Azərbaycan-Türkmənistan əlaqələrində yeni səhifə

22:25 / 20.06.2016

Türkmənistan Elmlər Akademiyasında keçirilən Elm Günündə ölkəmizi Azərbaycan Milli Elmlər Akademiyasının (AMEA) vitse-prezidenti, akademik İsa Həbibbəyli təmsil edib. Əvvəlcə Azərbaycandan əlavə dünyanın 14 ölkəsindən akademik qurumları və universitetləri təmsil edən nümayəndələr Türkmənistan Elmlər Akademiyasının Texnopark şəhərciyində ölkə elminin ən son nailiyyətlərini əks etdirən sərgi ilə tanış olublar.

AMEA-dan bildiriblər ki, Türkmənistan Elmlər Akademiyasının prezidenti, müxbir üzv Meret Aşırbayevin sədrliyi ilə “Elm, texnika və innovasiya texnologiyaları xoşbəxtlik və inkişaf dövründə” mövzusunda beynəlxalq elmi konfrans keçirilib. Konfransın plenar iclasında səkkiz ölkəni təmsil edən alimlərin məruzələri dinlənilib. Akademik İsa Həbibbəyli plenar iclasda “Azərbaycan-Türkmənistan ədəbi əlaqələri” mövzusunda elmi məruzə ilə çıxış edib.

Səfər çərçivəsində Türkmənistan Elmlər Akademiyası Əlyazmaları İnstitutunun akt zalında akademiyanın Humanitar Elmlər Bölməsinə aid elmi-tədqiqat institutlarının rəhbərləri və əməkdaşları ilə görüş keçirilib.

Görüşdə akademik İsa Həbibbəyli tərəfindən Nizami adına Ədəbiyyat İnstitutunun çap etdirdiyi, türkmən ədəbiyyatının böyük klassiki Məhdimqulu Fəraqinin “Divan”ının təqdimatı olub. Məhdimqulu Fəraqinin 1914-cü ildə Buxara şəhərində daş basması üsulu ilə nəşr olunmuş “Divan”ının nadir nüsxələrini Azərbaycan alimləri Bakıda Əlyazmalar İnstitutunun fondunda aşkara çıxarıblar. “Divan”da indiyədək M.Fəraqinin külliyyatına daxil edilməmiş naməlum şeirlər və parçalar vardır.”Divan”ın Bakı nəşrini AMEA-nın Ədəbiyyat İnstitutunun alimləri ilə Türkmənistan Elmlər Akademiyası Əlyazmalar İnstitutunun əməkdaşları birgə elmi əməkdaşlıq layihəsi kimi çapa hazırlayıblar. ”Divan”ın Bakı nəşrinə akademik İ.Həbibbəyli “Məhdimqulu Fəraqi və Azərbaycan ədəbiyyatı” sərlövhəli “Ön söz” yazıb. Bundan başqa, filologiya elmləri doktoru Paşa Kərimov və filologiya üzrə fəlsəfə doktoru İsmixan Osmanlının da Məhdimqulu Fəraqinin yaradıcılığına, əsərlərinin nüsxə fərqlərinə aid məqalələri Bakı nəşrində yer alıb. Bakı nəşrində “Divan”ın türkməncə nüsxəsinin faksimilesi və mətni, habelə Azərbaycan dilinə çevrilmiş tam mətn və izahlar oxuculara çatdırılıb. Bu, Fəraqinin əsərlərinin ilk akademik nəşridir.

Təqdimetmə mərasimində çıxış edən İ.Həbibbəyli görkəmli türkmən şairinin “Divan”ının Bakı nəşrinin ədəbi-tarixi əhəmiyyətindən danışıb. Alim bu müştərək nəşri çoxəsrlik ənənələrə malik olan Azərbaycan-Türkmənistan əlaqələrinin müstəqillik dövrü mərhələsinin əlamətdar hadisəsi adlandırıb.

Türkmənistan Elmlər Akademiyasının Əlyazmalar İnstitutunun direktoru Annaqurban Aşırov, Dil və Ədəbiyyat İnstitutunun direktoru, professor Qızılgül Kiyasova və başqaları Fəraqinin nadir “Divan”ının Bakı nəşrinin əhəmiyyətindən bəhs edib, əlaqələrin perspektivlərindən söz açıblar.

Görkəmli türkmən şairi M.Fəraqinin AMEA-nın Ədəbiyyat İnstitutu tərəfindən nəşr edilmiş nadir “Divan”ı Türkmənistan Elmlər Akademiyasının Mərkəzi Elmi Kitabxanasına təqdim olunub.

Azərbaycan-Türkmənistan əlaqələrində yeni səhifə

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə