PUTİNİN ZİREHLİ OLİMPİYA ÇƏKMƏLƏRİ

Tarix təkrar olunur.Qafqazın yeni fəthi 21-ci əsrin rus çarı Putinin ifasında uğurla reallığa çevrilir.”Səlib yürüşü”nü bu dəfə ənənəvi metodlarla aparmağa ehtiyac qalmadı.Son iki yüz ildə barıt qoxusu kəsilməyən bir məkanın səmasında indi Olimpiya məşəli və simvolu bərq vurur,Rusiyanın əzəmətli himni və bayrağı dünyaya meydan oxuyur.Keçmiş imperiya sələflərindən qalan tanklar və topların erası daha bitdimi?Sual bu dəfə ritorik deyil.

1861-ci ildə rus-türk müharibəsindən sonra hökmdar 2-ci Aleksandr Soçinin daxil olduğu Qərbi Qafqaz əhalisinin məskunluğuna dair xüsusi fərman verir.Sənəd Osmanlı xanədanının hakmiyyəti altına sığınan məğrur dağlıların və çərkəzlərin tamamilə ram edilməsi,müqavimət göstərənlərin məhvi və bölgənin rus nüfuzuna qaytarılması üçün tədbirləri özündə ehtiva edirdi.Kazak ataman dəstələri minlərlə qadın,uşaq və ahılı qılıncdan keçirərək,tabe olmayanları amansızlıqla qətlə yetirərək çarın qərarını təmin edir.

Tarixçi alim İ.Drozdov arxiv materialları ilə sübut edir ki,silahsız kütlələrin təxminən yarısı-yüz minə qədəri qarlı və şaxtalı təbiətin əsirinə çevrilərək qaçqınlıq yolunda həyatlarını itirdilər.İndi Soçinin əzəmətli dağ və yamaclarında əski babalarının və ruslarla vuruşlarda öldürülmüş insanların cəsədləri üzərində elə həmin osmanlıların yeni nəsli Putinin planında mühüm yer tuturlar.Türk inşaat kompaniyaları hərbçi keçmişini və əskər kimi döyüşərək torpaqları fəth etmək tarixini bir kənara qoyaraq Kremlin ayırdığı 51 milyard dollarlıq bahalı layihələri qazanmaq yolunda özlərini fəda edbilər.Nə etməli,müasir dövrün müharibəsi elə budur.

Xəstə Yeltsinin öz gününə saldığı bir məmləkəti 2000-ci ildə ondan təhvil alanda yeni rus prezidentinin heç ağlına da gəlməzdi ki,cəmi 7 il sonra O,Avropanı inandıraraq əsrin növbəti uğurlu layihəsini onda qanlı döyüş apardğı Qafqazlara gətirə biləcək.Ən azı on ilini çeçen mücahidlərinin azadlıq mübarizəsini və islamçı-millətçi birlik ideallarını yerlə-yeksan etməyə xərcləyən rus Hökuməti indi buranı dünyanın üzünə yeni mənəzərədə açır.Etiraf etməliyik ki,çox ağılla qurulmuş ssenaridir.Əsil Qərb texnologiyası sayıla bilər.Demirdiniz düşməni qeyri-hərbi vasitələrlə ram edin-elə isə buyurun.

Soçinin dağ yamaclarında qurulan əzəmətli idman kompleksləri regionun minillik tarixində yeni hadisədir.Hətta Stalinin bir günlük istirahət guşəsini qoruyub saxlayan çərkəzlər keçmiş Sovet rəhbərinin ruhunu yad edərkən ondan miras qalmış dağıntıları və uzcuz-bucaqsız Vətən çöllərinin yararsızlığını Rusiyanın hazırkı başçısının qurucu əlləri ilə abad etdilər.Qoy bütün dünya bunu görsün-ruslar təkcə dağıtmır,həm də qurur,yaradırlar.Çox da bu millətin sifətinə təbəssüm yazılmayıb,lakin faşizm təhlükəsinə son qoyaraq dünyanı Hitlerizmdən xilas edən bir xalq Qafqaza indi Putinin zirehli xizəkləri ilə gəlir.Rus tanklarının tırtıllarının səsinə və bronemaşınların uğultasına etiraz edənlərin buna sözü nə ola bilər? 

