Ukrayna qan gölünə döndü: 27 ölü - Video + Fotolar

10:07 / 19.02.2014

Ukraynanın paytaxtı Kiyevdə etirazçılarla milis qüvvələri arasında davam edən toqquşmalar zamanı ölənlərin sayı 27-yə çatıb.

Bu barədə APA “UNİAN”a istinadən xəbər verir. Belə ki, “Maydan”ın Səhiyyə Xidmətinin rəhbəri Oleq Musiy “Ukrainskaya Pravda”ya müsahibəsində etirazçılar düşərgəsində ölənlərin sayının 20 nəfərə, yaralıların isə - 500-ə çatdığını bildirib. Ukrayna DİN-in rəsmi saytının məlumatına görə isə, qarşıdurma zamanı 7 milis əməkdaşı həlak olub.

Ukrayna Səhiyyə Nazirliyinin saytında isə bildirilir ki, kütləvi iğtişaşlar zamanı 11 nəfər ölüb.

Dünən Ukraynanın paytaxtı Kiyevdə etirazçılarla milis qüvvələri arasında baş vermiş toqquşmalar zamanı ölənlərin sayı 18-ə çatıb. APA-nın “UNİAN”a istinadən verdiyi xəbərə görə, ötən axşam “Maydan”da daha 5 mülki şəxs həlak olub. Bundan əvvəl toqquşmalar zamanı 7 mülki şəxsin öldürüldüyü bildirilmişdi. Ukrayna DİN-i iğtişaşlar zamanı 6 milis işçisinin həlak olduğunu açıqlayıb.

Qeyd edək ki, Ukrayna Səhiyyə Nazirliyinin saytında bildirilir ki, kütləvi iğtişaşlar zamanı 11 nəfər ölüb.

“Fevralın 18-i saat 23.00-a (Bakı vaxti ilə) olan operativ məluma əsasən, saat 12.20-dən kütləvi aksiyaların 221 iştirakçısı tibbi yardım almaq üçün səhiyyə müəssisələrinə müraciət edib. Onlardan 114 nəfər xəstəxanalara yerləşdirilib. 11 ölüm hadisəsi qeydə alınıb”, deyə məlumatda bildirilir.

Məlumata görə, “Maydan”a hücumda Donetsk vilayətindən cəlb olunmuş “Berkut” xüsusi təyinatlı polis dəstəsi iştirak edib.

Həkimlərin sözlərinə görə, ağır yaralılar “Maydan”dan “təcili yardım” maşınları ilə aparılır, qalan xəsarət alanlara isə hadisə yerində tibbi yardım göstərilir.

Kiyevin Müstəqillik Meydanında etirazçılara qarşı həmləyə keçən xüsusi təyinatlılar Müstəqillik Stelasını mühasirəyə alıblar.

APA-nın “UNİAN”a istinadən verdiyi xəbərə görə, beləliklə, milis qüvvələri Müstəqillik Meydanının daha geniş ərazisini öz nəzarəti altına ala biliblər.

Belə ki, səhər saat 04.00 radələrində xüsusi təyinatlılar etirazçılara qarşı yenidən işıq-səs qumbaralarından istifadə edib. Aksiyanı yatırmaq üçün su şırnaqlarından da istifadə olunur.

“Azadlıq” partiyasının nümayəndəsi Aleksandr Aronetsin məlumatına görə, xüsusi təyinatlılar hətta “Qlobus”un damından da etirazçılara hücuma keçib.

Məlumata görə, Müstəqillik Stelasının yaxınlığında quraşdırılmış bir neçə çadıra od vurulub. Həmçinin Yeni İl yolkası ətrafında quraşdırılmış çadırlar da yanır. Konservatoriyanın binasında da yanğının başladığı bildirilir.

Etirazçılar, buna cavab olaraq, avtomobil şinlərini yandırır, milis əməkdaşlarına daş və “Molotov kokteyli” atırlar. Maydanda quraşdırılmış səhnədə “Azadlıq” hərəkatının lideri Oleq Tyaqnibok etirazçılara çağırışlar edir.

Qeyd edək ki, bu arada yol polisi paytaxtın mərkəzinə doğru hərəkət edən avtomobillər saxlanılaraq yoxlanılır. Məlumata görə, hətta “taksi”lər də ciddi yoxlanışa məruz qalır.

Ukrayna qan gölünə döndü: 27 ölü - Video + Fotolar

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə