Bakılı transseksual: Gözəl qızlar görəndə onlar kimi olmaq istəyirdim – FOTO

08:12 / 19.03.2014

“Sevdiyim şəxs var və 6 ildir ki, bir yerdəyik”.

Strategiya.az xəbər verir ki, Ailem.az saytı Bakıda Samira adlı transseksualın bir bloqqerə verdiyi müsahibəni təqdim edib.

Samira “İnstagram” sosial şəbəkəsində xeyli məşhurdur. Bu şəbəkədə çox saylı izləyiciləri var.

Özünü Samira Euphoria kimi təqdim edən gənc deyir ki, anatomik ve psixi cəhətdən cinslər fərqli olanda ona transseksual deyilir.

“Homoseksuallar isə geylər və lesbianlar olur. Homoseksual oriyentasiyadır. Transseksual isə başqa bir şeydir. Transseksualın da fərqli oriyentasiyası olur. Biri var sən oğlansan və sənin xoşuna oğlan gəlir. Biri də var ki, oğlansan, amma psixi olaraq sən qızsan. Bunlar tam ayrı ayrı şeylərdir”, - deyə, o bildirib.

İnsanların özünə qarşı münasibətindən danışan Samira deyir ki, sosial şəbəkələrdə neqativ reaksiyalarla çox rastlaşır.

“Çox adam kompüter və telefon arxasında cürətlidir. Misalçün, axırıncı dəfə klubda olmuşam, daha sonra toya getmişəm, demək olar ki, hamı yaxınlaşırdı yanıma. Çoxu da deyirdi ki, mən sizin fanatınızam. Bəziləri də deyirdi ki, mən sizi çox bəyənirəm. Yəni fikir verirdim ki, mənə yaxınlaşmaq, hətta toxunmaq belə istəyirdilər”.

Onun sözlərinə görə, 12 yaşında olanda hiss edib ki, artıq oğlan kimi deyil:

“İlk dəfə bir oğlandan xoşum gəlmişdi. Digər transseksuallar kimi düşündüm ki, mən geyəm. Fərqim bilinirdi. Çünki oğlan bədənində qız qəlbi gizlənirdi. Mənim danışığımdan, yerişimdən bilinirdi ki, mən psixi olaraq oğlan deyiləm. Yavaş-yavaş hiss edirdim ki, mən özümü belə xoşbəxt hiss etmirəm və nəsə dəyişiklik olmalıdır. Mən gözəl qızlar görəndə onlar kimi olmaq istəyirdim. Yavaş-yavaş başladım saçlarımı uzatmağa, makiyaj etməyə, geyimimi dəyişməyə. Daha sonra özümə bir qız adı seçdim və hormonal tabletkalar içməyə başladım”.

Samira etdiyini günah saymır:

“Onda Allah hermofrodit (iki cinsli adam) yaradırsa, onlar elə yaşamalıdır? Onlar da əsasən konkret bir cins seçirlər və əməliyyat yolu ilə bircinsli olurlar. Misalçün, İranda homoseksuallıq günahdır və bu günah üçün ölüm cəzası var. Amma transseksualların əməliyyatının pulunu dövlət ödəyir. Bu mövzuda çox danışmaq olar. Mən bu dünyaya gəlmişəm və bütün istəklərimi reallaşdırmalıyam. Mənim istəklərimdən və elədiklərimdən heç kimə zərər gəlmirsə, o zaman heç kim məni təqsirləndirə bilməz”.

Samiranın sözlərinə görə, sevdiyi şəxs var və 6 ildir ki, bir yerdədirlər:

“Biz adi, sadə bir ailə kimi yaşayırıq. Bizim qeyri-rəsmi, vətandaş nikahımız var”.

Övlad sahibi olmağı istəməsi barədə sualı cavablandıran Samirə deyir ki, onda analıq hissləri də oyanır:

“Amma hələ düşünürəm ki, vaxtı deyil. Çünki əməliyyatlar, mənzil problemləri var. Uşaqla kirayədə qalmaq çox çətindir. Bunun üçün ilk növbədə evə ehtiyac var”.

Valideynlərinin onun transseksual olmağına münasibəti barədə isə Samira bunları deyib:

“Bu sual mənə veriləndə həmişə qəribə oluram. Heç bir valideyn buna normal reaksiya verməz. Əsas odur ki, onlar indi məni başa düşürlər və aramızda münasibət normaldır”.

Bugünədək keçirdiyi əməliyyatlar haqqında isə Samira aşağıdakıları söyləyib:

“Əməliyyatlardan rinoplastika elətdirdim. Burnum sınmışdı, mütləq əməliyyat olunmalı idi. Hormonal döşüm bir ilə çıxdı. Döşlərimi böyütdürdüm, 3-cü ölçü elədim. Üst dodağımda 2,5, alt dodağımda isə 0,5 qr gel var”.

Bakılı transseksual: Gözəl qızlar görəndə onlar kimi olmaq istəyirdim – FOTO

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə