"Bacım ərindən ayrılandan sonra..."

Bakı Ağır Cinayətlər Məhkəməsində 1996-cı il təvəllüdlü Fərhad Süleyman oğlu Mustafayevin məhkəmə prosesi keçirilir.

Virtualaz.org saytının əldə etdiyi xəbərə görə, prosesə hakim Səbuhi Hüseynov sədrlik edir.

İttihama görə, Fərhad Mustafayev 26 mart, 2014-cü ildə saat 20:30 radələrində yaşadığı Xəzər rayonu, Şağan qəsəbəsindəki evlərinə gələrkən bacısı Raminənin bir müddət əvvəl boşandığı əri ilə birlikdə çıxıb getməsini öyrənərək hiddətlənib. Bundan sonra küçədə ünvansız nalayiq söyüşlər söyməyə başlayıb.

Onun söyüşlərini eşidən digər qonşusu - 1998-ci il təvəllüdlü, yetkinlik yaşına çatmayan Rüstəm Kərimov bundan əsəbiləşib. O, Fərhada zəng vuraraq iradını bildirib və küçəyə çağırıb. Fərhad evdən bıçaq götürərək küçədə onu gözləyən Rüstəm Kərimova yaxınlaşıb. Heç bir səbəb olmadan bıçaqla ona zərbələr endirib. Yaralı qonşuların köməkliyi ilə xəstəxanaya çatdırılıb.

Törətdiyi bu cinayət əməlinə görə Fərhad Mustafayev Cinayət Məcəlləsinin 126.2.4-cü (xuliqanlıq niyyəti ilə qəsdən sağlamlığa ağır zərər vurma) maddəsi ilə ittiham irəli sürülüb.

Təqsirləndirilən şəxs qismində dindirilən Fərhad Mustafayev ona elan olunmuş ittihamla özünü təqsirli bilməyib. O, ifadəsində ailə üzvləri ilə birlikdə Şağan kəndində yaşadığını, orta məktəbin 6-cı sinfindən çıxdığını göstərib: “Bacım hadisədən 6 ay əvvəl həyat yoldaşı Xıdır Eyyubovdan ayrılmışdı. Bundan sonra Xıdırgillə bizim ailə arasında soyuqluq yaranmışdı.

Qonşumuz Rüstəmlə əvvəllər münasibətimiz normal olub. Ədavət və düşmənçiliyimiz olmayıb. Bacım ərindən ayrılandan sonra Rüstəm bir neçə dəfə heç bir səbəb olmadan mənə sataşırdı. Bir-iki dəfə internetdə də mübahisəmiz düşmüşdü. Rüstəmi Xıdır öyrətmişdi. Hadisə baş verən gün valideynlərim Xıdırdan şikayət etmək üçün Xəzər Rayon Polis İdarəsinin 1-ci polis bölməsinə getmişdilər. Mən evdə idim, bacımsa qonşuya getmişdi. Bu vaxt Rüstəm zəng vuraraq məni küçəyə çağırdı. Heç bir səbəb olmadan ailə üzvlərimi, bacımı söydü. Pəncərədən baxanda həyətdə üç nəfərin dayandığını gördüm. Evdən bıçaq götürüb həyətə endim. Bıçağı elə tutdum ki, Rüstəmgil məndən qorxub yaxına gəlməsinlər. Bilirdim ki, Rüstəm Xıdıra görə belə eləyir. Neçə dəfə ona bu məsələyə qarışmamağı məsləhət görmüşdüm.

Birdən gördüm ki, Rüstəm əlindəki parıldayan nazik əşya ilə başıma vurmaq istəyir. Bıçağı sağ əlimə keçirib qarın nahiyəsinə zərbə vurdum. Neçə zərbə vurmağım yadımda qalmayıb. Bıçaq dəyən kimi yerə oturdu. Mənsə evə gedib qapını bağladım. Pəncərədən baxanda Rüstəmin qonşunun maşını ilə xəstəxanaya aparıldığını gördüm. Bir qədər sonra polislər gəldilər”.

Zərərçəkmiş şəxs qismində dindirilən Rüstəm Kərimov ifadəsində 9-cu sinifdə oxuduğunu, sinif yoldaşları və məhəllə uşaqları ilə münasibətinin yaxşı olduğunu göstərib: “Fərhadgil bizimlə qonşuluqda yaşayır. 4-5 il olar ki, bura köçüblər. Təxminən iki ay öncə Fərhad ümumi tanışımız olan Ramalın haqqında xoşagəlməz sözlər danışmışdı. Buna görə ona iradımı bildirmişdim. Bir neçə gün sonrasa Ramalla birlikdə şəkillərini internetdə paylaşmışdı. Mən də öz səhifəmdə Ramalın arxasınca danışmasından sonra şəkil çəkdirməyinin düzgün olmadığını dedim. Aramızdakı yazışmada narazılıq oldu. Amma dalaşmadıq.

Hadisə baş verən gün qonşunun həyətində Osman və Hüseynlə birlikdə qum daşıyırdıq. İşimizi görüb qurtarandan sonra yemək yeyirdik. Birdən Fərhadın və onun keçmiş yeznəsi Xıdırın səsi gəldiyini eşitdik. Küçəyə polis əməkdaşları və qonşular toplaşmışdı. Polislər Xıdırı avtomaşına otuzdurub apardılar. Biz isə mağazaya getdik. Polislər Xıdırı aparandan sonra Fərhad məhlədə ucadan söyüş söyürmüş. Bunu eişidib ona zəng vurub məhlədə söyüş söyməyin yaxşı iş olmadığını başa salmaq istədim. Telefonda məni də söydü. Mən də onu söydüm. Bir azdan həyətə düşüb qaça-qaça mənə tərəf gəldi. Onun əlində bıçaq olduğunu görüncə yumruq-təpik atdım.

Dava zamanı Fərhad bıçaqla məni vurdu. Başım fırlandı, yerə yıxıldım. Fərhad məni vuranda yanımda heç kəs yox idi. Qonşularımız Osmanla Hüseyn mən vurulandan sonra gəldilər.

Mən Xıdıra görə Fərhadın üstünə getməmişəm, bu işə qarışmamışam. Xıdırla bağlı ona heç nə deməmişəm. Hadisə zamanı əlimdə heç bir əşya, dəmir parçası olmayıb”.

Məhkəmə prosesi davam edir.