Türkiyənin Gəncədəki Baş konsulu rus səfirin öldürülməsindən danışdı - VİDEO

19:00 / 24.12.2016

“Rusiyanın Türkiyədəki səfiri Andrey Karlovun sui-qəsd nəticəsində öldürülməsi Türkiyənin siyasi və iqtisadi nüfuzuna zərbə vurmaqdır. Törədilən hadisə həm də yenicə yaxınlaşmağa doğru gedən Türkiyə-Rusiya münasibətlərini pozmaq, bölgədə sülhün və əminamanlığın təminatçısı kimi çıxış edən Türkiyəni və xalqını sarsıtmaq məqsədi daşıyır”. Ölkəsində diplomatın öldürülməsini terror adlandıran qardaş ölkənin Gəncədəki baş konsulu Orhan İşık son günlərin ən çox danışılan mövzusunu "ARB Kəpəz"ə şərh edib.

Türkiyə bu ölkəyə əmanət edilən, etimadnaməsini prezidentə təqdim edən bir diplomatın xain sui-qəsd nəticəsində bir türk polisi tərəfindən alçaq şəkildə qətlə yetirilməsindən üzülür. Rusiyanın Türkiyədəki səfiri Andrey Karlovun qətlinin araşdırılması, hadisə baş verən zaman onun cangüdənləri və digər güc strukturlarının cinayətkarın vaxtında zərərsizləşdirməməsi, polis işçisinin sərgiyə necə daxil olması üzərində araşdırmalar davam edir. Türkiyənin Gəncədəki baş konsulu Orhan İşık cinayətin törədilməsində nəzərlərin yönəldiyi nöqtənin ilkin ehtimallar olduğunu önə çəkir.

Orhan İşık- Türkiyənin Gəncədəki baş konsulu: “Hadisədən sonra aparılan araşdırmalar sui-qəsdçinin kimlərlə bağlantıları olduğunu ortaya qoyur. Cinayəti törədən şəxsin görüşləri, onun hazırlanması əlaqələri hadisənin arxasında FETO törror təşkilatının dayandığını deməyə əsas verir. Bunlar kukla terror təşkilatlarıdır, yəni bunlar başqalarından istifadə edərək müxtəlif maraqlarını həyata keçirir”.

Diplomat, səfirin öldürülməsini Suriya məsələsinin Moskvada Rusiya, Türkiyə və İran xarici İşlər Nazirlərinin görüşü ərəfəsində törədilməsini təsadüf saymır. Orhan İşık Andrey Karlovun qətlinin hər iki dövlətin yeni müstəviyə keçən münasibətlərinin pozulması üçün həyata keçirildiyini, lakin hər iki ölkə rəhbərinin bu çirkin oyunu yaxşı başa düşdüyünü söyləyib.

Orhan İşık- Türkiyənin Gəncədəki baş konsulu: “Hədəf Rusiya Türkiyə münasibətlərinin pozulması, Türkiyədə və bölgədə sülhə, eləcə də normal əlaqələrə kölgə salmaqdır. Suriyada və İraqda gedən prosesləri nəzərə alsaq, bu orada sülhə nail olmaq istəyən dövlətlərin iradəsinə qarşı atılan xain addımdır. Aradan zaman keçdikcə bu təxribatın iç üzü ortaya tam olaraq çıxacaq”.

2015-ci ildə Rusiyaya məxsus təyyarənin vurulması, Türkiyədə FETO terror təşkilatı üzvlərinin bu ilin iyulunda dövlət çevrilişinə cəhdi, İstanbulda və digər şəhərlərdə partladılan bombalar, polislərə qarşı törədilən terror aktları və səfir Karlovun sui-qəsd nəticəsində öldürülməsini konsul bir-biri ilə əlaqəli hesab edir. Diplomat, Türkiyə və onun müttəfiqlərinə qarşı atılan bu addımların arxasında hansı qüvvələrin dayandığını ortaya çıxarılaraq cəzalandırılacağını və bölgədə tezliklə sülhün əldə olunacağını sözlərinə əlavə edib.

Türkiyənin Gəncədəki Baş konsulu rus səfirin öldürülməsindən danışdı - VİDEO

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə