Xoşbəxtlikdən bu, açılan cinayətdir. Məsələ ondadır ki, son vaxtlar bağ evlərində törədilən cinayətlərin sayı artıb və təbii ki, onların heç də hamısı açılmır. Tezliklə yeni bağ mövsümünün başlayacağını nəzərə alsaq, bu cinayətlərin bir qədər də artacağı gözlənilir.
Ekspertlər bağ massivlərində kriminal hadisələrin artmasını bir neçə amillə izah edirlər. Onlardan ən əsası həmin massivlərin, necə deyərlər, gözdən-könüldən uzaq olması və paytaxtın mərkəzi əraziləri ilə müqayisədə nisbətən az nəzarətdə saxlanılmasıdır. Cinayətə meylli insanlar isə daha çox məhz nəzarətsiz və açılma ehtimalı az olan yerlərdə qarət və qətllərlə məşğul olurlar.
Elmi-Praktik Hüquq Mərkəzinin eksperti, sabiq polis rəisi Mahmud Hacıyevin virtualaz.org-a bildirdiyinə görə, oğurluq, quldurluq, tamah məqsədilə törədilən cinayətlər gizli şəraitdə baş verdiyindən bağlarda cinayət törətmək daha asandır: “Son 7-8 il ərzində Bakıda kameraların quraşdırılması təqdirəlayiqdir. Cinayətkarlığa qarşı mübarizədə profilaktik baxımdan kameralar müsbət rol oynadı. Artıq cinayətkar kamera qarşısında gizli cinayəti törədə bilmir. Kameralar həm də cinayətlərin açılmasında mühüm rol oynayır. Şəhər ətrafında kameraların quraşdırılmaması, polislərə az-az rast gəlinməsi, sahə məntəqələrinin olmaması, nəzarətsizlik, işsizlik və sair səbəblər, həmçinin də bəzən şəraitin özü oğurluq hadisələrinin baş verməsinə imkan yaradır”.
Sovet dövrünün sonlarında bağ massivlərində oğurluq hadisələrinin geniş yayıldığını deyən mütəxəssis xatırladır ki, bunun qarşısını almaq üçün o vaxt Post Patrul Xidməti (PPX) rotalarından xüsusi taqımlar ayrılmış və onlar növbəti 5-10 il ərzində cinayətlərin qarşısının alınmasında, eləcə də cinayətkarların tutulmasında mühüm rol oynamışdılar.
Həmin vaxtlarda bağ evlərində cinayətlərin azaldığını deyən M. Hacıyevin sözlərinə görə, o təcrübədən indi də istifadə etmək olar: “Əvvəllər Bakıda yalnız Nəsimi Yasamal, Nərimanov, Sabunçu və Əzizbəyov (indiki Xəzər-red.) rayonlarında polis bölmələri var idi. İndi bütün rayonların hərəsinin 4-5 polis bölməsi var, ayrıca sahə inspektorları var. Yəni nəzarət xeyli gücləndirilib. Elə bağlar var ki, imkanlı adamların bağlarıdır, kameralar var, bəziləri üşün xüsusi mühafizəçilər tutulub. Amma elə adamlar da var ki, illərlə bağ evlərinə getmirlər. Belə adamlar özləri cinayətlər üçün şərait yaradırlar.
Daxili İşlər Nazirliyinin rəhbərliyi səviyyəsində, yəqin ki, bu cinayətlərin qarşısının alınması üçün iş gedir və tədbirlər planı hazırlanır.
Əslində Bakıda bağ massivləri olan rayonlar azdır - Xəzər, Binəqədi, Sabunçu və s. Bu rayonlarda PPX alaylarından bir dəstə, taqım ayırıb bağları nəzarət altında saxlamaq olar”.
Son vaxtlar törədilən cinayətlərin xarakterindəki ağırlaşmaya gəlincə isə, ekspert hesab edir ki, bu, insanların psixi durumlarının eyni səviyyədə olmaması ilə bağlıdır: “Ümumiyyətlə, qətl özü ağır cinayətdir. Amma bütün qəsdən adam öldürmələr xüsusi amansızlıqla baş vermir. Əgər xüsusi amansızlıqla qətl hadisəsi törədilibsə, bu zaman həmin insanın psixi durumu araşdırılır. Psixi durumu normal olmayan insan qətl törədə bilər”.
Strategiya.az
