Musiqili Teatrda Əli Usubovun 80 illiyi qeyd olunub

15:51 / 06.10.2015

Azərbaycan Dövlət Musiqili Teatrında tanınmış teatr rejissoru, Əməkdar incəsənət xadimi Əli Usubovun 80 illik yubileyi qeyd olunub. Teatrın Mətbuat xidmətinin rəhbəri Samir Sədaqətoğlu bildirib ki, tədbirdə Mədəniyyət və Turizm Nazirliyinin İncəsənət şöbəsinin müdiri İsmayıl Hüseynov çıxış edib. İ. Hüseynov çıxışında Əli Usubovun həyat və yaradıcılığından bəhs edərək onun fəaliyyətinin Mədəniyyət və Turizm Nazirliyi tərəfindən daima yüksək qiymətləndirildiyini bildirib. Tədbirin sonunda yubliley münasibətilə Əli Usubovun quruluş verdiyi böyük bəstəkar, SSRİ Xalq artisti Rauf Hacıyevin bu yaxınlarda premyerası anşlaqla keçən “Qafqazlıı qardaşqızı” operettası nümayiş olunub.

Əli Teymur oğlu Usubov 1935-ci ildə Kirovabad (indiki Gəncə) şəhərində anadan olub. 1961-65-ci illərdə Ü. Hacıbəyli adına Azərbaycan Dövlət Konservatoriyasının vokal fakültəsində, 1965-70-ci illərdə isə N.A. Rimski-Korsanov adına Leninqrad Dövlət Konservatoriyasında musiqili teatr rejissorluğu fakültəsində Rusyanın Xalq artisti, professor Roman Tixomirovun sinfində təhsil alıb. Təhsilini başa vurduqdan sonra Azərbaycan Dövlət Opera və Balet Teatrında quruluşçu-rejissor, baş rejissor, Respublika Sarayında baş rejissor, Azkonsertdə bədii rəhbər, Omsk Dövlət Musiqili Teatrında baş rejissor vəzifələrində çalışıb. O, müxtəlif illərdə F.M. Dostoyevski adına Omsk Dövlət Universitetində dosent, professor kimi fəaliyyət göstərib. Əli Usubov 50-yə yaxın opera və operettaya quruluş verib. C. Verdinin “Aida”, “Riqoletto”, “Traviata”, D. Puççininin “Toska”, S. Raxmaninovun “Aleko”, Q. Doniçettinin “Luçiya di Lmermur” operaları, O. Flestmanın “Köhnə ev”, İ. Ştrausun “Yarasa”, İ. Kalmanın “Silva”, F. Leqarın “Şən dul qadın” və başqa operettaları Əli Usubovun quruluşunda müxtəlif teatrların səhnələrini illərlə bəzəyib. Bir çox dövlət tədbirlərinə də quruluş verən Əli Usubovun hazırladığı opera və operettalar Moskva Böyük Teatrı ilə yanaşı, Ukrayna, Türkmənistan, Gürcüstan, Qazaxıstan, Tacikstan, Özbəkstan və digər MDB ölkələrinin teatrlarında uğurla nümayiş olunub. Dahi bəstəkarımız Üzeyir Hacıbəylinin “Arşın mal alan” operettasının ilk quruluşunun 100 iliyyi ilə əlaqədar TÜRKSOY-un sifarişi ilə bu əsərə rejissorluq edib. Ə. Usubovun quruluşunda “Arşın mal alan” beynəlxalq layihə çərçivəsində Paris, Strasburla yanaşı, bir sıra MDB dövlətlərinin şəhərlərində də nümayiş olunub.

Qeyd edək ki, beynəlxalq layihə kimi Musiqili Teatrın tarixinə yazılan “Qafqazlı qardaşqızı” tamaşasının quruluşçu-drijoru Əməkdar incəsənət xadimi Nazim Hacıəlibəyov, quruluşçu-rəssamı Moskvadan dəvət olunmuş Rusiya Rəssamlıq Akademiyasının həqiqi üzvü, professor Dmitri Çerbadji, quruluşçu-baletmestrləri Leyla və Zakir Ağayevlərdir. Tamaşada rolları Əməkdar artistlər Nərgiz Kərimova, Səidə Şərifəliyeva, Boris Qrafkin, Svetlana Bulax, aktyorlar Firuz Məmmədov, Mehriban Zalıyeva, Elçin İmanov, Marina Litvinenko, Yuliya Heydərova, Nicat Həbibov, Rauf Babayev, Emil Heydərov, Nadejda Povelitsina, Əliməmməd Novruzov ifa edirlər.

Musiqili Teatrda Əli Usubovun 80 illiyi qeyd olunub

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə