaycana, həm də fondumuza xoş gəlmisiniz. Azərbaycanda çox olmusunuz, amma  Bilik Fonduna həm ilk gəlişinizdir, həm də, ümumiyyətlə Bilik Fondunun ilk xarici qonağısınız. Təəssüratlarınız çox maraqlıdır.

 -          Əvvəlcə Azərbaycan barədə təəssüratlarımı deyim. Azərbaycanda son illər elmlə, biliklə, mədəniyyətlə, tarixlə bağlı çox işlər görülür və mənə çox xoşdur ki, bəzilərinin özüm şəxsən iştirakçısı, şahidi olmuşam. Ümumiyyətlə, Azərbaycan həm elmi, həm iqtisadi, həm də mədəni sahədə çox irəliləyib. Qatıldığım son iki tədbirə xüsusi diqqət çəkmək istəyirəm, biri dahi şəxsiyyət Heydər Əliyevin doğum gününə həsr edilmiş “Azərbaycanşünaslığın aktual problemləri”mövzusunda beynəlxalq elmi konfrans idi. Çox şadam ki, mən də BSU və AMEA-nın Rəyasət Heyətinin  təşkilatçılığı ilə keçirilən bu elm bayramında iştirak etmişəm. Digər maraqlı hadisə  Azərbaycan Prezidentinin yanında Bilik Fondunun görüş-treninqində iştirak etməyimdir. Burada Bilik Fondunun təsis edilməsi barədə hələ Tbilisidə  ikən müəyyən məlumatım vardı. Gəldim Bakıya, məlumatım daha da genişləndi və düzünü deyim, sizə qibtə elədim. Belə bir fondun yaranması bütün cəmiyyətlərdə təqdir olunmalı hadisədir. İstər bu cəmiyyət yüksək biliyə sahib olsun, istər orda təhsil aşağı səviyyədə olsun,hər iki halda  biliyin prioritet olması vacibdir. Azərbaycan onsuz da elmli, bilikli adamları ilə fəxr edə bilər. Qoy, bu gündən sonra Bilik Fondunun fəaliyyəti ilə də fəxr etsin, çünki bu Fond Azərbaycanda maarifçiliyin daha da yüksəldilməsinə, bilikli insanların cəmiyyətdə çoxluq təşkil etməsinə çalışacaq. Əgər hiss etdinizsə, “çalışacaq” sözünü əminliklə dedim, ona görə ki, bu gün mən  fondun uğurla fəaliyyətə başlamasının şahidiyəm. Yeri gəlmişkən, samovar çayından tutmuş Himayəçilər Şurasının keçirdiyi treninqə qədər hər şeyin bu günün tələb etdiyi səviyyədə olması çox xoşuma gəldi. Əsasən gənc, enerjili, özlərinə və sabaha inamlı kollektiviniz var, şübhəsiz,bu, həm də mənim dostum akademik Kamal Abdullayevin əməyidir. Onun sizə inamının və sizlərin ona, həm də öz dövlətinizə, millətinizə sevginizin təzahürüdür.  

-          Professor, çox vaxt hansısa işləri görməyə zaman bizi yönləndirir,  bizim iradəmizdən asılı olmayaraq, sizcə, bu günün tələbi daha nədir?

 -          Dövrümüzü əsasən informasiya zamanı adlandırırlar. Mənə elə gəlir ki, biz artıq bu dönəmi geridə qoymuşuq. Yaşadığımız dövr əslində informasiyanın biliyə tranformasiya etdiyi zamandır. Yetişməkdə olan nəsil informasiya ilə düzgün rəftarı öyrənməlidir. Söz ki öyrənməyə gəlib çıxır, deməli elə biliklə, maarifçiliklə bağlı yeni addımlar atılmalıdır. Azərbaycanlı dostlarım zamanı qabaqlayırlar. Elə götürək sizin fondun “Dini adidələrdə tarixin izləri” layihəsini. Bilirik ki, Azərbaycan tolerant ölkə olaraq müxtəlif dini inanclara sahib əhalinin yaşadığı bir məkandır. Məncə, bu layihə həm məscidlərdə, həm kilsələrdə, həm də sinaqoqlarda “gizlənən” tarixi üzə çıxaracaq.

-          Bayaq görüşdə Bilik Fondu ilə Tbilisi Dövlət Universitetinin, şəxsən özünüzün böyük məmnuniyyətlə əməkdaşlıq etmək istədiyinizi dediniz, bunu hansı formada eləmək fikriniz var?

-          İlkin təklifim odur ki, Bilik Fondunun xətti ilə Tbilisidə “Azərbaycanşünaslığın aktual problemləri” mövzusunda elmi konfrans keçirək. Burada Gürcüstanda yaşayan azərbaycanlılar da iştirak etsin, gürcülər də.  Elə Azərbaycanda da Gürcüstanın tarixi, mədəniyyəti ilə bağlı elmi konfranslar keçirmək maraqlı olardı.

 Mən öyrəndim ki, Bilik Fondu Azərbaycanın bölgələrdə yaşayan məktəblilərini qardaşlaşdırmağa xidmət edən layihələr həyata keçirir. Yəni mədəniyyətlərin, biliklərin, adət-ənənələrin mübadiləsi baş verir. Bunu digər xalqlarla da etmək çox maraqlı olardı. Bundan başqa, Bilik Fondunun “Docendo Discimus” layihəsi də mənim diqqətimi cəlb etdi. Alimlərin bölgələrdə, ucqar kənd məktəblərində mühazirələr deməsinin çox səmərəli nəticələr verəcəyinə inanıram. Şəxsən mən də bir alim kimi dəvət olunsam, Azərbaycanın istənilən güşəsində böyük məmnuniyyətlə mühazirə deməyə hazıram.

 -          Çox sağ olun, professor, həm iştirakınıza, həm də müsahibəyə görə.

Sizə uğurlar arzulayırıq, bizim Bilik Fondunun qapıları üzünüzə həmişə açıqdır.