"Baxın, ay jurnalistlər, sizə dedim ki, məndən çox yazın"

09:53 / 07.02.2014

Sabiq deputat Gültəkin Hacıbəylini hədəfə aldı

Sabiq deputat Milli Şuraya etiraz etdi

Fevralın 6-da Bakı Apelyasiya Məhkəməsində həbsdə olan sabiq deputat Gülər Əhmədovanın şikayəti əsasında məhkəmə iclası oldu.

Hakim İlqar Murquzovun sədrliyi ilə keçirilən prosesə gətirilən təqsirləndirilən Gülər Əhmədova şüşə kabinəyə salındı.

Zala daxil olub şüşə kabinəni görən sabiq deputat özünü gülməkdən saxlaya bilmədi. Kabinəyə salınan kimi zalda iştirak edən jurnalistlərə, həyat yoldaşına baxaraq “bu nədi belə” deyə sual etdi.

Hakimə müraciətində isə G.Əhmədova ironiya ilə soruşdu ki, ötən prosesdə vəkilinin yanında əyləşmək xahişi etdiyi halda indi onu şüşə kabinəyə salıblar: “Bunun xüsusi səbəbi varmı?”

Hakim bu suala daha sonra aydınlıq gətirəcəyini desə də, sonra bu barədə danışmadı.

Vəkil Əfsər Talıbov ilkin baxış iclasının qərarından kasasiya şikayəti verildiyi üçün prosesin qeyri-müəyyən vaxtadək təxirə salınmasını təklif etdi. Hakim və dövlət ittihamçısı buna etiraz etmədiyi üçün proses qeyri-müəyyən vaxtadək təxirə salındı.

Ötən proses zamanı G. Əhmədovanın vəkili Əfsər Talıbov məhkəmənin istintaqla aparılması və digər bir neçə vəsatət verib. Lakin vəsatətlər təmin edilməyib. Bunun üçün prosesin ilkin baxış iclasının qərarından Ali Məhkəməyə kasasiya şikayəti ilə müraciət olunub.

Məhkəmə cəmi 2 dəqiqə davam etdi. G.Əhmədova isə məhkəmə zalını tərk edərkən jurnalistlərə sözü olduğunu dedi. Öncə “Yeni Müsavat”ın prosesdə iştirak edən əməkdaşını Parlament Jurnalistlər Birliyinin keçirdiyi sorğu nəticəsində “İlin jurnalisti” seçilməsi münasibətilə təbrik edən G.Əhmədova kinayəsindən də geri qalmadı. Üzünü əməkdaşımıza tutaraq belə dedi: “Nə istəyirsən, səni ilin jurnalisti elədim? Məndən o qədər yazdın ki, axırda mükafat aldın. Baxın, ay jurnalistlər, sizə dedim ki, məndən çox yazın. Görürsüz, məndən yazan ilin jurnalisti olur”.

Əməkdaşımız isə G.Əhmədovaya bundan öncə də dəfələrlə mükafat, ad aldığını və bunun heç birinin sabiq deputatla bağlı yazdığı yazılarla əlaqədar olmadığını xatırlatdı. Sabiq deputatın “səni təbrik edirəm” sözləri ilə bu mövzu yekunlaşdı.

Daha sonra G.Əhmədova üzünü jurnalistlərə tutaraq bir narazılığını da bildirdi: “Mən Milli Şura üzvlərini məhkəməyə dəvət etmişdim ki, gəlib izləsinlər. Burada baş verənləri görsünlər, sonra yazsınlar. Amma gəlmədilər. Mən onları bir daha dəvət edirəm. Əqidəsini saxlayan adamlar həm iqtidarda qiymətli olur, həm müxalifətdə. Mən bilirəm ki, o məktubun müəllifi kimdir. Gültəkin Hacıyevadan söhbət gedirsə, o bilməlidir ki, tutulmağa qalsa, bəlkə də elə tutulmalı adam o idi. Mənə qarşı nə bir şahid ifadəsi, nə zərərçəkmiş, nə bir sübut var. Üzümə duran da yoxdur. Ona görə deyirəm ki, ona qarşı həddən artıq humanist, mənə qarşı sərt davranıblar. Milli Şuraya isə təəssüf edirəm. Bir qadınla digərini müqayisə edirlər”.

Bu sözləri dedikdən sonra G.Əhmədovanı məhkəmə zalından çıxardılar. Daha sonra vəkili aydınlaşdırdı ki, sabiq deputatın etirazına səbəb olan məqam Milli Şura tərəfindən daha öncə media orqanlarından birində yazılan məqalədir. Həmin məqalədə bir abzas da Gültəkin Hacıbəyliyə həsr olunub. Yazıda bildirilib ki, hakimiyyət G.Əhmədovaya qarşı daha loyal davranıb, sonuncu 1 milyonluq dələduzluq etdiyi halda cəmi 3 il azadlıqdan məhrum edilib və əmlakına həbs qoyulmayıb. G.Hacıbəylinin əmlakına isə həbs qoyulub və sair. Vəkili və ailəsi hesab edir ki, bu müqayisə uğursuzdur və sabiq deputat bu səbəbdən ona reaksiya verib. /musavat.com/

"Baxın, ay jurnalistlər, sizə dedim ki, məndən çox yazın"

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə