Bu barədə Türkiyə Silahlı Qüvvələrinin Baş Qərargahından açıqlama verilib.
“Qəzaya məruz qalan təyyarəmiz Azərbaycanla Türkiyə arasında həyata keçirilən müştərək təlimə görə yox, başqa bir təlim uçuşu ilə əlaqədar olaraq bölgədə vəzifəsini yerinə yetirirdi” - deyə Baş Qərargahın mətbuat və ictimaiyyətlə əlaqələr idarəsindən APA tərəfindən göndərilmiş sorğuya verilən cavabda bildirilir.
Qeyd edək ki, Türkiyə Hərbi-Hava qüvvələrinin bu gün Əskişəhərdən havaya qalxan təyyarəsi Konya yaxınlığında qəzaya uğrayıb, nəticədə 2 pilot şəhid olub.
Hazırda Konyada Türkiyə və Azərbaycan Hərbi-Hava Qüvvələrinin müştərək “TurAz Şahini 2015” təlimi də keçirilir.
* * *12:57
Son məlumatlara görə, qəzaya uğrayan təyyarə F-4E bombardmançı təyyarəsidir. Türkiyə Hərbi-Hava Qüvvələrinə məxsusdur. Çünki Azərbaycan HHQ-nin sərəncamında bu tipli təyyarə yoxdur. O da xəbər verilir ki, hər iki pilot şəhid olub.
Türkiyə Silahlı Qüvvələrinin Baş Qərargahından yayılan rəsmi açıqlamada deyilir ki, 112-ci hava donanmasına aid F-4E 2020 təyyarəsi saat 09:50-də (Bakı vaxtı ilə saat 11:50) hələlik məlum olmayan səbəblərdən qəzaya uğrayıb, hər iki pilot şəhid olub.
Xatırladaq ki, fevralın 24-də Türkiyə HHQ-nin iki qırıcısı təlim zamanı havada toqquşub, 4 pilot həlak olub.
* * *12:47
Bu gün Türkiyənin Konya bölgəsində Türkiyə və Azərbaycan Hərbi-Hava Qüvvələrinin “TURAZ şahini 2015” təlimləri zamanı bir hərbi təyyarə qəzaya uğrayıb.
Virtualaz.org saytı Türkiyə KİV-lərinə istinadən xəbər verir ki, yerli vaxtla saat 09:50 radələrində Konya-Aksaray şosse yolunun 22-ci kilometrliyində, Ortakonak qəsəbəsi yaxınlığında bir təlim təyyarəsinin qəzaya uğradığı barədə anons verilib. İlkin məlumatlara görə, pilotlardan biri katapultasiya edərək xilas olub, digər pilotdan xəbər yoxdur. Konya valisi Muammer Erol pilotlardan birinin xilas olduğunu, digərinin axtarışının davam etdiyini deyib.
Qəzaya uğrayan təyyarənin hansı ölkənin hava qüvvələrinə aid olduğu hələ açıqlanmayıb. Azərbaycan Müdafiə Nazirliyinin mətbuat xidmətinin rəhbəri Vaqif Dərgahlı virtualaz.org-a açıqlamasında bildirib ki, təlimlərdə iştirak edən Azərbaycan təyyarələri və heyət üzvləri sağ-salamatdır və təlimləri davam etdirir.
