Ermənistan: müxalifət referendumun nəticələrini "məhkəməyə götürür"

Ermənistanın sabiq prezidenti Levon Ter-Petrosyanın rəhbərlik etdiyi Erməni Milli Konqresi (EMK) dekabrın 6-da keçirilən konstitusiya referendumunun rəsmi yekun nəticələrini qəbul etmir və Konstitusiya Məhkəməsinə müraciət etmək niyyətindədir.

EMK bir sıra ictimai təşkilatlarla birlikdə referendumun gedişi və səslərin hesablanması zamanı “çoxsaylı pozuntulara yol verildiyinə görə” referendumun nəticələrini etibarsız tanımaq haqqında ərizələr Mərkəzi Seçki Komissiyası (MSK) tərəfindən rədd edildikdən sonra belə qərara gəlib.

MSK-nın rəsmi nəticələrinə görə, səsvermədə iştirak edən vətəndaşların 63 faizindən çoxu (təxminən 826 min nəfər) yeni Konstitusiya layihəsinin lehinə, təxminən 32 faizi əleyhinə səs verib.

Konstitusiya islahatı nəticəsində Ermənistanda parlament idarəetmə sisteminin tətbiq olunması nəzərdə tutulur. Müxalifət hesab edir ki, bu dəyişiklik 2018-ci ildə prezidentlik müddəti başa çatan Serj Sarkisyanın və onun rəhbərlik etdiyi “rejimin hakimiyyətdə qalmasını” təmin etmək üçün düşünülüb.

“Yekun nəticələrə təsir etməyib”

Image captionMüxalif parlament fraksiyasının rəhbəri Zurabyan referendumun rəsmi nəticələrini mübahisə etmək üçün Konstitusiya Məhkəməsinə müraciət ediləcəyini deyir.

Bu arada EMK nümayəndəsi Levon Zurabyan həmkarları ilə birlikdə bir neçə saat ərzində MSK nümayəndələrinə özləri qeyd etdiklərindən başqa, KİV və bir sıra müşahidəçi missiyalarından alınan məlumatları təqdim edirdi.

Levon Zurabyanın sözlərinə görə, konstitusiya dəyişikliyi lehinə səslər Ermənistanda olmayan vətəndaşların hesabına “süni olaraq səsvermə iştirakçılarının sayı artırılan” məntəqələrdə daha çox olub.

Bu, o deməkdir ki, həmin məntəqələrdə kütləvi şəkildə iç-içə bülletenlər atılıb, Zurabyan jurnalistlərə deyib. O, əslində referendumda iştirak edənlərin sayı MSK-nın göstərdiyindən “yarım milyon az” olduğunu bəyan edib.

“Bizim təhlillərimizə görə, referendumda 825 min adam (rəsmən 1,5 milyondan artıq göstərilir – red.) iştirak edib, onların 575 mini “yox”, 250 mini “hə” deyib”, - Levon Zurabyan bəyan edib.

Müxalifət iddialarının doğruluğunu sübut etmək üçün 5 təsadüfi seçki məntəqəsində 6 dekabr referendumunda iştirak edənlərin siyahılarının dərc olunmasını təklif edib.

“Hakimiyyət saxtakarları siyahıları dövlət sirri kimi qoruyurlar, çünki yaxşı bilirlər ki, siyahılar aşkar edilsə, onların erməni xalqının iradəsini başdan ayağa saxtalaşdırdığı aydın olar”, - EMK fraksiyasının rəhbəri Zurabyan deyib.

MSK sədri Tiqran Mukuçyanın sözlərinə görə, pozuntular və saxtakarlıq barədə bəyanatlar sadəcə EMK-nın təxəyyülünün məhsuludr, "qeyd olunan pozuntu halları isə referendumun ümumi nəticələrinə təsir edə bilməz dərəcədə az olub".

Konstitusiya Məhkəməsinə müraciət etmək üçün EMK fraksiyası Milli Məclis üzvlərinin azı 27 imzasını toplamalıdır və bunun üçün onun, qanuna əsasən, cəmisi 5 gün vaxtı var.

ABŞ səfirliyi narahatdır

Image captionABŞ-ın Ermənistandakı səfirliyi 6 dekabr referendumu zamanı pozuntuların ciddi araşdırılacağına ümid etdiyini bəyan edib (Şəkil - lragir.am)

ABŞ-ın Ermənistandakı səfirliyi 6 dekabr Konstitusiya əsnasında qeyd olunan pozuntulara dair bitərəf müşahidəçilər və Ermənistanın müxtəlif siyasi partiyalarından alınan məlumatlarla bağlı ciddi narahatlığını bildirib.

ABŞ səfirliyi qeyd edir ki, pozuntular üçün məsuliyyət daşıyan şəxslərin işləri üzrə istintaq və məhkəmə araşdırmaları “şəffaf və aşkar” aparılmalıdır ki, “Ermənistan vətəndaşları seçki proseslərinə etimad etsin”.

Səfirlik ABŞ-ın bütün dünyada korrupsiya ilə mübarizə apardığı halı xatırladaraq, bəyan edir ki, “referendum zamanı səsvermənin keçirilməsi prosesinə müdaxilə edən şəxslər haqqında məlumat ABŞ səfirliyi tərəfindən təşkil edilən proqram və tədbirlər iştirakçılarının siyahıları tərtib edilərkən istifadə oluna bilər”.

Bəzi yerli KİV-də ABŞ səfirliyinin bəyanatını Rusiyaya qarşı qəbul olunmuş “Maqnitski siyahısı” ilə müqayisə edərək, referendum zamanı pozuntulara görə məsuliyyətli şəxslərə qarşı müəyyən “sanksiyalar” tətbiq ediləcəyinə işarə kimi yozulur.//BBC