Qarşıdan yeni tədris ili gəlir. Paytaxtda fəaliyyət göstərən ali məktəblərin əksəriyyətinin yataqxanalarında qaçqın və məcburi köçkünlər məskunlaşdığından, tələbələr adəti üzrə kirayə evlərə üz tuturlar. Bu səbəbdən də Bakının kirayə ev bazarında bir canlanma müşahidə olunur. 

Tələbat olduğundan kirayə evlərin qiymətlərində cüzi də olsa artım hiss olunur. Mütəxəssislərsə hesab edirlər ki, bu artım süni addımdır və müəyyən dövrdən sonra qiymət keçənilki kimi olacaq. 

"Neftçilər" metrostansiyasının yaxınlığında fəaliyyət göstərən kirayə ev bazarında insan əlindən iynə atsan, yerə düşməz. Kişili-qadınlı, makler və ya ev sahibləri burada kirayəçi axtarırlar. Bazara girən kimi hamı qabağına qaçaraq, sənə şəhərin müxtəlif yerlərində, müxtəlif qiymətlərə evlər təklif edirlər. 

Ramin İsgəndərov bir neçə ildir ki, burada maklerlik edir. Dediyinə görə, qazancı pis olmur. "Aya 500-600 manat qazana bilirəm. Evlərimiz ancaq tələbələr üçün və ya Bakıya işləməyə gələnlər üçündür. Bazarda canlanma məktəblər açılana yaxın daha çox hiss olunur". 

Onun sözlərinə görə, bu il kirayə evlərin qiymətində o qədər də böyük artım müşahidə edilmir: "Qiymətlər keçənilki kimidir. Məsələn, "Qarayev", "Xalqlar dostluğu" metrosu ərazisində 150-300 manata ikiotaqlı evlər tapmaq mümkündür. Həyət evləri bina evlərinə nisbətən daha ucuzdur". 

Makler deyir ki, ev sahibləri çox zaman kirayənişin kimi tələbə qızlar axtarırlar. Bunu isə tələbə qızların evi səliqəli saxlamaları ilə əlaqələndirirlər. "Tələbə oğlanlar üçün ev tapmaq bir qədər qəliz məsələdir. Hər adam inanıb, evini tələbə oğlana vermir. Tələbə oğlanların Bakıda kirayə ev tapması üçün mütləq valideyni gəlib ev sahibi ilə danışmalıdır". 

Ev sahibi Səriyyə İmanovanın sözlərinə görə, evi hər yoldan keçənə kirayə vermək olmaz: "Keçən il evimi tələbə qızlara vermişdim, sevinirdim ki, təmiz saxlayarlar. Amma yanıldım. Bu qızlar evi bir günə qoymuşdular ki, gəl görəsən. Ondan sonra tələbə qıza anası gəlib tapşırmamış ev vermərəm. Qızlar burada başsız qalıb, istədiklərini edirlər. Əgər kirayə evə müxtəlif oğlanlar gəlirsə, içki məclisləri düzəlirsə, o evin adı qaraya çıxır. Ev sahibi belə ev üçün növbəti kirayənişini çətinliklə tapır. Buna görə də, evi düz-əməlli birinə vermək lazımdır". 

Gəncə şəhər sakini Nigar Kazımova da BDU-ya qəbul olan qızına kirayə ev tapmaq üçün bura üz tutub. Nisbətən ucuz ev axtaran N.Kazımovaya maklerdən biri Bakının qəsəbələrində ev təklif etsə də, o, buna razılaşmır. "Qız uşağıdır, uzaq yolu gedib-gəlməyi var". 

Masazırda fəaliyyət göstərən "ev alqı-satqı" ofisinin meneceri Eltun Əhmədovun sözlərinə görə, Mazasır və qonşu kəndlərdə hər cür evlər tapmaq mümkündür. "Amma bir məsələ var ki, bu ərazilərdə yollarda tıxac çox olur. Bu da tələbələr üçün sərfəli deyil. Bu ərazilərdə əsasən ailələr qalır. Tələbələr daha çox ali məktəblərin ətrafında olan evlərə üstünlük verdiyindən, bu ərazilərdə evlərin qiyməti stabil qalır". 

Daşınmaz əmlak üzrə ekpert Pərviz Həşimovun sözlərinə görə, bu il ölkədə evlərin satışında və ya kirayəsində qiymət artımı o qədər də çox olmayıb. "Bu il başlayandan böhran, devalvasiya evlərin qiymətlərinə təsir etdi. Amma bu təsir uzun davam etmədi. Ev bazarında müəyyən mənada ucuzlaşma hiss edilir. Kirayə evlərin qiymətlərində elə də böyük artım yoxdur. Bu artım çox cüzidir. O da tədris ilinin başlaması ilə əlaqədardır. Müəyyən dövrdən sonra yenidən qiymətlər əvvəlki vəziyyətinə qayıdacaq".

/Ekspress.az/