Rusiya Ermənistanı iqtisadi müstəvidə "əzməyə" başladı

Elman Nəsirov: “Rusiya şirkətləri Ermənistanda fəaliyyətlərini dayandırmağa başlaması kimi iqtisadi hadisənin arxasında siyasi motivlər dayanır”Erməni mediası yazır ki, rus şirkətləri Ermənistanda fəaliyyətlərinə son qoymağa hazırlaşır. Məsələn, "Rusiya Dəmir Yolları"  belə bir addım atmağa hazırlaşır. Digərləri də hazırlıq görür.

Qeyd edək ki, Rusiya şirkətləri Ermənistanın onsuz da ağır vəziyyətdə olan iqtisadiyyatında əsas rol oynayır. Belə ki, işğalçi ölkənin iqtisadiyyatının mühüm hissəsi məhz rus şirkətlərinin əlindədir. Amma indi göründüyü kimi, bu şirkətlər də «ölü iqtisadiyyata» malik Ermənistanı tərk etməyə başlayıblar. Buna səbəb nədir və belə vəziyyət Ermənistan üçün nə vəd edir?

Milli Məclisin deputatı, politoloq Elman Nəsirov bildirdi ki, Rusiya şirkətlərinin Ermənistanda fəaliyyətlərini dayandırmağa başlaması kimi iqtisadi hadisənin arxasında siyasi motivlər dayanır: “Həqiqətən də son zamanlar erməni və Rusiya mətbuatında belə yazılar daha intensiv xarakter almağa başlayıb ki, şimal ölkəsi şirkətləri Ermənistanı tərk etməyə başlayır. Bir sıra erməni mətbuatı bu olayı hətta həyəcan təbili kimi təqdim edir. Səbəblərinə gəldikdə isə iqtisadi hadisədə siyasi motivlərin dayandığını önə çəkirlər.

Faktiki olaraq, Ermənistan iqtisadiyyatı Rusiyanın əlindədir. Onda sual yaranır ki, niyə Rusiya öz əlində olan erməni iqtisadiyyatından, buradakı iqtisadi maraqlarından vaz keçmək istəyir. Bunu da artıq Ermənsitana Rusiyanın bir təzyiq elementi kimi qiymətləndirirlər”.

Millət vəkili qeyd etdi ki, Moskva ilə İrəvan arasında yaşanan mürəkkəb vəziyyətin əsasında Putinlə Paşinyan arasında olan ziddiyətli münasibətlər də dayanır: “Belə vəziyyətin Rusiya prezidenti Vladimir Putinlə Ermənistan baş naziri Nikol Paşinyana arasında olan olduqca mürəkkəb münasibətlərdən qaynaqlandığını bildirirlər. Hələ bu günə qədər Putin Paşinyanı baş nazir seçilməsi münasibətilə təbrik etməyib. Lakin Ermənistanın ikinci prezidenti Robert Köçəryanı dəfələrlə ad günü münasibətilə təbrik edib. Eyni zamanda, Putin onu bu yaxınlarda 65 illiyi münasibətilə təbrik edərək, onu “Dostluq” ordeni ilə təltif edib. Bu hadisəyə isə Paşinyana yaxın mətbuat kəskin reaksiya verdi.

Oktyabrın 1-də Avrasiya İqtisadi  Birliyinin İrəvanda keçirilən toplantısında Putin də iştirak etməlidir. Səfəri fonunda istisna deyil ki, Putin həbsxanada olan Köçəryanı da ziyarət etsin. Bu fonda Paşinyana yaxın mətbu orqanlar yazır ki, Putin belə bir addım atsa, onda onun arxasınca həbsxananın qapıları da bağlanacaq. Bu, açıq şəkildə Rusiya üçün bir çağırışdır. Həmin olaya Rusiyada kəskin reaksiya verilib. Rusiya mətbuatında Ermənistan hakimiyyəti əleyhinə müəyyən yazıların getdiyinin şahidiyik.

Paşinyanın ikibaşlı siyasəti, eyni anda iki stulda əyləşmək istəyi, Rusiyanı müttəfiq saysa da, digər tərəfdən komandasını qərbyönümlü siyasətçilərdən təşkil etməsi, “Sorosun uşaqları” deyilən ad altında ABŞ-a yaxın siyasətçiləri yüksək vəzifələrə gətirməsi belə qənaətə gəlməyə əsas verir ki, İrəvanın Moskvanın müttəfiqi olması fikrində qeyri-səmimidir. Əlsində, Paşinyan daha çox Qərbə meyllənir. Bütün bu reallqılar heç şübhəsiz, Rusiyanın Ermənistana məlum münasibətinin yaranmasını şərtləndirməyə bilməzdi. Təkcə dəmir yolu şirkəti oranı tərk etmir, son məlumata görə, Rusiya Ermənsitana satdığı qazın qiymətini də qaldırmağı düşünür.

Qarşıdan qış mövsümü yaxınlaşır, belədə payız-qış mövsümündə Ermənistanın sosial-iqtisadi durumu daha da ağırlaşacaq. Bu, azmış kimi Rusiyanın müəyyən iqtisadi təzyiq rıçaqlarını da işə salması, qazın qiymətini qaldırması, bu kimi hallar birbaşa olaraq Ermənistan iqtisadiyyatına çox ağır zərbə vuracaq».

Həmsöhbətimizin fikrincə, yaranmış bu vəziyyət Paşinyan üçün böyük baş ağrısına səbəb olacaq: “Ermənistanda inqilab eyforiyası artıq bitib. Paşinyanın partiyası olan “Mənim Addımım” Partiyası belə bir çox hallarda parlamentdə antipaşinyan bəyanatları ilə çıxış edir. Paşinyanı küçədən hakimiyyətə gətirən adamlar bundan peşman olduqlarını deməkdən də çəkinmirlər. Bütün bu reallıqlar onu deməyə əsas verir ki, qarşıda Ermənistanı çox mürəkkəb bir dövr gözləyir.  

Bəlkə də, Paşinyanın hakimiyyətdə qalıb-qalmaması məsələsi günün aktual mövzusuna çevrilir. Artıq heç kim üçün şübhə doğurmur ki, Moskva Ermənistana qarşı yeni-yeni təzyiq rıçaqlarını işə salacaq. Belədə qarşıdakı dövrdə Rusiya-Ermənistan münasibətlərində daha ciddi qarşıdurmaların şahidi ola bilərik”.

Rüfət NADİROĞLU