Nazarbayevin kürəkəninin ölümü: intihar, yoxsa qətl?

09:31 / 25.02.2015

Rahat Əliyev ömürlük prezident olmaq üçün seçkilərə hazırlaşan Nazarbayevin bir çox sirlərini “Xaç qayınatası” sənədli povestində faş etmişdi, amma bu, onun bildiyi sirlərin hamısı deyildi...

Qazaxıstan prezidenti Nursultan Nazarbayevin keçmiş kürəkəni, Avstriyadakı sabiq səfir, qalmaqallı “Xaç qayınatası” sənədli povestinin müəllifi Rahat Əliyev Vyana həbsxanasında intihar edib. Virtualaz.org saytı Avstriyanın “Kurier” nəşrinə istinadən xəbər verir ki, R.Əliyev öz kamerasında asılmış vəziyyətdə tapılıb. Bu fakt Vyana Məhkəməsindən də təsdiq edilib. R.Əliyevin vəkili onun intiharının inandırıcı olmadığını deyib.

Xəbərdə o da bildirilir ki, R.Əliyevi bugünlərdə təkadamlıq kameraya köçürülübmüş. İntihardan bir gün əvvəl vəkili R.Əliyevlə görüşüb və onunla cinayət işinə dair bir sıra məsələləri müzakirə edibmiş.

Qazaxıstan prezidenti Nursultan Nazarbayevin böyük qızı Dariqa Nazarbayeva ilə evli olmuş Rahat Əliyev 2007-ci ilə qədər Qazaxıstanın Avstriyadakı səfiri olub. O, 2008-ci ildə iki bankirin - Joldas Timraliyev və Aybar Hasenovun qətlində təqsirli bilinirdi. Hər iki bankir 2007-ci ildə müəmmalı şəkildə yoxa çıxmışdı. Onların meyiti 2011-ci ildə tapılmışdı. Qazaxıstan məhkəməsi R.Əliyevi qiyabi olaraq 40 il azadlıqdan məhrum etmişdi. Çünki R.Əliyev 2007-ci ildən bəri xaricdə gizlənirdi. Avstriya sabiq səfiri Qazaxıstana təhvil verməkdən imtina edirdi. Buna səbəb kimi R.Əliyevin ölkəsində ədalətli mühakimə edilməyəcəyi göstərilirdi.

Avstriyanın hüquq-mühafizə orqanları R.Əliyevi 2014-cü il, iyunun 5-də Vyanada həbs etmişdi.

Nazarbayevin böyük qızı Dariqa ilə evli olan R.Əliyev bir vaxtlar Qazaxıstan hakim elitasının ən güclü fiqurlarından hesab olunurdu, ölkənin bütün gəlirli biznes sahələrinə onlar nəzarət edirdilər. Rahat Nazarbayevin varis sayılırdı.

2007-ci il fevralın 9-da ölkənin ən iri banklarından olan “Nurbank”ın səhmdarı Rahat Əliyev bankın sədr müavininin müşaviri Vadim Koşlyakla birlikdə “Nurbank”ın təsərrüfat müdiri Aybar Xasenovu və Joldas Timiraliyevi zorla avtomobilə mindirərək naməlum istiqamətdə aparıb. Bundan sonra Xasenovun və Timiraliyevin izi itib.

Mayın sonunda R. Əliyev bu iki şəxsin oğurlanması üzrə qaldırılan cinayət işində əsas fiquranta çevrilib. Qazaxıstan Baş Prokurorluğu ona qarşı ittiham irəli sürüb. Nazarbayevin bundan sonra ittihamlara tuş gəlməmək üçün öz kürəkənindən üz döndərib. O, bütün postlardan məhrum edilib. Elə həmin gün yeznə Vyanadan elan edib ki, qayınatasına qarşı müxalifətə keçir.

