Vüqar Rəhimzadə: “İqtisadi imkanların genişlənməsi güclü sosial siyasətlə tamamlanır”

Birinci rübün sosial-iqtisadi göstəriciləri ölkəmizin sürətli iqtisadi inkişafı barədə aydın təsəvvür yaradır

  «İki sahil» qəzetinin baş redaktoru, Əməkdar jurnalist Vüqar Rəhimzadə  «Milli.Az»ın sualını cavablandırdı

- Vüqar müəllim, Prezident İlham Əliyevin sədrliyi ilə Nazirlər Kabinetinin 2014-cü ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclası keçirilib. Ölkənin iqtisadi inkişafından söz açan Prezident İlham Əliyev bildirib ki, keçən il qeyri-neft sektorumuz 10 faiz, bu ilin birinci rübündə isə 8,8 faiz artıb. Əlbəttə ki, bu artım son illərdə Azərbaycanda aparılan islahatların nəticəsidir. Bu gün əhalinin gəlirləri inflyasiyanı 2 dəfədən çox üstələyir. Əhalinin banklarda  əmanətləri 20 faizdən çox artıb. Birinci rübdə orta aylıq əməkhaqqı təxminən 7 faiz artıb. Birinci rübün  sosial-iqtisadi göstəriciləri qarşıdakı dövrlə, ümumilikdə 2014-cü illə bağlı   hansı təsəvvürü yaradır?

- Dövlət başçısı İlham Əliyev daim çıxışlarında bildirir ki, əlamətdar günlərə həsr olunmuş tədbirlər, bu və ya digər sahənin inkişafına dair Dövlət Proqramlarının icrasına həsr olunan konfranslar, eyni zamanda ümumilikdə Nazirlər Kabinetinin müxtəlif dövrlər üçün ölkənin sosial-iqtisadi inkişafının yekunlarına və qarşıda duran vəzifələrə həsr olunmuş iclasları əldə olunan uğurların hesabatı, yeni-yeni vəzifələrin müəyyənləşdirilməsi baxımından hesabat xarakteri daşıyır.  Açıqlanan rəqəmlər ölkənin inkişaf səviyyəsi barədə aydın təsəvvür yaradır. Bu baxımdan dövlət başçısı İlham Əliyevin sədrliyi ilə  Nazirlər Kabinetinin 2014-cü ilin sosial-iqtisadi inkişafının yekunlarına və qarşıda duran vəzifələrə həsr olunmuş iclası da xüsusi əhəmiyyət kəsb edir. İlin ilk üç ayı üçün səsləndirilən rəqəmlər ümumilikdə 2014-cü ili necə başa vuracağımızı şərtləndirir.

   Hər bir inkişafın təməlində iqtisadi tərəqqinin dayandığını nəzərə alsaq,  cari ilin birinci rübünün nəticələri ürəkaçan və qürurvericidir. Möhtərəm Prezidentimiz İlham Əliyevin  hələ 2003-cü ildə qarşıya mühüm vəzifə kimi qoyduğu «İqtisadi artım qeyri-neft sektorunun da hesabına olmalıdır» tezisinin reallığa çevrildiyi bugünkü rəqəmlərdən də  aydın görünür. Qeyri-neft sektoru 8,8 faiz artıb. Ölkədə sahibkarlığın inkişafı, biznes mühitinin yaxşılaşdırıması üçün  biri-birindən əhəmiyyətli addımlar atılır. Azərbaycanın investisiya cəlbediciliyini qoruması da diqqətdədir.  Ölkəmiz  birbaşa xarici  sərmayələrin  qoyuluşuna görə  MDB məkanında  liderlik rolunu  saxlayır. Son on ildə ölkə iqtisadiyyatına qoyulan investisiyaların həcminin 160 milyard dollara çatması təbii ki, ölkəmizdə sabitliyin və əlverişli biznes mühinin  mövcudluğundan qaynaqlanır.  ÜDM-də özəl bölmənin payının artması da  dövlətimizin qeyri-neft sektorunun inkişafına göstərdiyi diqqətin bariz nümunəsidir.

   İqtisadi imkanların genişlənməsi güclü sosial siyasətlə tamamlanır.  Cari ilin ötən dövründə əhalinin pul gəlirləri  4,5 faiz, orta  əməkhaqqı  7 faiz artıb.  Bu gün ölkəmizdə  orta əməkhaqqı 430 manat, yəni 550 dollar səviyyəsindədir. Möhtərəm Prezidentimiz İlham Əliyev 2003-cü ildə keçirilən andiçmə mərasimində bildirmişdir ki, əməkhaqları, pensiyalar ildə ən azı iki dəfə artmalıdır. Bu qətiyyət təbii ki, ölkəmizin iqtisadi imkanlarına əsaslanır. Son on ilin uğurları fonunda deyə bilərik ki, hər bir vəd konkret əməli işdə öz təsdiqini tapıb.  İqtitsadiyyatın, qeyri-neft sektorunun inkişafı nəticəsində  orta əməkhaqqı və orta pensiya daha  da artır.

  Regional, eyni zamanda Bakı və Bakıətrafı qəsəbələrin inkişaf Proqramlarının   uğurlu icrası ölkənin hərtərəfli inkişafını daha da  sürətləndirir. Məlum olduğu kimi, qeyd olunan sahələr üzrə artıq iki Proqramın icrası başa çatıb. Cari ildə üçüncü  Dövlət Proqramları  qəbul olunub.  Regionların sosial-iqtisadi inkişafına dair üçüncü Dövlət Proqramı 2014-2018,  Bakı və Bakıətrafı qəsəbələrin sosial-iqtisadi inkişafına dair Dövlət Proqramı isə 2014-2016-cı illəri əhatə edir.  Bu əminlik ifadə olunur ki,  bu proqramlar da vaxtında  icra olunacaq və qarşıya qoyulan hədəflərə yüksək səviyyədə nail olacağıq.

  Atılan hər addıma diqqət yetirsək, bu reallıq öz təsdiqini tapır ki, dövlətin həyata keçirdiyi siyasətin əsasında vətəndaş amili dayanır. Dövlət başçısı İlham Əliyevin «İqtisadi göstəricilər təkcə rəqəmlərdə deyil, insanların gündəlik həyatında da öz əksini tapmalıdır» tezisi də bunun təsdiqidir. 

    Ümumiləşdirilmiş şəkildə qeyd etsək,  cari ilin ötən dövrünün sosial-iqtisadi göstəriciləri dövlət başçısı İlham Əliyevin  Nazirlər Kabinetinin 2013-cü ilin sosial-iqtisadi inkişafının yekunlarına və 2014-cü ildə qarşıda duran vəzifələrə həsr olunmuş iclasında böyük əminliklə söylədiyi « 2014-cü il də  ölkəmiz, xalqımız üçün uğurlu olacaqdır» fikrinin reallıq olacağına əsas verir. Bildiyiniz kimi, dövlət başçısı İlham Əliyevin sərəncamı ilə 2014-cü il «Sənaye ili» elan olunub. Bu il çərçivəsində görüləcək işlərin, həyata keçiriləcək tədbirlərin də miqyası genişdir. Yenə də qeyd etdiyimiz kimi, məqsəd ölkəni hərtərəfli inkişaf etdirmək, xalqın rifah halını daha da yaxşılaşdırmaq, Azərbaycanın iqtisadi və siyasi mövqeyini möhkəmləndirməkdir.