Sarkisyan təsəlli verməyə çalışsa da, zaman Azərbaycanın xeyrinə işləyir (VİDEO)

Novruz Məmmədov: "İyunda konkret addımlar atmaq üçün görüş keçirilməlidir"

Vyana görüşünün nəticələri: Ermənistanın hələ bir müddət vaxtı var

 Mayın 16-da Vyanada ABŞ-ın dövlət katibi Con Kerri, Rusiya Federasiyasının xarici işlər naziri Sergey Lavrov, Fransa Respublikasının Avropa məsələləri üzrə dövlət katibi Harlem Desir, ATƏT-in Minsk qrupunun həmsədrləri, ATƏT-in hazırkı sədrinin xüsusi nümayəndəsinin iştirakı ilə Azərbaycan və Ermənistan prezidentlərinin görüşü keçirildi.

Strategiya.az Kəpəz TV-yə (Region TV) istinadən xəbər verir ki, bu görüş aprel ayının əvvəlində cəbhə xəttində baş vermiş döyüş əməliyyatlarından sonra Azərbaycanın əldə etdiyi hərbi və diplomatik üstünlük fonunda baş verirdi. Bu qələbə ölkəmizin münaqişənin həlli ilə bağlı mövqeyini gücləndirdi və problemin  beynəlxalq hüquq norma və prinsipləri çərçivəsində həlli üçün ciddi zəmin yaratdı.     “Zaman Azərbaycanın xeyrinə işləyir” ifadəsinin həqiqəti əks etdirdiyi aydınlaşdı. Beynəlxalq ictimai rəyin dəyişməsi, Ermənistanın özündə gedən iqtisadi tənəzzül prosesləri indi Azərbaycan üçün daha əlverişli strateji gələcək hazırlayır.

Azərbaycan Müdafiə Nazirliyinin məlumatına görə, ordumuz həmin döyüşlərdə 2000 ha ərazini işğaldan azad edib. Burada diqqət çəkən məqam beynəlxalq birliyin də bunu normal qəbul etməsi, Azərbaycanın bununla bağlı hüququnu tanımasıdır. Bunun özü də torpaqların işğaldan azad edilməsindən az əhəmiyyət daşımır. Düşmən bu nailiyyətlərimizi nə qədər kiçiltməyə çalışsa da fakt faktlığında qalır. Yeri gəlmişkən, hektar məsələsi barədə. 

Vyanadan geri qayıdarkən təyyarədə erməni jurnalistlərini başına yığan Serj Sarkisyan onlara bir daha təsəlli verməyə çalışdı:

 "Ermənistan Silahlı Qüvvələrinin təhlükəsizlik məqsədi ilə istifadə etdiyi 800 min hektar ərazinin 800 hektarını itirib. Nəyisə itirirsənsə, əvvəlcə anlamaq lazımdır ki, o hansı əhəmiyyətə malik olub. Bu, strateji, taktiki və bəzən psixoloji əhəmiyyət kəsb edə bilər". 

 Sarkisyan Vyanada Azərbaycan prezidenti İlham Əliyevlə keçirdiyi görüşün nəticəsindən razı qaldığını da deyib. Dolaşıq ifadələrlə, uzun-uzadı  söylədiyi erməni budaq cümləsinin məğzi isə əslində bu idi ki, döyüşü uduzsaq da bundan razıyıq. Yəni bundan da pis ola bilərdi... 

On ildən artıqdır Azərbaycan- Ermənistan Dağlıq Qarabağ münaqişəsi üzrə danışıqlarda ən fəal iştirakçılardan olan Prezident Administrasiyası rəhbərinin müavini Novruz Məmmədov deyir ki, bu illər ərzində dəfələrlə ermənilərin bu cür rəftarının şahidi olub.

Ermənistan 2014-cü ildə Paris danışıqlarından sonra da ATƏT-in Minsk qrupu çərçivəsində davam etdirilən sülh müzakirələrini pozaraq cəbhə xəttində təxribatlara əl atdı. Bu müddətək və ümumiyyətlə bütün proses boyu Ermənistan beynəlxalq müzakirələrin formal olduğunu nümayiş etdirirdi. Amma Azərbaycan ordusunun aprel qələbəsi həm Ermənistanı danışıqlar masası arxasına oturmağa məcbur etdi, həm də ATƏT-in Minsk qrupunu Ermənistanın konstruktiv danışıqlar məcrasına qayıtması üçün rəsmi Yerevana təzyiq göstərməyə vadar etdi. Administrasiya rəsmisi deyir ki, Vyana görüşü tərəflər arasında etimadın bərpasına yönəlmişdi. İndi tərəflər iyun ayında keçirilməsi planlaşdırılan növbəti görüşə hazırlaşırlar.

Novruz Məmmədov aprel–may aylarında intensivləşən danışıqlar prosesində xüsusilə Rusiyanın rolunu yüksək qiymətləndirdi. Yeri gəlmişkən prezidentlərin Vyana görüşünün yekunları barədə məlumat verən də Rusiya Xarici Siyasət İdarəsinin rəhbəri Sergey Lavrov oldu. Bir gün sonra isə Kremldə Prezident Vladimir Putinin iştirakı ilə Rusiya Təhlükəsizlik Şurasında Dağlıq Qarabağ məsələsi müzakirəyə çıxarıldı.

 Münaqişə barədə Amerika Birləşmiş Ştatlarının Dövlət Departamenti, Fransa Xarici İşlər Nazirliyi və ATƏT-in fəaliyyətdə olan sədri Frank-Valter Ştaynmayer də bəyanat verərək prezidentlərin görüşünü, əldə olunan nəticəni yüksək qiymətləndirdilər.

Belarus Prezidenti Aleksandr Lukaşenko da Dağlıq Qarabağ münaqişəsini MDB məkanında “əlac tapılması vacib olan xəstəliklərdən” hesab edir. 

Bu günlərdə isə ABŞ vitse-prezidenti Cozef Bayden Azərbaycan prezidenti İlham Əliyevə telefonla zəng edib. Söhbət zamanı Azərbaycan-ABŞ ikitərəfli münasibətlərinin uğurlu inkişaf dinamikası müzakirə olunub. ABŞ-ın vitse-prezidenti bu yaxınlarda Vyanada keçirilən görüşlərin Ermənistan- Azərbaycan, Dağlıq Qarabağ münaqişəsinin həlli işində əhəmiyyətini qeyd edib. Azərbaycan Prezidenti İlham Əliyev münaqişənin tezliklə beynəlxalq hüququn norma və prinsiplərinə uyğun şəkildə həllinin vacibliyini bildirib.

Ermənilər isə təxribatlarından əl çəkmirlər. İndi də guya Dağlıq Qarabağ ermənilərini danışıqlar masasına oturtmaq üçün kampaniya aparırlar. Politoloq Arzu Nağıyev deyir ki, Ermənistan rəhbərliyi bilir ki, bu səyləri əbəsdir sadəcə könül bulandırırlar.

Vyana görüşündən sonrakı mərhələ Ermənistana vaxt verilməsindən daha çox, Qarabağ münaqişəsinin tənzimlənməsi üzrə prosesə hazırlıq işləri ilə əlaqəlidir.  Hazırda həmsədrlər və sözügedən ölkələrin xarici işlər nazirləri yeni bir mətn üzərində işləyir, bəzi məqamlarla bağlı yaxınlaşdırmalar aparırlar ki, prezidentlərin məlum görüşündən müəyyən nəticələr əldə etsinlər.