Xəzərdə Su Pərisi var!? (VİDEO)

Daha bir sual isə Rusiya və rusiyapərəst həmvətənlərimizədir. Rusiyanın “Arqumentı.ru” internet resursu ilk baxışda guya Azərbaycanın qüdrətləndiyini və hətta Rusiya Federasiyasını ötüb keçə bilmək iqtidarında olduğunu dırnaqarası sübut edən bir məqalə dərc edib. Xəzəryanı dövlətlərin Həştərxan sammitinin yekunlarını araşdıran müəllif Sergey Balmasovun qənaətinə görə, Azərbaycan dənizdə fəal silahlanır. Guya bizim hərbi dəniz donanmamız yalnız Rusiya Federasiyasına, o da belə də çox kiçik həcmdə uduzur.

Amma müəllifə görə bu da müvəqqəti ola bilər. Əgər Azərbaycan öz qüvvələrini modernləşdirsə 2016-cı ildə Rusiya Federasiyasının Xəzər Donanmasını da arxada qoyacaq. Müəllif daha bir neçə, mənbəyi şübhə doğuran məlumata əsaslanaraq irəli gedir, qəribə qənaətlərə gəlib çıxır. Mən onlar üzərində dayanmaq niyyətində deyiləm və həm də ona görə ki, məqalənin müəllifinin müraciət etdiyi bütün informasiyaların dəqiqliyinə şübhəm var. Çünki adam hələ bilmir ki, Yavər Camalov Azərbaycanın müdafiə sənayesi naziridir. Müdafiə naziri yox. Azərbaycanın hərbi imkanları və potensiyalı barədə məqalə yazan birisi ən azı nazirimizi tanımalıydı… Sözüm onda deyil. Məni narahat dən bu məqalənin yazılması, Rusiyada yazılması və buradakı incə qısqırtmaq üslubunun hiss olunması idi. Bəlkə də müqayisəm qüsurlu olacaq, amma bu təxminən bir zamanlar Birləşmiş Ştatların İraqda kütləvi qırğın silahlarının olduğunu iddia etməsinə bənzəyir. Olmayan bir şeyi dövlətin ayağına bağlamaq, sonra da bunu inkişaf etdirərək uzaqvuran nəticələrə gedib çıxmaq elə belə olmur. Bu məqalədə yazılanların ilk baxışdan bizim uğurumuza oxşaması isə yerli kütləvi informasiya vasitələrinin bəzilərini çaşdırıb. Dövlətinin gücü ilə qürrələnmək fürsətini qaçırmaq istəməyən həmkarlarımızı, vətəndaşlarımızı başa düşürük… Amma razılaşaq ki, bu məqalə sırf provakasiyadı. Orada Azərbycanla hərbi dəniz əməkdaşlığı etməkdə adları çəkilən dövlətlər də elə belə sadalanmır. Cəmi bir adı xatırladacam. Azərbaycanın silahlandırılmasına İsrail xüsusi maraq göstərir, yazılır. Və bunu yazan da, Azərbaycanda çap edən də yaxşı bilir ki, İran İslam Respublikası da Xəzəryanı dövlətdir və onun İsrailə xüsusi qıcığı var. Və bu məqaləni heç də hamı provakasiya saymır. Hətta saymaq istəmir.

Sizə elə gəlmir ki, Azərbaycan regionun Xəzərdə sualtı donanmaya malik yeganə ölkəsidir - deyə yazan müəllifin sualtı xətti çox uzağa gedir… Əlbəttə biz Azərbaycanın regionun ən qüdrətli dövləti, o cümlədən də su dövləti olmasını arzulayırıq. Prezident İlham Əliyevin müdafiə sənayemizin imkanlarını daha da artırmaq və bu sahədə bütün tələbatımızı ödəmək tapşırığı reallıqdır. Prezidentin Xəzərdə hərbi güclər bərabər olmalıdır, kursu da siyasi hədəflərimizi gizlətmək fikrimizin olmadığından xəbər verir. Amma dövlət ayağımızı dalğalarımıza görə uzadır. Daha Azərbaycanın adına Xəzərin dibində su pərilərin çalışdığı xüsusi laboratoriyalar, bu laboratoriyalarda qanadlı timsahlar buraxdığımızı uydurmaq da lazım deyil. İraq olsun, İraq uzaq deyil. Qulaqların kəsilib sonradan sayıldığı dövrdə yaşayırıq.

Hə, onu demək istəyirəm ki, Azərbaycanın sərhədlərini quruda, suda, havada olduğu kimi kütləvi informasiya vastələrində, televiziyada, radioda, internet resurslarında, yəni bizim fəaliyyət zonamıza daxil olan ərazilərdə də qorumaq lazımdır. Qəsdən və ya bilməzlikdən provakasiyalarda iştirak etmək məsuliyyət məsələmizdir. Yəni ya məsuliyyət daşımalıyıq, ya da bizi bu məsuliyyətə cəlb eləməlidirlər. Başqa yol yoxdur.