Daha rus prezident qafqazlılarla savaşmayacaq? Bunu indi demək çətindir.Lakin Dudayevin mənəvi varislərini dağ-kurort əyləncələrində özgürlükdən və fanatik savaş ideologiyasından tamam uzaqlaşdırıb adi vətəndaşlara,sülhpərvər və islah kütləyə çevrimək imkanları şübhəsiz ki,birə-beş qat artıb.Daha dağlarda sığınacaq tapanların və islamçı yaraqlılar adı ilə izlənilənlərin alternativi sadəcə təbəəliyə sürüklənən məğlub çeçenlər deyil,həm də büdcənin çəkili hissəsini sərf edən yeni Qərbi Qafqazda özünə iş tapan,çalışan müasir insanlardır.

Bəli,O,bunu bacardı.Putin üzərinə gələn dünyəvi ideoloqları,casus və terror şəbəkələrini,daxili düşmənləri,informasiya manipulyatorlarını və texnoloqlarını yenə bildi. Dünyada heç bir idman turniri bu qədər siyasiləşməmişdi.Rəhbərlik etdiyi sistemin təftişi fonunda bir tərəfdən qanlı Yaxın Şərq cəbhəsində vuruşan rus lideri,o biri yandan olimpiya boykotçularının ağır zərbələrini dəf etməli oldu.Görün onun qarşısına nə ilə çıxmışdılar-cinsi azlıqların diskriminasiyası,

korrupsiya və insan haqları problemi.Məgər QEYrət damarı tutanlar ötən əsrin 80-cı illərində Sovet İttifaqına qarşı məlum kampaniyanın uğrusuzluğundan nəticə çıxarmamışdılar?Axı onda da dünyanın hər yerindən idmançıları şər imperiyasına getməkdən çəkinməyə çağırırdılar.Nəticəsi nə oldu?Məhşur Olimpiya ayısı hələ də xəyallarda yaşayır və qalib gəlir.

Ona görə Barak Obamanın,yaxud Anqela Merkelin Soçiyə gəlməməsi nəyi dəyişəcək ki?

İndi Qafqazda sabitlikdir.Heç zaman olmadığı kimi.Həmişə qaynar xəbrlərlə gündəmə gələn region indi dünya informasiya məkanını sülh bayraqları və sevinc atəşəfəşanlıqları ilə bəzəyib.Təkcə yüz min polsi qüvvəsi təhlükəsizliyə cavabdehlik daşıyır.Ordu və xüsusi xidmət rqanlarını da bura əlavə etsəniz,görəcəksiniz ki,Qafqaz heç vaxt bu qədər təhlükəsiz olmayıb. Hətta bu yerdə törənəcək qanlı terror olayları belə hazırki sistemin möhkəmləyiniə zərbə vura bilməz.Çünki onda rəsmi Kremlin təbliğatı təsdiqlənəcək ki,düşmənləri hər yerdə əzmək lazımdır.Əgər Putinin ssenarisi sona qədər uğurla icra olunsa,varlı bir ölkə qapılarını yeni ideyalarla və pullarla gələn dünya milyarderlərinə açmış olacaq.Əsil mədəniyyət ixracı,olimpiada vasitəsilə siyasi kursunun təbliğatı və şəxsi avtoritetinin təntənəsidir.

Kiçik xalqlara böyük qılınc arzulayan Şeyx Şamil babamız indi sağ olsaydı,Soçi Olimpiadasının şərəfli tamaşaçı vestibülündən baxımlı yarışları seyr edirdi.Onun fəlsəfi təlimi məğlub oldu.Şamili Moskvaya aparan çar Aleksandrdan fərqli olaraq Putin əlində məşəl Qafqazı salamlamağa özü gəlib.7 il əvvəl Beynəxalq Olimpiya Komitəsiinin sədrinə vəd verərkən O,deyir:”narahat olmayın,qar olacaq”!Yəni,Allah da onu tərəfində Soçinin havasını müəyyənləşdirir!

İndi siz deyin,yüzlərlə medal qazananlar qalibdir,yoxsa Rusiya prezidenti?Rəmzi pyedestalın 1-ci yerinə çıxan Putin qədim Olimpiya məşəlini başı üzərinə qaldıran əsil rus Prometeyidir!

Milli Məclisin deputatı,
Zahid Oruc