Sovet kinosunun ulduzu necə kriminal oldu? - FOTO/VİDEO

Kriminal istedadlı aktyor

“Kortik” filmindəki rolundan sonra “Tunc quş” və “İtmiş ekspedisiya” ilə o, sovet kinematoqrafının ulduzuna çevrilir. Amma, təəssüf ki, Sergey Şevkunenkonun “kriminal” ulduzu aktyorluq ulduzundan daha çox parıldayır…

Rəhbər uşaq

Belə insanlar dünyaya göz açandan işıqlı gələcəyi də onlarla birgə doğulur.  Şevkunenkonun  atası insanların yaradıcılığı ilə ad qazanmış jurnalist, yazıçı və “Mosfilm” kinostudiyasının rəhbərlərindən biri idi. Oğlunun dünyaya gəlməsi münasibətilə “Kiçik sırğa” pyesini yazmışdı.

“Kortik”dən sonra məşhur olan Şevkunenko ardınca digər maraqlı filmlərdə rol alır. “İtmiş ekspedisiya” filminin çəkilişləri zamanı o, ilk dəfə sevginin dadına baxır. Amma Yevgeni Simonova öz gələcək əri kimi aktyor Kaydanovskovu seçir.

Səhvlər başlayır…

Sergey 8-ci sinifdən sonra oxumağın daşını atır. Oğlunu polis bölmələrindən yığışdırmaqdan bezən anası onu kinostudiyada çilingərin köməkçisi kimi işləməyə göndərir. Amma elə münaqişələr bundan sonra daha da güclənir, töhmətlər artır. “İtmiş ekspedisiya” filminin davamını çəkməyə hazırlaşan film qrupu qəhrəman Şevkunenkonu istəmədiklərini deyir.

Amma Sergey yenə də diqqət mərkəzində olmaq istəyirdi. Lakin dostları ilə içki içib yoldan keçəni amanzıcasına döyəndən sonra azadlıqdan məhrum edilmişdi. Və beləliklə, həyata 4 il dəmir barmaqlıqlar ardından baxmışdı..

Bir müddət sonra Sergeyin anası yenidən “Mosfilm”in müdiriyyətinə müraciət edir. Ailə dostu aktrisa Zoya Fyodorova oğlana  zamin olur. Şevkunenkonu işıqçı kimi işə götürürlər. Amma sonra qorxunc hadisə baş verir. Zoya Fyodorova öz mənzilində başına açılan atəş nəticəsində öldürülür. Şevkunenkonu yenə də polis bölməsinə çağırırlar. Tədqiqatçılar uzunmüddətli araşdırmalar apararaq yenə də aktyordan şübhələnirlər. Lakin o, qışqıraraq “O, mənim anam kimi idi” deyirdi. Bundan sonra polislər yenə də Sergeyə şübhə ilə yanaşırlar. Lakin Zoyanın qatili bu günə kimi də tapılmayıb.

“Şeytanın oyunu”

Şevkunenkonun dostlarından biri ona deyir: “Bu yaxınlıqda varlı ailə yaşayır”. Bircə cümlə bəs edir ki, onun beynində ssenari fomalaşsın. Macəra filmlərində olduğu kimi borularla dırmaşaraq eyvana çatır və 725 rubl rus pulunu oğurlamağı bacarır.

Xəstəliklər…

Sergey Şevkunenkonun qalan həyatı kiçik fasilələrlə həbsxanalarda keçir. Orada ləqəbi “artist” olur. Aktyor heç vaxt yenidən ayağa qalxmaq üçün çalışmır. Anası bu dəfə də dostlarının köməyi ilə onu yenidən kinostudiyaya qaytarmağa çalışır. Amma hər nə qədər uğurlu aktyor olsa belə, bir gün onun da “qızıl qaşığı” paslanır. “Mosfilm”in müdiri, hətta onu süpürgəçi kimi də işə götürmür.

Növbəti həbs müddətindən azad olanda o, artıq əlil idi. Vərəm xəstəliyi onu tamam əldən salmışdı. Keçmiş aktyoru Moskvaya buraxmırlar və Smolenskə göndəririlər. Orada qaldığı müddətdədə çox ağır vəziyyətdə xəstəxanada yatır. Amma tale yenə də bu insana öz hədiyyəsini göndərir. O, gənc gözəl Yelenayla görüşür və qısa müddətdə evlənirlər. 1989-cu ildə Şevkunenko silah saxladığı üçün yenidən həbs edilir.

Kriminal aləmə giriş

Artıq aktyor Moskvanın cinayətkar elitasına daxil olurdu. Özünə göy “Kadillak” alır. “Mosfilm” ərazisindəki mağazalar ona rüşvət ödəyirdi.

Lakin bədbəxtlik yenə də aktyordan al çəkmir. Bir gün gecə saatlarında qatil onun evinə tərəf yaxınlaşır. Qatil mühafizədən canını qurtarır və bloka girir. Qaranlıqda Sergeyə atəş açır, aktyor tarazlığını itirir və yıxılır. Lakin buna baxmayaraq özünü liftə çatdıraraq evə tələsir. Qatil isə pilləkənlərlə hərəkət edir. Aktyor qaçaraq mənzilə girə bilir, amma açarları qapıda  unudur. Və… qatil artıq mənzildədir. Səs-küyə gələn anası başından 2 güllə yarası alaraq elə yerindəcə ölür.

Uzun müddət taleyi sınamaq olmaz. Lakin Sergey Şevkunenko bəxtini çox yormuşdu, istedadını çox sınağa çəkmişdi.. Sonda reallıqlarla üzləşir.

Anasından sonra elə həmin gün, o mənzilədə bir zamanların parlaq istedadı və indinin kriminal avtoriteti 11 fevral 1995-ci ildə qətlə yetirildi.

Nərgiz Nənə