Artıq zaman yetişdi - Evlənənlər hansı həkimlərdən arayış alacaq?

Bu məqsədlə Səhiyyə Nazirliyi nikaha daxil olmaq istəyən şəxslərin tibbi müayinədən keçmə qaydalarına həsr edilmiş geniş kollegiya iclası keçirib.

Səhiyyə məssisələri və onların vəzifələri müəyyən edilib

Nikaha daxil olacaq şəxslərin icbari tibbi müayinədən keçirilməsi ilə əlaqədar Səhiyyə Nazirliyi ciddi hazırlıq işləri davam edir. Artıq nikaha daxil olmaq istəyən şəxslərin tibbi müayinəsini həyata keçirəcək səhiyyə müəssisələri və onların vəzifələri müəyyən edilib. Bu tədbirləri regionlarda mərkəzi rayon və ya şəhər xəstəxanaları, şəhər səhiyyə şöbələrinin əvvəldən müəyyən etdiyi tibb müəssisələri, Bakı şəhərində hər inzibati rayon üzrə təyin olunmuş poliklinikalar, həmçinin  Eyvazov adına Elmi Tədqiqat Hematologiya və Transfuziologiya İnstitutu (ETHTİ), Mərkəzi Qan Bankı və onun şəhər (rayon) bölmələri, Respublika Perinatal Mərkəzi həyata keçirəcək.

Qan xidməti avtomobilləri istifadəyə verilib

Artıq proqrama cəlb olunan bütün rayon və şəhər səhiyyə müəssisələrinin yerlərdə skrininq aparılması üçün hematoloji analizator, reaktivlər və müvafiq ləvazimatlarla təmin olunub. Qan nümunələrinin Bakıya çatdırılması üçün xüsusi qan xidməti avtomobilləri ayrılıb və onların marşrutları müəyyən edilib. Eyvazov adına Elmi Tədqiqat Hematologiya və Transfuziologiya İnstitutunda Talassemiyanın profilaktikası şöbəsi yaradılıb. Şöbə, talassemiyanın təsdiqedici müayinəsini həyata keçirəcək kadrlar və müasir standartlara uyğun lazımi laborator avadanlıqla təmin olunub.

Nikaha girən şəxslərə İİV və QİCS müayinəsi

Səhiyyə Nazirliyinin 77 nömrəli əmrinə əsasən, mərkəzi rayon xəstəxanaları və şəhər səhiyyə idarələrinin müəyyən olunmuş tibb müəssisələrində hematoloji kabinetlər yaradılıb. Həmin hematoloji kabinetlər təhkim edilmiş ərazidə nikaha daxil olmaq istəyən şəxslərin qan nümunələrinin alınmasını, nişanlanmasını, qeydiyyatdan keçirilməsini və talassemiyanın daşıyıcılığı üzrə skrininq müayinələrinin aparılmasını təşkil etməsi nəzərdə tutulub. Bundan başqa, skrininq zamanı talassemiya daşıyıcılığına şübhəli şəxslərin qan nümunələrini, eləcə də İİV/QİÇS və sifilis müayinələrinin aparılması üçün qan nümunələrinin müəyyən edilmiş temperatur rejimində saxlanmasını və xüsusi termokonteynerlərdə ETHTİ-na göndərilməsini təmin etməlidir. Nikaha daxil olmaq istəyən şəxslərə müayinənin nəticələri ilə bağlı tibbi-genetik məsləhət və Nazirlər Kabinetinin qərarı ilə təsdiq edilmiş formada arayış verilməlidir.

Artıq hamilə qadınlardan döl materialı alınacaq

Səhiyyə Nazirliyinin “Tibb” qəzetində yazılan məlumata görə, əsas vəzifə perinatal diaqnostikanın aparılması üçün risk qrupundan olan hamilə qadınlardan hamiləliyin 1-ci trimestrində döl materialının alınmasıdır. Bunun üçün mərkəzin 2 mütəxəssisinin Türkiyədə 2 ay müddətində tam hazırlıq keçirilib.

Səhiyyə Nazirliyinin Respublikada talassemiya xəstəliyi ilə bağlı statistikası

Səhiyyə Nazirliyinin açıqladığı statistikaya görə, son illər talassemiya xəstəliyindən əlillik və ölüm halları azalıb. Məlumata görə hazırda Respublika Talassemiya Mərkəzində bu xəstəliyin radikal müalicə üsulu olan sümük iliyinin köçürülməsi əməliyyatları da yerinə yetirilir. Belə ki, ötən il 10 xəstəyə, 2015-ci ilin 5 ayı ərzində isə 7 xəstəyə sümük iliyi transplantasiyası əməliyyatı uğurla aparılıb. Eyni zamanda, prezidentin bu il fevralın 10-da imzaladığı sərəncamla talassemiya ilə mübarizəyə dair 2015-2020-ci illəri əhatə edən yeni Dövlət Proqramını təsdiq edib.

Qeyd edək ki, 2013-2014-cu illərin statistikasına əsasən, ölkədə il ərzində orta hesabla 85-90 min nikah qeydə alınır ki, bu da 170-180 min şəxsin tibbi müayinə olunması deməkdir. Onların təxminən 24 faizi Bakı şəhərinin, qalan 76 faizi isə regionların payına düşür. Beləliklə, bir gündə paytaxtda orta hesabla 50-60, bölgələrdə 180-ə yaxın nikah qeydə alınır, bu isə gün ərzində Bakıda 100-120, regionlarda 360 nəfərin tibbi müayinədən keçirilməsi deməkdir.

Natavan ÇAVUŞ