2008-ci ildən başlayaraq Nazarbayevin sirlərini açan Rahat Əliyevə Qazaxıstanda daha bir neçə maddə üzrə ittiham irəli sürülüb. Bura qanunsuz dinləmələr, dövlət sirlərini yaymaq da daxildir. Rahat Əliyev həmçinin qazax telejurnalisti Anastasiya Novikovanın Livanda qətlə yetirilməsini təşkil etməkdə ittiham olunurdu.

1980-ci ildə anadan olmuş Anastasiya Novikova Rahat Əliyevə məxsus KTK kanalında aparıcı işləyirdi. O, həm də Rahat Əliyevin məşuqəsi idi. 2002-ci ildə Rahat Əliyev Qazaxıstanın Avstriyadakı səfiri təyin olunanda qohumu Daniyar Esteyanı da səfirlikdə sürücü kimi işə götürdü. Anastasiya isə Avstriyaya köçüb yerləşmək üçün Estenlə saxta nikaha girdi.

2003-cü ildə Anastasiya formal əri Daniyarla birlikdə Beyruta gedir və orada Rahat Əliyevin livanlı qohumunun evində yaşamağa başlayır. Həmin ilin avqustunda onun Luiza adlı qızı dünyaya gəlir. 2004-cü il iyunun 19-da isə Anastasiyanın cəsədi yaşadığı evin yanında metal hasardan asılı tapılır. Anastasiyanın cəsədi Rahat Əliyevə məxsus hava yolları şirkətinin təyyarəsi ilə Qazaxıstana aparılıb. Qadının cəsədi gizlicə Cənubi-Qazaxıstan vilayətində kənd qəbiristanlığında dəfn olunur. Luizanı isə Daniyar Estenin qohumlarına verirlər. Daniyar yenidən Qazaxıstanın Avstriyadakı səfirliyinə qayıdır və sürücü işləməkdə davam edir. 2005-ci ildə Daniyar da Vyanada müəmmalı avtomobil qəzasında ölür. Onun ölümü də araşdırılmamış qalır.

Anastasiyanın müəmmalı ölümü haqda araşdırma isə ancaq 2008-ci ildə “Nurbankqeyt” qalmaqalından sonra başlayır. Cəsəd eksqumasiya olunur və məlum olur ki, Anastasiyanın bədənində çoxsaylı amansız işgəncə izləri var, bütün sümükləri qırılıb, ölü tapılanda başı keçəl qırxılmış olub. Teleaparıcının qətlinə görə cinayət işi qaldırılır və R.Əliyevə yeni “qətl” ittihamı irəli sürülür. Lakin Avstriya keçmiş kürəkəni təhvil vermir. Maraqlıdır ki, yoxa çıxan bankirlərin çürümüş cəsədi çəlləkdən tapılanda onların da başının keçəl qırxıldığı məlum olmuşdu. Qazaxıstan prokurorluğu bu detala görə qətlin Rahat Əliyev tərəfindən törədildiyinə bir daha əmin olub. Çünki qurbanları işgəncə verib öldürdükdən sonra başlarını keçəl qırxmaq onun dəst-xətti idi.

Dariqadan boşanandan sonra Rahat Əliyev Elnara Şorazova ilə evlənib və bu nikahdan bir oğlu var. Keçmiş kürəkən ikinci nikahdan sonra təzə arvadının familiyasını götürüb və Rahat Şoraz ad-soyadı ilə yaşayıb.

Rəsmi Almatanın bu müəmmalı intiharda əlinin olub-olmaması qaranlıq qalır. Amma aydındır ki, yaxınlarda ömürlük prezident olmaq üçün seçkilərə hazırlaşan Qazaxıstan prezidenti Nursultan Nazarbayevin bir çox sirlərini Rahat Əliyev daha yaxşı bilirdi. O, Qazaxıstanın hakim ailəsində baş verənləri “Xaç qayınatası” sənədli povestində yazmışdı. Amma bu, təbii ki, R.Əliyevin bildiyi sirlərin hamısı deyildi. Onun varlığı isə daima Nazarbayevləri rahat buraxmırdı... /musavat.com/

Nazarbayevin kürəkəninin ölümü: intihar, yoxsa qətl?

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə