Jurnalistlər üçün növbəti ingilis dili kursları elan olundu

Vahid Mürsəliyev: “İstəyirik ki, ingilis dilini yüksək səviyyədə bilən jurnalistlərin sayı çox olsun”

Elnur Əliyev: “Londona göndərilən jurnalistlər konkret kriteriyalar əsasında seçilir”

“Keçən il 70-dən artıq jurnalist ingilis dili kurslarına qoşulub. Bir qisim jurnalist var ki, kursu başlanğıc səviyyədən başlayaraq davam etdirirlər. Bu deməyə imkan verir ki, onlar kursun əhəmiyyətini başa düşürlər və dərslərdən faydalanmaq istəyirlər. Eyni zamanda, onlar keyfiyyətdən razıdırlar”. Bu fikirlər «Azercell» və «Kaspi» Təhsil Şirkətinin jurnalistlər üçün birgə təşkil etdiyi ingilis dili kursları ilə bağlı mətbuat konfransında səsləndi.
«Azercell Telekom» MMC-nin korporativ ünsiyyət şöbəsinin rəhbəri Nigar Şıxlinskaya «Azercell» in jurnalistlər üçün təşkil etdiyi ingilis dili kursunun şirkətin «İnkişafı paylaşaq» layihəsi çərçivəsində həyata keçirildiyini qeyd etdi: «Bu, ən sevilən və uğurlu layihələrdən biridir. Biz şadıq ki, siz bu kurslardan iştirak edir və bəhrələnirsiniz. Biz bütün jurnalistləri kurslardan faydalanmağa dəvət edirik».
«Azercell Telekom» MMC-nin prezidenti Vahid Mürsəliyev «Kaspi» Təhsil Şirkəti ilə əməkdaşlıqdan məmnun olduğunu söylədi. Belə ki, jurnalistlər bu kurs vasitəsilə öz ingilis dili biliklərini artırmaq imkanı qazanırlar: “Azercell” elm və təhsil, eyni zamanda media sahəsində bir sıra layihələrə imza atıb. Jurnalistlər üçün təşkil edilən ingilis dili kursları isə bu layihələr içərisində önəm daşıyır. Kurslarda mütəmadi iştirak edən və fərqlənən jurnalistlərdən iki nəfər seçilərək şirkətin dəstəyi ilə ingilis dili biliklərini artırmaq üçün iki həftəlik Londona göndərilir”. Keçən il kurslarda 70-dən artıq jurnalistin iştirak etdiyini deyən şirkət prezidenti bu işdə «Kaspi» Təhsil Şirkəti ilə yaxından əməkdaşlıq etdiyini və bundan sonra da əməkdaşlığın davam edəcəyinə ümidini ifadə etdi: “İnanırıq ki, bundan sonra da şirkətlə əməkdaşlığımız davam edəcək. Ümumiyyətlə, təkcə bu sahədə yox, təhsillə və digər sahələrlə bağlı əməkdaşlığımızı da davam etdirə və təhsil sisteminə öz töhfələrimizi verə bilərik». Şirkət prezidenti jurnalistlərə dəstək üçün digər layihələrin də həyata keçirildiyini bildirdi. Belə ki, jurnalistlər şəxsiyyət vəsiqələrinin surətini təqdim etməklə Mediacell tarifinə qoşula və öz həmkarları ilə dəqiqəsi 2 qəpiyə danışa bilərlər. Şirkət prezidenti jurnalistləri onların layihələrində yaxından iştirak etməyə səslədi: «Biz istəyirik ki, ingilis dilini yüksək səviyyədə bilən jurnalistlərin sayı çox olsun. Bu, beynəlxalq aləmlə daha yaxından tanışlıq üçün yaxşı imkandır». V.Mürsəliyev növbəti illərdə də bu layihənin davam edəcəyinə ümid etdiyini bildirdi.
«Kaspi» Təhsil Şirkətinin direktoru Elnur Əliyev 2010-cu ildən bəri davam edən layihənin uğurunu TŞ-nin öz vəzifələrinin öhdəsindən lazımınca gəlməsi ilə əlaqələndirdi: «Bu müddət ərzində hər il 60-dan çox jurnalist kurslara qatılmaq üçün müraciət edib. Sonuncu il 70-dən artıq jurnalist kurslara qoşulub”. Ölkədə ingilisdilli jurnalist heyətinin yaranmasında layihənin böyük rolu olduğunu qeyd edən TŞ direktoru «Azercell» şirkətinin və jurnalistlərin etibarını doğrultmağa çalışacaqlarını qeyd etdi: “Jurnalistlərin seçilib Londona göndərilməsi işin motivasiya tərəfidir. İngilis dilini təkmilləşdirməyin və onu real mühitdə tətbiq etməyin ən gözəl məqamlarından biri onu vətənində tətbiq etməkdir ki, bu şans da jurnalistlərə verilir. Londona göndərilən jurnalistlər konkret kriteriyalar əsasında seçilir. İmtahan, müsahibə, dərsə davamiyyət nəticələri və jurnalistlik fəaliyyəti əsas götürülür. Mümkün qədər ədalətli seçimə qərar verməyə çalışırıq».
Konfransda kursu uğurla bitirən jurnalistlərə sertifikatlar verildi. Daha fəal və nəticəsi yüksək olan iki jurnalist – “Palitra” qəzetinin redaktoru İlkin Ağayevə və ATV kanalının redaktoru Səma Əhmədovaya Londona iki həftəlik ingilis dili kursu hədiyyə olaraq təqdim olundu.
Konfransın sonunda “Azercell” şirkəti ilə “Kaspi” Təhsil Şirkəti tərəfindən jurnalistlər üçün növbəti ingilis dili kursları elan olundu. Jurnalistlər kurslarda iştirak üçün 8 oktyabr tarixindən 21 oktyabradək TŞ-nin Elmlər Akademiyası filialına müraciət edə bilərlər.

Təranə Məhərrəmova