EgyptAir: Qəzalar tarixçəsi

11:57 / 21.05.2016

Aralıq dənizi üzərində MS804 reysinin yoxa çıxması Misirin EgyptAir hava şirkətinin və ümumilikdə Misir aviasiyasının və turizm sahəsinin uğursuzluqları silsiləsində növbəti hadisə olub.

Parisdən Qahirəyə uçan təyyarənin göyərtəsində 66 sərnişin vardı. Onlardan 30-u Misir, 15 Fransa və biri Britaniya vətəndaşları idilər.

Bundan iki ay əvvəl Egyptair şirkətinin MS181 reysi ilə uçan başqa bir təyyarəsi üstündə partladıcı kəmər olduğunu iddia edən sərnişin tərəfindən girov götürülmüşdü.

Təyyarə sağ-salamat Kiprə enmiş və “terrorçunun” üstündəki partladıcının qondarma maket olduğu üzə çıxmışdı. Lakin bu insident də keçmiş reputasiyası onsuz da bir necə faciə ilə korlanmış aviaşirkətin üzərinə kölgə salmışdı.

1999-cu ildə Misirin MS990 nömrəli reyslə Qahirədən Nyu-Yorka uçan Boeing-767 təyyarəsi ikinci pilotun hərəkətləri ucbatından Atlantik okeanı üzərində qəzaya uğramışdı. İkinci pilot birinci pilotun kabinəni tərk etməsini gözləmiş, sonra isə təyyarənin hər iki mühərrikini söndürmüşdü. Təyyarədə olan 217 adamın hamısı həlak olmuşdu, lakin Misir hakimiyyət orqanları hadisənin ikinci pilota görə baş verdiyini danmışdı.

2002-ci ildə Egyptair şirkətinin 843 nömrəli reyslə uçan başqa bir Boeing təyyarəsi puis hava şəraitin nəticəsində Tunis paytaxtının hava limanı yaxınlığında qəzaya uğramışdı. Qəza nəticəsində 62 sərnişindən 14-ü həlak olmuşdu.

2009-cu ildə Avropa İttifaqının aviasiya rəsmiləri EgyptAir təyyarələri ilə yerinə yetirilən reyslərdə “sistematik təhlükəsizlik problemləri” ilə bağlı narahatlıqlarını ifadə etmişdilər. Onlar bildirmişdilər ki, şirkətin uçuşlarını diqqətlə izləyəcək və aviaparkın vəziyyəti barədə hesabat hazırlayacaqlar.

Amma bundan sonra Avropa İttifaqının müfəttişləri şirkətin təhlükəsizlik sahəsində vəziyyətin əhəmiyyətli yaxşılaşmasına nail olduğunu bildirmişdilər. Bununla belə onlar əlavə etmişdilər ki, aviaparkın saxlanması və ona xidmət sahəsində bir sıra problemlər həll edilməyib.

2011-ci ilin iyulunda Qahirə hava limanında Boeing-777 təyyarəsinin pilot kabinəsində baş vermiş yanğına görə bütün sərnişinlər evakuasiya edilmişdi. Sərnişinlərdən heç biri xəsarət almasa da, təyyarə tamamilə yanmışdı.

Ötən il də şirkət əməkdaşlarla menecment arasında baş vermiş münaqişə ucbatından ağır dövr yaşamalı olmuşdu. O vaxt Egyptair şirkətinin dörddə biri (850 nəfərdən 224-ü) maaşları artırılmazsa və iş şəraitləri yaxşılaşdırılmazsa işdən gedəcəkləri ilə hədələmişdilər.

Daha geniş kontekstdə MS804 təyyarəsinin qəzaya uğraması Sinay üzərində oktyabrda "törədilmiş terror aktından" zərər çəkmiş Misir turist sənayesi üçün növbəti ciddi zərbə olacaq. Ötən oktyabrda Şarm əş-Şeyx hava limanından qalxan Rusiya təyyarəsi havada partlamışdı.

Göyərtəsində 224 sərnişinin həlak olduğu təyyarədə törədilmiş partlayış üçün məsuliyyəti öz üzərinə özünü İslam Dövləti adlandıran qruplaşma görtürmüşdü.

Hazırda Rusiyanın hakimiyyət orqanları Misirlə onun turist sənayesinin əhəmiyyətli hissəsini təşkil edən turist əlaqələrini dayandırıb və öz vətəndaşlarına israrla tövsiyə edib ki, bu ölkəyə səfərlərdən çəkinsinlər.//bbc

EgyptAir: Qəzalar tarixçəsi

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə