Deyingən qaynana kürəkəni o qədər bezdirdi ki...

Gəncə Ağır Cinayətlər Məhkəməsində Gəncə şəhər sakini,1987-ci il təvəllüdlü Məsmalıyev Urfan Mobil oğlunun cinayət işi üzrə məhkəmə prosesi keçirilir

Virtualaz.org saytının əldə etdiyi məlumata görə, prosesə hakim Elbəy Allahverdiyev sədrlik edir.

İstintaq yolu ilə müəyyən edilib ki, Urfan Məsmalıyev 2014-cü il, avqust ayının 17-də qaynanası, 1962-ci il təvəllüdlü Paşayeva Mehparə Rəhim qızını yaşadığı mənzilə gəlib.   Qaynanasının onun ailə işlərinə müdaxilə etməsini bəhanə edərək ona bədəninin müxtəlif nahiyələrindən 13 bıçaq zərbəsi endirib. Ağır dərəcəli bədən xəsarətləri alan qadın Gəncə Şəhər Təcili Tibbi Yardım Xəstəxanasına çatdırılıb.  Həkimlərin səyi nəticəsində onun həyatını xilas etmək mümkün olub.

Törətdiyi cinayət əməlinə görə U.Məsmalıyevə qarşı Cinayət Məcəlləsinin 29,120-ci (qəsdən adam öldürməyə cəhd) maddəsi ilə ittiham irəli sürülüb.

Təqsirləndirilən şəxs qismində dindirilən Urfan Məsmalıyev ona elan olunmuş ittihamla özünü təqsirli bilməyib. O, ifadəsində hadisənin baş verməsinin səbəbkarının məhz qaynanası olduğunu göstərib: “Özü hər şeyi bu həddə çatdırdı. Məni o qədər bezdirmişdi ki... Evlənəndən sonra həyat yoldaşımla birgə atamgildə yaşayırdıq. Ər-arvad ikimiz də çörək sexində işləyirdik. Aldığım pulu qəpiyinə kimi arvadıma verirdim. Çox zaman gecə növbəsində də işləyirdim.

Qaynanam ağır xəstə olduğuna görə arvadım tez-tez onun yanında qalırdı. Öz oğlu gəlib baş çəkmirdi. Bizə deyirdi ki, təkəm, gəlin mənim yanımda qalın. Ona görə ailəmi də götürüb qaynanamgilə köçdüm”.

U.Məsmalıyevin ifadəsinə görə, qaynanası ilə ilk gündən ulduzları barışmayıb, birinin sözü digərinin boğazından keçməyib: “Əvvəllər yaxşı qazanırdım. Son vaxtlar o qədər də pulum olmurdu. Həm də axır vaxtlar özüm pul vermirdim. Qaynanamgil bir neçə bankdan kredit götürmüşdülər. Dəqiqəbaşı məndən pul istəyirdilər. Çox zaman müdirdən alıb verirdim, işə piyada gedib-gəlirdim. Pul verməyəndə isə narazılıq yaradır, dava-dalaş salırdı. Yeri gəldi-gəlmədi ağzına gələni danışır, məni təhqir edirdi. Dəfələrlə söymüşdü, evdən qovmuşdu, polisə də şikayət etmişdi. Məcbur olub evdən çıxmışdım. Hətta bir dəfə məni intihar dərəcəsinə çatdırmışdı. İstəyirdim kimsə vurub öldürsün məni, canım bu arvaddan birdəfəlik qurtarsın.

Neçə vaxt idi atamgildə qalırdım. Arvadım isə yenə də anasının yanında qalır, ona qulluq edirdi. Hadisə baş verən gün yoldaşıma zəng vurub onu 24 saylı məktəbin qarşısına çağırdım. O da gəldi. Dedim ki, Lalə, kirayə ev tutmuşam, gəl gedək bir yerdə yaşayaq. Mənə dedi ki, anam icazə vermir. Onun bu sözündən əsəbiləşdim və əlimlə sifətinə sillə vurdum. Laləni orada qoyub birbaşa qaynanamın yanına gəldim. Dedim ki, niyə imkan vermirsən yaşayaq, neyləyim, səni vurum öldürüm ki, birdəfəlik canım qurtarsın.

Əlimi atıb stolun üstündən bıçaq götürdüm. Elə əsəbiləşmişdim ki, neçə zərbə vurmağımı xatırlamıram. Özümü itirmişdim. Evdən çıxanda arvadımla rastlaşdım. Ona “indi get, bəlkə anan icazə verər” dedim və birbaşa Gəncə Şəhər Polis İdarəsinə getdim. Polis əməkdaşlarına cinayət törətdiyimi bildirdim, bıçağı təqdim etdim. Əməlimdən peşmanam. Cəzamı çəkməyə hazıram”.

Şahid qismində dindirilən Lalə Məsmalıyeva ifadəsində həyat yoldaşı Urfanla anası arasında daim mübahisə yarandığını, buna isə ərinin evə normal qazanc gətirməməsinin səbəb olduğunu göstərib: “Anam xəstə olduğuna görə ona baxırdım. Urfan evə gec gəlirdi, pul gətirmirdi. Ona görə də anamla dalaşırdılar. Bir-birlərini başa düşmürdülər. Ən çox pula görə mübahisələri düşürdü. Anamın dediklərini eləmirdi, anam da üstünə gedirdi”.

L.Məsmalıyeva ifadəsində anasının artıq Urfanı bağışladığını, ondan şikayətçi olmadığını deyib: “Hadisə baş verən gün Urfan mobil telefonuma zəng vurdu, məktəbin həyətinə çağırdı, getdim. Kirayə ev tutduğunu dedi, birlikdə yaşamağı təklif etdi. Razılaşmayacağım təqdirdə ya məni, ya özünü, ya da anamı öldürəcəyini deyirdi. Urfana anamın razı olmadığını söylədim. Bunu demişdim ki, qəflətən məni şillə ilə vurdu, huşumu itirdim. Özümə gəlib evimizə yollandım. Qapıda Urfanla üzbəüz gəldim. Mənə “anan icazə verib, indi gələrsən” dedi. Evə girəndə anamın qan içində uzandığının şahidi oldum. Qışqırıb köməyə adam çağırdım. Anamı xəstəxanaya çatdırdıq. Əgər mən həmin gün Urfanla birlikdə getsəydim, bəlkə də bu hadisə olmazdı. Artıq anam da bağışlayıb onu. Deyir, qoy cəzasını Allah versin”.

Məhkəmə prosesi fevralın 23-də davam edəcək.

İnarə Rafiqqızı