Daşınmaz əmlakların qeydiyyatı asanlaşdı

08:40 / 02.10.2015

Ramil Osmanlı: ««Qanunsuz» evlərin qeydiyyatını bu sistem vasitəsilə həyata keçirmək mümkün olmayacaq»

«Öncə normativ hüquqi aktlara bir sıra dəyişikliklər edilməlidir, sonra kompleks islahatlar aparılmalıdır»

Daşınmaz əmlakların və torpaqların qeydiyyatında "bir pəncərə" prinsipinin tətbiqinə başlanılıb. Bunu Əmlak Məsələləri üzrə Dövlət Komitəsinin İctimaiyyətlə əlaqələr şöbəsinin rəhbəri Qulu Xəlilov bildirib.

Q.Xəlilov qeyd edib ki, artıq bələdiyyələr, vətəndaşlar, fiziki və hüquqi şəxslər onlara məxsus daşınmaz əmlakı və torpaq sahələrini yalnız bir ünvanda - komitənin Daşınmaz Əmlakın Dövlət Reyestri Xidmətinin ərazi idarələrində qeydiyyata aldıra biləcəklər. Bununla da, torpaqların ilkin qeydiyyatı zamanı bir neçə ünvana müraciət etmək, uzun vaxt sərf etmək zərurəti aradan qalxıb. "Bir pəncərə" prinsipinin tətbiqi ilə bütün sənədləşdirmə prosesi, kadastr məsələləri, çöl-ölçmə işləri, texniki inventarlaşdırma, elektron və faktiki məlumatların dəqiqləşdirilməsi, torpaqların təyinatından irəli gələn tələblərə riayət olunması ilə bağlı məsələlər bir ünvanda həll olunur.

"Bu isə daşınmaz əmlakın qeydiyyatında şəffaflıq, operativlik və rahatlığın əhəmiyyətli dərəcədə artmasına, qeydiyyatın sürətlənməsinə şərait yaradıb. Vahid mərkəzdən idarəçilik sisteminin tətbiqi ilk növbədə əmlak münasibətlərinin inkişafının sürətləndirilməsini və mülkiyyət məsələlərində vətəndaş amilinin gücləndirilməsini təmin etməkdədir.

Vətəndaş komitənin Daşınmaz Əmlakın Dövlət Reyestri Xidmətinin ərazi idarəsinə müraciət etdikdən sonra əvvəlki prosedura əsasən tələb olunan əlavə heç bir sənədləşdirmə işi ilə məşğul olmur və buna vaxt sərf etmir. Yalnız müəyyən olunmuş vaxtda ərazi idarəsinə gələrək dövlət reyestrindən çıxarışını götürür. Daşınmaz Əmlakın Dövlət Reyestri Xidməti isə vətəndaşın iştirakı olmadan elektron qaydada fəaliyyətini komitənin Daşınmaz Əmlakın Kadastrı və Ünvan Reyestri Xidməti ilə əlaqələndirməklə sənədləşdirmə işini həyata keçirir. Torpaq sahələrinin plan və ölçüsünün tərtibi, texniki inventarlaşdırma və digər texniki sənədlərin hazırlanması təmin olunur. Daşınmaz Əmlakın Kadastrı və Ünvan Reyestri Xidməti kadastr işlərinin əlaqələndirilməsini və bu sahədə işlərin qaydalara uyğun aparılmasına nəzarəti, zəruri xəritə materiallarının hazırlanmasını təmin edir", - deyə Q.Xəlilov açıqlayıb.

Komitənin sözçüsünə görə, əsassız olaraq bələdiyyələrə, fiziki və hüquqi şəxslərə verilmiş, habelə mühafizə zolaqlarında inşa edilmiş daşınmaz əmlakın qeydiyyatına yol verilməməsini nəzarətdə saxlayır: "Bununla bağlı mütəmadi araşdırmalar aparır və nəticələrə əsasən müvafiq tədbirlər görür. Torpaqlardan istifadə və onların mühafizəsi sahəsində inzibati xətalara yol verilməsi halları aşkar edildikdə zəruri məlumatları Torpaqların Dövlət İdarəetməsinin Təşkili üzrə Dövlət Agentliyinə təqdim edir.

Komitənin yeni Əsasnaməsinə uyğun olaraq Torpaqların Dövlət İdarəetməsinin Təşkili üzrə Dövlət Agentliyinin bir sıra vəzifələri müəyyən olunub. Agentlik dövlət torpaqlarının icarəyə və istifadəyə verilməsinə dair rəyin verilməsini, torpaqların kateqoriyalara aid edilməsi barədə tədbirləri Daşınmaz Əmlakın Kadastrı və Ünvan Reyestri Xidməti ilə əlaqələndirməklə həyata keçirir".

