Con Kerriyə görə Dağlıq Qarabağ münaqişəsi 60 il davam edə bilər - Elman Nəsirov

15:06 / 11.10.2016

"Bu gün Ermənistan beynəlxalq hüquqlara məhəl qoymur. Bu dövlət özünün təxribatçı əməllərindən əl çəkmir."

Strategiya.az bildirir ki, bunu SalamNews-a aşıqlamasında Milli Məclisin deputatı Elman Nəsirov deyib.

Deputat bildirib ki, Prezident İlham Əliyev onların indiki davranışının motivlərini açıqlayıb: "Ermənistan dövləti birindən pul, birindən silah alır, digəri isə onların işğalçı siyasətini dəstəkləyir. Belə olanda da işğalçılarda arxayınçılıq yaranır. Buna görə ermənilər təxribatçı əməllərini daha da artırır. Müdafiə Nazirliyinin sonuncu açıqlaması və aprel döyüşləri bir daha sübut etdi ki, Azərbaycan dövləti istənilən vaxt düşmənin təxribatçı hərəkətlərinə layiqli cavab verə bilmək gücünə sahibdir.

Ermənistan dövlətinin son addımları münaqişənin həlli istiqamətinə mənfi təsir göstərir. Bir tərəfdən də ABŞ-ın dövlət katibi Con Kerrinin sonuncu açıqlaması Ermənistanda siyasi və hərbi dairələri ruhlandırır. Bununla bağlı cənab prezidentimizin birmənalı mövqeyi oldu ki, biz belə qərəzli yanaşmaları qəbul etmirik. Yəqin ki, Con Kerrinin açıqlamalarına ən yüksək səviyyədə cavab veriləcək. Belə olmayan halda ATƏT-in Minsk Qrupunun fəaliyyəti sual altına düşəcək".

Deputat bildirib ki, Con Kerri münaqişə tərəflərinin liderlərinin danışıqlara hazır olmadığını qeyd etməsi, əslində, qərəzli və insafsız yanaşmadır: "Yəni işğalçı ilə işğala məruz qalan arasında bu qədərmi bərabərlik işarəsi qoymaq olar?! Biz torpaqlarımızın azad olunması istəyirik. Amma Ermənistan buna hazır deyil. 60 ildən çoxdur davam edən Fələstin-İsrail münaqişəsi ilə Dağlıq Qarabağ münaqişəsi paralel qeyd olunur. Con Kerrinin açıqlamasından belə çıxır ki, Dağlıq Qarabağ münaqişəsi 60 il davam edə bilər. Bundan əlavə ABŞ-ın dövlət katibi Fələstin-İsrail münaqişəsinin həllini Dağlıq Qarabağ münaqişəsinin həllindən daha real hesab edir. Bu, qorxulu tendensiyadır. Hesab edirəm ki, Ermənistanın sonuncu təxribatı bundan qaynaqlanır."

Elman Nəsirov onu da qeyd edib ki, Con Kerrinin bəyanatı Barak Obamanın bəyanatı ilə daban-dabana ziddir: "ABŞ və digər həmsədr dövlətlərin liderləri dəfələrlə qeyd edib ki, Dağlıq Qrabağ münaqişəsində status-kvo qəbul edilməzdir. Prezidenti bir yandan deyir qəbul edilməzdir, amma Con Kerri münaqişənin həll edilməməsinin məsuliyyətini liderlərin üzərinə atır. Əslində, Con Kerrinin açıqlaması status-kvonun qorunmasına və Ermənistan dövlətinin mövqeyinin möhkəmlənməsinə xidmət edir. Hesab edirəm ki, bu çox təhlükəli ssenaridir. Biz Ermənistanın son günlər atəşkəsi intensiv pozma səbəblərini araşdırsaq, görərik ki, bunun başında bu amillər dayanır. Buna baxmayaraq, Azərbaycan dövləti münaqişənin həlli üçün özünün sülh danışıqlarını davam etdirir. Amma cənab prezidentimiz dəfələrlə qeyd edib ki, Dağlıq Qrabağ münaqişəsinin hərbi yolla həll edilməsi imkanları özünü qoruyub saxlayır. Azərbaycan dövləti beynəlxalq hüquq normalarından çıxış edərək lazım gələrsə, münaqişəni hərb yolla da həll edə bilər".

Con Kerriyə görə Dağlıq Qarabağ münaqişəsi 60 il davam edə bilər - Elman Nəsirov

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə