QLADİATORLARIN SAVAŞI

Daha üç azərbaycanlı Suriya döyüşlərində həyatını itirib.Milli mediamızın bu günkü xəbəri onsuz da hərbi gərginlik yaşayan və ölümə öyrəşmiş bir cəmiyyətin halında heç bir dəyişiklik yaratmadı.Başqa cür də ola bilməzdi.Dünyada insan itkisinin qiymətsizləşdiyi bir zamanda kütləvi etirazlar,qətnamə və qərarlar belə ölüm konveyerini dayandırmaq gücündə deyil.

Min bir gecə nağıllarının başdumanlandırıcı əyləncələrini indi ərəb yuxularının vəhşəti əvəz edib.Üç ili tamam olan Qum döyüşlərininin ölüm maşınından keçən dünya döyüşçülərinin tərkibi kifayət qədər zəngindir.Hər gün yüksək ideallarla cəhənnəmə gələnlərin sıraları genişlənməkdə davam edir.Suriyanın ali müftisi təkcə müxalif qruplaşmalar tərəfindən yüz mindən artıq xarici legionerin vuruşduğunu söyləyərkən onu rejimin sözçüsü sayıb təkzib etməyə heç kəs ehtiyac duymur.Çünki reallıq həqiqətən belədir.Onlardan təxminən 8 min nəfərini Səudiyyə ərəblərin ölüm batalyonları təşkil edir.Müqəddəs peyğəmbərimizin fanatik inanc daşıyıcıları bu torpaqda azlığı təşkil edən-14 faizlik ələvi hakimiyyətinə və Bəşər Əsədin tiraniyasına qarşı din bayrağı altında vuruşurlar.Min illərlə davam edən məzhəb davasının və islam bölücülüyünün unikal bir poliqonu yaranıb.İordaniya kralının yetirmələri səudları döyüş meydanında yalnız qoymayıblar.Onların sayı 2 minə çatır.Lakin itkilər də məhz onların sırasında yetərli saydadır.

Keçmiş sovet məkanı da dünya ordusuna təxminən 5 minə qədər yaraqlı verib.Dudayevdən sonra başsız qalan çeçen mücahidləri indi öz azadlıq ideallarını xilafət quruculuğu sevdası ilə Suriya torpaqlarına daşıyıblar. Sayları 1700 nəfəri keçməsinə baxmayaraq hər gün Qroznıdan Türkiyəyə-təlim məşq düşərgələrinə gələnlərin ardı-arası kəsilmir. Düzdür,tanınmış amerikalı politoloq Pol Qobl bu rəqəmləri Kremlin Şimali Qafqaz isteriyası hesab edərək Putinin dünyanın gözünə kül üfürdüyünü, niyyətinin terrorçu obrazlı müsəlmanları ram etmək üçün öz diktaturasına haqq qazandırmaq istədiyini yazsa da,lakin acı fakt bundan ibarətdir ki,informasiya məkanına daşınan video görüntülər həqiqətin nə yerdə olduğunu ortaya qoyur.Əsil youtube müharibəsində hər gün yüzlərlə həlak olan meyidlərin arasında zahiri simasını itirsə də çeçenliyini saxlamış xeyli muzdlunun cəsədini gizlətmək mümkün deyil.Onları azadlığa qovuşmağa qoymayan rus ordusunun genosidə uğratdığı bir millətin yeni nəsli indi Yaxın Şərqin səhralarında təzə dini hakimiyyət xülyasının ucuz nökərlərinə çevriliblər.

Elə buradaca vurğulayaq ki,Qatardan Tunisə,Türkmənistandan İraka qədər uzanan din qardaşlığnın onların tərk etdikləri ölkələr üçün çoxlu ziyanları fonunda bir faydası danılmazdır.Həmin qatı ideolojili radikal qruplar sanki bu yolla təhlükəli və ram edilməz bir dəstə kimi başqa ərazilərə öz inqilabi ssenarilərini aparıb gedirlər və müxtəlif rejimlər onlardan azad olur.Guya Putin istəmir ki,təbii seleksiya yolu ilə çeçenlərin içindən belə fədailəri seçib gedər-gəlməzə göndərsin?Onun planladığı zatən elə budur.

Lakin “müqəddəs savaş”da İranın açıq himayə etdiyi Hizbullahın və nizami Əsəd ordusunun qarşısında vuruşan üsyançı könüllülərin tərkibi təkcə yaşıl bayrağın işığına toplaşanlar deyil.Ukraynadan 400,Gürcüstandan 100-dək,Kanada,Avstriya,Danimarka və digər xristian ölkələrindən birlikdə mindən çox silahlı Suriya dramının qanlı səhnələrinə şahidlik edir.

Azərbaycanlılar üçün nəsimicəsinə soyulmaq və Hələb torpaqlarında ölməz hürufi şairin ruhuna ithaf olunan davaya qatılmağın özəl bir mənası var. Birinci Qarabağ savaşını uduzan ölkənin vətəndaşı hər addımda məğlubiyyət sindromundan əziyyət çəkir.Üstəlik,burada müharibəyə dini rəng vermək də səhra komandirlərimizin ağlına gəlməyib.Elə qonşu İranın Suriyaya qoyduğu canın və xərçlədiyi milyonların ən kiçik hissəsi Azərbaycana yönəlsəydi, şübhəsiz ki,indiki işğal reallğını fərqli bir mənzərə əvəz edərdi.Təkcə bu fakt islam mücahidlərini dövlətlərin siyasi marağına necə alət edildiyini ortaya qoyan mühüm bir faktdır.Ona görə Suriyanın qanlı və qaynar hərb meydanlarında üz-üzə gələn qardaş azərbaycanlılar üçün həqiqi məqsəd bəlkə də heç yoxdur.Önəmlisi vuruşmaq,öldürmək, özünü güclü saymaq,nəyə qadir olduğunu sübuta yetirməkdir.

Kisəmizdən getdiklərinin fərqindəyik.O insanlara cənnətin harada olduğunu göstərə bilməmişik.Təkcə ona görə yox ki,fərqli mənəvi qalalar yaradarq onları düşdükləri sekta və zonbi təlimlərin cəngindən almaqda acizlik göstərmişik,xeyr,həm də ona görə ki,daha sivil Vətən amallarına bağlılıq həm də gerçək paraların və böyük qazancların üzərindən aparıldığını unutmuşuq.Bir aylıq döyüşlə ailəsini sosial rifahın ən yüksək mərtəbəsinə qovuşdurmağa bəslənən ümidlər isə Türkiyə sərhəddini keçən kimi puça çıxır.

Ölüm eskadronu tarixin təkəri ilə eyni sürətlə fırlanır.Suriyadakı itkilərin son statistik qışqırtısı 210 min nəfəri keçib.Lakin qladiatorların savaşı davam edir.Cəhənnəmə gedən yolun hələ ki, son müvəqqəti dayanacağı bura-Suriya!

Milli Məclisin deputatı,
Zahid Oruc