Yeni qaydalar daşınmaz əmlakların qeydiyyatında hansı problemlərin aradan qaldıracağına gəlincə, "Əmlak Bazarı İştirakçıları" İctimai Birliyinin rəhbəri Ramil Osmanlı"Bizim Yol"a şərhində bildirdi ki, indiyədək əsas çətinliklərdən biri müraciətlərin bir neçə istiqamətdə aparılması idi: "Müraciətlərə baxan strukturlar isə ayrı-ayrı qurumlardan ibarət idi. Məsələn, torpaqla, kadastrla bağlı

əməliyyatlara Dövlət Xəritəçəkmə və Torpaq Komitəsi, qeydiyyatla isə Daşınmaz Əmlak Məsələləri üzrə Dövlət Komitəsi məşğul olurdu. Habelə, indiyədək fərdi yaşayış evlərinin qeydiyyatında ikili münasibət var idi. Belə ki, torpaq Komitəyə tabe idi, əmlaka isə Dövlət Reyestr Xidməti baxırdı. Hər iki qurum indi ləğv olunub, səlahiyyətlərin bir hissəsi əmlak komitəsinə həvalə edilib.

Bələdiyyələr, vətəndaşlar, hüquqi və fiziki şəxslər bundan sonra daşınmaz əmlakların qeydiyyatını yalnız Dövlət Komitəsi vasitəsilə həyata keçirə biləcəklər. Artıq bir neçə struktura müraciət etməyə ehtiyac qalmayacaq. Vətəndaşlar artıq "bir pəncərə" sisteminə uyğun olaraq, daşınmaz əmlaklarına dair bütün məsələləri bir qurum vasitəsilə həll edəcək".

"Bəs yalnız bələdiyyə sənədi olan yüz minlərlə daşınmaz əmlaklar var. Onlara "qanunsuz evlər" deyə sənəd verilmir. "Bir pəncərə" sistemi ilə bu tip daşınmaz əmlakların qeydiyyata alınması mümkün olacaqmı" sualına ekspert belə cavab verdi: "Təəssüf ki, "qanunsuz" evlərin qeydiyyatını bu sistem vasitəsilə həyata keçirmək mümkün olmayacaq. Bir müddət əvvəl Prezidentin fərmanı ilə ilkin qeydiyyatla bağlı sənədlərə bir neçə əlavələr edildi. Həmin əlavələr edilərkən bir çoxları düşündü ki, burada söhbət "qanunsuz" tikililərin sənədləşdirilməsindən gedir. Əslində isə belə deyildi. Burada yeganə istisna ondan ibarət idi ki, bələdiyyə sənədləri həmin ilkin qeydiyyat sənədlərinə aid olunmurdu. Burada 2004-cü ildə "Dövlət reyestri haqqında" qanun qəbul olunana qədərki müddəti əhatə edən sənədlərdən söhbət gedirdi".

Yeri gəlmişkən, hazırda ən böyük problemlərdən biri pay torpaqlarının sənədləşdirilməsidir. Kolxoz və sovxoz dağıldıqdan sonra onların ərazilərinin pay torpaqları kimi vətəndaşlara paylandıqdan sonra əmlakların təyinatı dəyişdi. Ondan sonra insanlar buradakı daşınmaz əmlaklarına da sənəd ala bilmədilər.

R.Osmanlı bildirdi ki, pay torpaqlarının təyinatını dəyişmək qanuna ziddir: "Onlar kənd təsərrüfatı təyinatlı torpaqlardır. Qanunla onlara yaşayış məqsədli əmlak tikmək qadağandır. Burada yalnız kənd təsərrüfatı məqsədli saxlanma anbarlar tikmək olar. Təəssüf ki, Abşeron ərazisində pay torpaqları hissə-hissə bölünərək, təyinatından kənar qanunsuz satılıb, ev tikilib. Belə evlərin də qeydiyyatı artıq problemə çevrilib".

Ekspertin fikrincə, "qanunsuz" evlərin sənədləşdirilməsi probleminin həlli üçün ayrıca dövlət proqramı qəbul olunmalıdır: "Həmin əmlakların qeydiyyatı aparılmalıdır. Müəyyən olunmalıdır ki, onların hansı hissəsi sökülməlidir. Məsələn, mədən ərazilərində, yüksək gərginlikli dəmiryolu, magistral xətlərinin və sair bu kimi mühafizə zolağına düşən əmlaklar müəyyən edilməlidir. Yerdə qalan əmlakların klasifikasiyası həyata keçirilməlidir. Bundan sonra onlarla bağlı Nazirlər Kabineti sərəncam verməlidir. Düşünmürəm ki, bunu şifahi göstərişlə həll etmək mümkün olacaq. Öncə normativ hüquqi aktlara bir sıra dəyişikliklər edilməlidir, sonra kompleks islahatlar aparılmalıdır".

Daşınmaz əmlakların qeydiyyatı asanlaşdı

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə