Multikultural dəyərlər  Azərbaycan xalqının  milli sərvətidir

      Ölkəmizdə qarşılıqlı etimada və hörmətə əsaslanan milli-mədəni və etnik-dini münasibətlərin hökm sürməsi xalqımızın milli xüsusiyyətindən irəli gəlir.  Azərbaycanın müstəqillik illərində daha da möhkəmlənib və fərqli mədəniyyətlərin, dinlərin nümayəndələrinə hörmətlə yanaşmaq ənənəsi məhz Ümummilli Lider Heydər Əliyevin müdrik siyasəti sayəsində dövlət siyasətimizin prioritet istiqamətlərindən birinə çevrilib. Çoxmillətli məkan olan  Azərbaycan mədəniyyətlərarası dialoqun bənzərsiz məkanına çevrilərək  bu təcrübənin beynəlxalq aləmdə təbliğinin gücləndirilməsini zəruriləşdirib. Azərbaycan Respublikası Prezidentinin 11 yanvar 2016-cı il tarixli Sərəncamı ilə həmin il “Multikulturalizm ili” elan edilmişdir. Multikulturalizm modeli dedikdə, bir dövlətin sərhədləri daxilində müxtəlif etnomədəni tərəflərin dinc  yanaşı yaşaması və öz mədəni xüsusiyyətlərini, həyat tərzini rəsmən ifadə etmək və qoruyub saxlamaq hüququna malik olması nəzərdə tutulur.  Multikulturalizm dövlət siyasət olmaqla yanaşı, müasir Azərbaycan cəmiyyətində dəyişməz həyat tərzinə çevrilmişdir. Azərbaycanda olan tolerant və multikultural reallığın təkcə azərbaycanlıların deyil, xarici ölkə alimlərini, görkəmli elm xadimlərinin, siyasət nümayəndələrinin, həmçinin tələbələrin gözü ilə dünyaya təqdim edilməsi də müsbət ənənəyə çevrilməkdədir. Multikulturalizm demək olar ki, bütün sahələrdə xüsusən də təhsil sahəsində daim araşdırılır və öyrənilir. Qeyd edilməlidir ki,  Azərbaycan multikulturalizmi fənninin xaricdə və ölkə universitetlərində tədrisi” layihəsi çərçivəsində hazırda dünyanın 10 dan çox, Azərbaycanın isə  30-a qədər ali təhsil ocağında Azərbaycan multikulturalizmi fənni tədris edilir.

     Ölkəmizdə mədəniyyətlərarası dialoqun formalaşmasını şərtləndirən əsas amillərdən  biri də Azərbaycanın  qərarlaşdığı məkanın Şərqlə Qərbin qovuşağında yerləşməsidir.

    Tarixi İpək Yolunun üzərində yerləşən, körpü rolunu oynayan Azərbaycan müxtəlif millətlərin, mədəniyyətlərin və dinlərin daşıyıcılarının sülh, əmin-amanlıq və qarşılıqlı anlaşma şəraitində yaşadığı məkan olub.

    Müasir Azərbaycanın qurucusu, Ulu Öndər Heydər Əliyevin  ikinci dəfə xalqın təkidli tələbi ilə siyasi hakimiyyətə qayıdışından sonra Azərbaycanı nəinki vətəndaş müharibəsindən qurtardı, eyni zamanda ölkəmizdə mövcud olan bütün milli azlıqları vahid azərbaycançılıq ideologiyası ətrafında birləşdirdi. Onun həyata keçirdiyi bu siyasət Prezident İlham Əliyev tərəfindən bu gün uğurla davam etdirilir.

      Azərbaycan Respublikasının  Prezidenti cənab İlham Əliyev öz çıxışlarında dəfələrlə vurğulayıb ki, multikulturalizm Azərbaycanda həyat tərzidir, dövlət siyasətidir və alternativi yoxdur. Bu anlayış multikulturalizmin hakim olduğu bütün dövlətlər üçün xarakterikdir. Bu gün multikulturtal dəyərlərdən imtina edən Avropanın bəzi ölkələrinin hansı problemlərlə üzləşdiyi göz qarşısındadır. 

     Azərbaycan müxtəlif  sivilizasiyaların və mədəniyyətlərin  qovuşduğu məkan olaraq, əsrlər boyu milli-mədəni rəngarənglik mühitinin formalaşdığı, ayrı-ayrı millətlərin nümayəndələrinin sülh, əmin-amanlıq, şəraitində yaşadığı diyar kimi tanınmışdır.

    Azərbaycan dini abidələr ilə zəngin olan diyardır. Bunun əsasas göstəricilərindən biri də Azərbaycan Prezidentinin göstərişi ilə işğaldan azad etdiyimiz torpaqlarımızda hər dinə mənsub olan bütün abidələr öz tarixiliyini qoruyub saxlamaqla təmir olunur. Heydər Əliyev Fondu tərəfindən təmir edilən, dünyanın ən qədim məscidlərindən biri sayılan, 743-cü ildə inşa edilmiş Şamaxı Cümə məscidi, Qafqaz Albaniyasına aid olan bütün digər kilsələr kimi Nic qəsəbəsindəki kilsə və digərləri Azərbaycanın multikultural dəyərləri kimi əsrlər boyu yaşayacaqdır.

    44 günlük Vətən müharibəsində əldə etdiyimiz tarixi zəfər bizi doğma torpaqlarımıza qovuşdurmaqla bərabər milli dəyərlərimizi də bizə qaytardı. Qeyd etmək lazımdır ki, artıq işğaldan azad olunmuş Xudavəng kilsəsi öz sahiblərinə qaytarılıb. Mənfur düşmən illərlə bu kilsəni erməniləşdirmək istəsə də istəyinə nail ola bilmədi.

    Əminliklə demək olar ki, Azərbaycan Prezidentinin “Multikulturalizm ili” ilə bağlı həm ölkəyə, həm də dünyaya ötürdüyü siyasi, mənəvi çağırış öz nəticəsini verdi. Ən ucqar Azərbaycan kəndində də, şəhərində də, məscid, kilsə, sinaqoqlarda da xalqımızın bu dəyəri həyat tərzimizə çevrilmişdir.

Səbinə Muxtarova

BDU-nun Humanitar məsələlər və gənclər siyasəti şöbəsinin mütəxəssisi

.