Erməni ictimaiyyətinə informasiya dəstəyi üzrə proqramın baza saytı dağıdılıb

13:05 / 24.06.2015

Erməni hakerlər Ermənistanın uydurmalara əsaslanan istorioqrafiyasını ifşa edən “Saxtakarlıqları ifşa edənlər” kitabının cildlərinin elektron versiyasının yerləşdirildiyi www.nofalsify.com saytına hücum ediblər. Bu barədə “İnterfaks-Azərbaycan” agentliyinə saytın administrasiyasından məlumat verilib.

“Hakerlər saytın məlumat bazasına daxil olmaq üçün bir neçə uğursuz cəhd ediblər. Bundan sonra Avropa serverlərindən kütləvi DDOS-hücum həyata keçirilib ki, bu da saytın dağılmasına səbəb olub. Hazırda profilaktik işlər görülür, sayt yaxın günlərdə yenidən istifadəyə veriləcək”,- deyə administrasiyadan bildirilib.

www.nofalsify.com saytında Fuad Axundovun “Saxtakarlıqları ifşa edənlər” kitabının cildlərinin rus və ingilis dillərində elektron versiyaları yerləşdirilib. Kitabda dünyanın tanınmış alimlərinin, o cümlədən erməni alimlərin ermənilərin tarixi barədə mifləri ifşa edən sitatları və elmi araşdırmaları toplanıb. Sayt “Erməni ictimaiyyətinə informasiya dəstəyi” proqramı çərçivəsində baza rolunu oynayır.

“Əgər qarşı tərəf saytı dağıtmaq üçün haker hücumu kimi qeyri-sivil metod seçibsə, bu, onların əllərində elmi sübutların olmamasından xəbər verir. Ermənilərin dünyaya təqdim etdikləri tarixi mifləri ifşa etməyə yönəlmiş proqramımızın qarşısını hər yolla almaq cəhdlərinə məhz bu aspektdən baxmaq lazımdır”,- deyə Prezident Administrasiyasının sektor müdiri Fuad Axundov saytın dağıdılması ilə bağlı fikir bildirib.

“Bizim yaratdığımız www.nofalsify.com saytı fəaliyyət göstərdiyi qısa müddət ərzində populyarlıq qazandı və erməni ictimaiyyətinin regionun tarixi haqqında elmi faktlarla məlumatlandırılması işində səmərəli rol oynadı. Saytın hakerlər tərəfindən dağıdılması cəhdləri bütün yollara əl atmaqla erməni ictimaiyyətinin dünya istorioqrafiyasından təcrid edilməsi siyasətinin davamıdır”,- deyə F.Axundov “İnterfaks-Azərbaycan” agentliyinə bildirib.

“Maraqlıdır ki, hakerlərin əsas hücumu saytda yerləşdirilmiş “Saxtakarlıqları ifşa edənlər” kitabının bir hissəsinə yönəlib. Həmin hissədə ABŞ və Avropa ölkələrində yaşayan və Ermənistanda “xalq düşməni” elan edilən erməni əsilli alimlərin dünya istorioqrafiyasında ermənilərin “tarixi araşdırmalarına zidd” faktlar aşkarlaması barədə fikirləri yer alıb.

Bununla da erməni hakerlər virtual kitabın bir hissəsini, eləcə də bu “xalq düşmənlərinin” sitatları verilmiş layihəni iflic ediblər. Göründüyü kimi, erməni ictimaiyyətinin nümayəndələri bu faktlara ciddi maraq göstərməyə başlayıblar və erməni saxtakarlıqlarının ideoloqları nəyin bahasına olursa olsun onların gerçək məlumatlara çıxışının qarşısını almağı qərara alıblar”,- deyə o bildirib.

“Ermənistan tərəfinin qeyri-sivil yollarla erməni ictimaiyyətini tabu qoyulmuş dünya istorioqrafiyası faktlarından məhrumetmə cəhdlərinə baxmayaraq, biz bundan sonra da erməni ictimaiyyətinə informasiya dəstəyinin göstərilməsi istiqamətində işimizi davam etdirəcəyik. Bu iş çərçivəsində həm sayt bərpa ediləcək, həm də “Ermənistan və Azərbaycanın alternativ tarixi” çoxseriyalı sənədli filminin çəkilişləri başa çatacaq. Filmin ikinci hissəsinin çəkilişləri artıq başa çatmaq üzrədir. Həmçinin yeni informasiya layihələri həyata keçiriləcək ki, bu da Ermənistanın bəzi dairələrinin xoşuna gəlməyəcək. Bu isə o deməkdir ki, bu layihələr də qeyri-sivil hücumların hədəfinə çevriləcək”, - deyə F.Axundov qeyd edib.

Erməni ictimaiyyətinə informasiya dəstəyi üzrə proqramın baza saytı dağıdılıb

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə