Azərbaycan Respublikası Dövlət Bayrağı Gününə həsr olunmuş humanitar aksiya

13:52 / 08.11.2014

Strategiya.az-a verilən məlumata görə, AMEA A.A.Bakıxanov adına Tarix İnstitutu “Azərbaycan Respublikasının Dövlət Bayrağı Günü”nə həsr olunmuş tədbir keçirildi və Bakı Dövlət Universiteti tarix fakültəsinin tələbələrinə dövlətçilik tariximizlə bağlı kitablar hədiyyə edildi

2014-cü il noyabrın 7-də saat 14⁰⁰-da AMEA-nın əsas binasının kiçik akt zalında (H.Cavid pr. 115) AMEA A.A.Bakıxanov adına Tarix İnstitutu “Azərbaycan Respublikasının Dövlət Bayrağı Günü”nə həsr olunmuş tədbir keçirmişdir. Tədbiri giriş sözü ilə institutun direktoru, AMEA-nın müxbir üzvü, Millət vəkili Yaqub Mahmudov açmış, tədbirə qatılan Bakı Dövlət Universiteti tarix fakültəsinin tələbələrini və qonaqları salamlamışdır.

Yaqub Mahmudov öz çıxışında qeyd etdi ki, Azərbaycan Respublikası müstəqilliyini bərpa etdikdən sonra Azərbaycanın Dövlət bayrağı milli suverenliyin simvolu kimi ölkəmizin bütün vətəndaşları üçün müqəddəs dövlətçilik rəmzlərindən birinə çevrilib. Azərbaycan Xalq Cümhuriyyətinin yadigarı olan bu bayraq bizim azadlıq məfkurəsinə, milli-mənəvi dəyərlərə və ümumbəşəri ideallara sadiqliyimizi nümayiş etdirir.

Yaqub müəllim “Azərbaycan Respublikasının Dövlət bayrağı gününün təsis edilməsi haqqında” Azərbaycan Respublika Prezidenti cənab İlham Əliyevin 2009-cu il 17 noyabr tarixli sərəncamının Respublikamızın ictimai-siyasi həyatında, gənc nəslin vətənpərvər ruhda tərbiyə edilməsində əhəmiyyətli rol oynadığını xüsusi vurğuladı. Yaqub Mahmudov Prezident İlham Əliyevin 2007-ci il 17 noyabr tarixli sərəncamı ilə Dövlət Bayraq Meydanının tikintisinə başlanılması və həmin möhtəşəm abidənin 2010-cu il sentyabrın 1-də rəsmi açılışından danışdı. Prezident İlham Əliyevin rəsmi açılış tədbirində söylədiyi fikirləri xatırlatdı: “Dövlət Bayrağı Meydanının açılışı həqiqətən tarixi və unudulmaz bir hadisədir. Bu meydan özlüyündə gözəl bir memarlıq abidəsidir... Burada Azərbaycanın dövlət rəmzləri – gerbi, himninin mətni, xəritəsi təsvir edilibdir. Dövlət Bayrağı Muzeyi də fəaliyyət göstərəcəkdir. Meydanın ortasında isə Azərbaycanın dövlət bayrağı ucalacaqdır. Bu bayraq dünyada ən böyük və ən uca bayraqdır. Bayrağın hündürlüyü 162 metrdir və bu bayraq şəhərimizin hər bir yerindən görsənəcəkdir”.

Yaqub müəllim nadir memarlıq abidəsi olan Azərbaycan Dövlət Bayrağı Meydanının yaradılmasını, milli sərvətimiz olan bayrağımızın burada ucaldılmasını Azərbaycanın gücünü, Azərbaycan xalqının öz dövlətinə sevgisini, dövlət rəmzlərimizə ehtiramının bariz nümunəsi kimi qiymətləndirdi.

Azərbaycan Respublikası Dövlət Bayrağı Gününə həsr olunmuş humanitar aksiya çərçivəsində Bakı Dövlət Universiteti Tarix fakültəsinin əlaçı və yaxşı oxuyan 65 nəfər tələbəsinin hər birinə Tarix İnstitutu Elmi Şurasının qərarı ilə çap olunmuş 65 adda kitab hədiyyə olundu.

Azərbaycan Respublikası Dövlət Bayrağı Gününə həsr olunmuş humanitar aksiya

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə