Bu müsəlman geyimi hansı ölkələrdə yasaq olunub...

Seneqal müsəlman qadınlara üzü örtən burka tipli islami geyimlərdən istifadəni qadağan etmək barədə düşünür.

Ölkə rəsmiləri deyir ki, bu növ qeyim cihadçı hücumçulara partlayıcı qurğunu paltar altında gizlətməyə imkan verir.

Burkaya “yox” deyən başqa ölkələr də var.

Seneqalın daxili işlər naziri Abdoulaye Daouda insanı bütünlüklə örtən geyimi “Boko Haram” təhlükəsinə görə qadağan etmək istəyir.

“Boko Haram” Nigeriyada mənzillənən ekstremist qrup kimi tanınır.

Seneqal hökuməti bu mövzunun müzakirəsinin anti-İslam səciyyəsi daşımadığını qeyd etsə də fərdi və dini azadlıqlar zəminində qadınların qeyim haqqını müdafiə edənləri bu məsələ qəzəbləndirib.

Seneqal prezidenti Maki Sall hesab edir ki, burka Qərbi Afrikadakı tolerant müsəlmanların geyim mədəniyyətinə uyğun gəlmir

Bu məsələdə Seneqal tək deyil. Digər 4 Afrika ölkəsində də oxşar tədbirlər tətbiq olunub.

Mərkəzi Afrikanın 3 ölkəsində - Çad, Qabon və Konqo-Brazzavilldə burka qadağan olunub. Kamerunda bu geyim növü ölkənin uzaq şimalında ötən ilin iyul ayında yasaqlanıb.

Çad hökuməti iyun ayında Ncamena şəhərində 33 nəfərin ölümü ilə nəticələnmiş intiharçı hücumundan sonra bu tədbirə əl atıb.

Kamerunda burkaya qadağa "Boko Haram" qrupunun hücumlarından sonra tətbiq olunmağa başlayıb

Bundan sonra Konqo-Brazzaville və Qabonda oxşar addımlar atılıb. Qabon Kamerunda baş vermiş hücumdan sonra bu addımı atıb.

Həmin hadisə zamanı burkaya bürünmüş 2 intiharçı qadın özlərini Nigeriya sərhədində yerləşən Fotokol şəhərində partlatmışdılar. Partlayış nətuicəsində 13 nəfər həlak oilmuşdu.

Seneqalda belə hücumlar baş verməyib. Lakin 2 həftə bundan əvvəl ölkədə keçirilmiş antiterror həbsləri ilə bağlı rəsmilər əhalini ayıq-sayıq olmağa çağırıb.

“Burka qadağası” Afrika ilə məhdudlaşmır.

Saat əqrəbinə uyğun yuxarıdan sola: hicab, nikab, çadra və burka

2010-cu ildə Fransa ictimai yerlərdə örtüklü geyimi qadağan edən ilk Avropa ölkəsi oldu.

Fransa Senatının qərarı ilə insanın şəxsiyyətini müəyyən etməyə mane olan bütün örtüklü geyimlər, maskalar və baş örtükləri qadağan olundu.

Bu ölkədə 5 milyon müsəlman yaşayır. Lakin yalnız 2 minə yaxın qadın burkadan istifadə edir.

Fransanın anti-burka qanunvericiliyi qadınları örtüklü paltar geyməyə məcbur edənlərin 32 min dollaradək cərimə edilməsini və uzun müddətə həbs olunmalarını da nəzərdə tutur.

Bu qanun müsəlman qadınlarını hədəflədiyinə görə tənqid olunurdu.

Lakin Avropa İnsan Haqları Məhkəməsi 2014-cü ildə həmin qanunu dəstəklədi.

Parisdə polis tribunalı qarçşısında nikab qadağasını pozduqlarına görə duran iki qadın

Belçikada örtüklu geyim geymiş qadınlar burka yasağına etiraz bildirir

Belçika 2012-ci ildə “təhlükəsizlik səbəblərinə görə” oxşar addım atdı.

Niderlanda burka tipli geyim məktəblərdə 2007-ci ildə qadağan olunmuşdu. Sonradan həmin qadağa digər ictimai yerlərə və peşələrə də şamil edildi.

Qərbi Avropanın yalnız 3 ölkəsində “burka qadağası” bütün əraziyə şamil edilir, qalan ölkələrdə qadağalar bölgədən asılı olaraq tətbiq olunur.

İspaniyanın Barselona şəhərində sifəti örtən geyimlərə ictimai yerlərdə qadağa 2010-cu ildən qüvvədədir.

Danimarkada bu geyimdən məhkəmə otağında istifadə etmək qadağan olunub.

Həmin növ paltar Almaniyanın Essen torpağında və İtaliyanın bir neçə şəhərində də yasaqlanıb.

Italiyanın Varallo şəhəri. Qadağan olunmuş islam geyimlərinin siyahısı göstərilmiş plakat. Bədəni örtən burkini adlı çimərlikdə geyilən örtüklü paltar da qadağa siyahısındadır

Niderland hökuməti ötən ilin may ayında üzü örtən yaylıqlı paltarlara hospitallarda və nəqliyyatda qadan edənə qədər Haaqada qadınlar burkada gəzə bilirdilər

Bir sıra digər ölkələrdə isə əks-proses baş verib - üzü örtən geyimlərə qadağalar aradan qaldırılıb.

Türkiyədə 10 il qüvvədə olduqdan sonra bu qadağa 2013-cü ildə aradan qaldırıldı.

Məhkəmənin qərarı ilə sifəti açıq saxlayan baş örtüyü və hicabın geyilməsinə icazə verildi. Lakin üz də daxil olmaqla insanı tamamilə örtən geyimə icazə verilməyib.

Tənqidçilər hesab edir ki, burka tipli geyim qadınların peşəkar kimi inkişafına mənfi təsir göstərir

Suriyada da 2011-ci ildən müəllimələrə üzü örtən niqabların geyilməsinə icazə verilib. Bundan əvvəl həmin geyim universitetlərdə müsəlman tələbələrin radikallaşmasının qabağını almaq üçün qadağan olunmuşdu.

Tunisdə baş örtüklərinə qadağa 2011-ci ilin yanvarında aradan qaldırılmışdı (BBC).