“AZƏRBAYCAN: GƏLƏCƏYƏ BAXIŞ” mövzusunda respublika konfransı - Fotolar

Azərbaycan Əmək və Sosial Münasibətlər Akademiyasında Ümummili lider Heydər Əliyevin  anadan olmasının  91 illiyinə həsr olunmuş “AZƏRBAYCAN: GƏLƏCƏYƏ BAXIŞ” mövzusunda ali təhsil müəssisələri tələbələrinin Respublika konfrans keçirilmişdir

Azərbaycan Əmək və Sosial Münasibətlər Akademiyasında (AƏSMA) ümummilli lider Heydər Əliyevin anadan olmasının 91 illiyinə həsr olunmuş “Azərbaycan: gələcəyə baxış” mövzusunda ali təhsil müəssisələri tələbələrinin Respublika konfrans keçirilmişdir. Plenar iclas akademiyanın böyük iclas zalında Azərbaycanda fəaliyyət göstərən digər ali təhsil müəssisələrindən gələn qonaqların, professor-müəllim heyətinin və tələbələrin  iştirakı ilə baş tutmuşdur. Konfransda respublikanın 9 ali təhsil müəssisəsindən 146 tələbə məruzə ilə çıxış etmişdir.

Tədbiri akademiyanın rektoru sosiologiya elmləri doktoru Hüseyn Qaraşov açaraq, xalqımızın ulu öndəri, ümummilli lider Heydər Əliyev şəxsiyyətinin Azərbaycan tarixində qoyduğu dərin izdən, vətənpərvərlik ideologiyasından və gənclərə qayğısından geniş söz açmışdır. O, müasir Azərbaycan gəncliyinin bu dəyərləri hər zaman öndə tutmalı olduğunu, vətənə, xalqa layiqli gənclər olaraq formalaşmalı olduğunu qeyd edərək, milli dəyərlərin qorunması sahəsində Heydər Əliyevin inkaredilməz xidmətləri olduğunu vurğulamışdır. H.Qaraşov Ulu öndərin “istənilən ölkənin gələcək inkişafı məhz onun gənclərindən asılıdır, bu baxımdan gənclərin inkişafı daim dövlətimizin qarşısında duran prioritet məsələlərdəndir” fikrini xatırladaraq, gələcək nəsillərin savadlı formalaşmasında, təhsilin rolunun danılmaz olduğunu söyləmişdir. O, həmçinin vurğulamışdır ki, bizlər də ulu öndərin ideologiyalarının daşıyıcıları kimi mütəmadi olaraq gənclərimizin təhsil səviyyəsinin yüksəldilməsinə çalışmalı və buna öz töhvəmizi verməliyik. 

O, eyni zamanda bildirdi ki,  “Sovet dönəmindən qalmış inzibati amirlik idarə üsulunun yeni sərbəst rəqabət münasibətləri ilə əvəzlənməsi sahəsində köklü dəyişikliklərin və bazar iqtisadi sistemini formalaşdırmaq istiqamətində məqsədyönlü siyasət aparılmasının əsası məhz Heydər Əliyevin rəhbərlik etdiyi illərdə qoyuldu. İlk növbədə, dövlət müstəqilliyimizin dayanıqlığına nail olmaq üçün ölkə daxilində siyasi sabitliyin bərqərar olması təmin edildi,  taleyüklü problemlərin həlli istiqamətində inamlı addımlar atmağa başladı və həyata keçirilən iqtisadi siyasət nəticəsində ölkənin enerji təhlükəsizliyi təmin edilərək, Azərbaycan dünyada enerji daşıyıcılarının etibarlı ixracatçısına və regionun ən mühüm tranzit mərkəzinə çevrildi.”

H.Qaraşov daha sonra ulu öndərin laiqli davamçısı Azərbaycan Respublikasının Prezdenti İlham Əliyev cənablarının düşünülmüş və məqsədyönlü, müasir meyarlara uyğun idarəçilik prinsiplərindən söz açdı. O, qeyd etdi ki, “Azərbaycan Respublikasının Prezidenti öz Sərəncamı ilə “Azərbaycan 2020: gələcəyə baxış” İnkişaf Konsepsiyasının hazırlanması barədə tapşırıq vermişdir. Belə bir konsepsiyanın hazırlanması zərurəti ölkəmizin yeni inkişaf mərhələsinə qədəm qoyması ilə bağlıdır. Təkcə onu demək kifayətdir ki, hazırda 60-a yaxın dövlət proqramı, strategiya və konsepsiya fəaliyyətdədir ki, bunlar da ölkəmizin ictimai həyatının bütün sahələrinin inkişaf etdirilməsində mühüm əhəmiyyətə malikdir.

Qazanılmış nailiyyətlər imkan verir ki, Azərbaycan öz qarşısına daha yüksək məqsədlər qoysun və bu məqsədlərdən irəli gələn vəzifələri müəyyənləşdirsin. Hal-hazırda qeyri-neft sektorunda yeni istehsal sahələrinin açılması və yeni iş yerlərinin yaradılması, o cümlədən yeni təhsil, səhiyyə, idman müəssisələrinin inşası, bütövlükdə ölkəmizin dinamik və dayanıqlı yüksəlişinin şahidiyik. Son illərdə Azərbaycan Cənubi Qafqaz üzrə yaradılan əlavə dəyərin 70 faizindən çox hissəsinə sahib olmaqla, regionun lider dövləti kimi mövqeyini gücləndirmişdir.

Xüsusən qeyd olunmalıdır ki, bu illərdə Azərbaycanda sosial problemlərin səmərəli həllində böyük irəliləyişə nail olunmuş, əhalinin sosial müdafiəsi sistemi qabaqcıl beynəlxalq standartlara uyğun yenidən qurulmuşdur. Təhsilin məzmunca yenilənməsi istiqamətində islahatlar aparılmış, Azərbaycan təhsilinin Avropa təhsil məkanına inteqrasiyası istiqamətində əhəmiyyətli addımlar atılmışdır. Bununla bərabər, “2007- 2015-ci illərdə Azərbaycan gənclərinin xarici ölkələrdə təhsil almalarına dair Dövlət Proqramı” çərçivəsində gənclərimiz xaricdə təhsil almağa göndərilmişdir. Bütün bunlar düşünülmüş və məqsədyönlü siyasətin ardıcıl həyata keçirilməsi nəticəsində mümkün olmuşdur”.

            Çıxışının sonunda H.Qaraşov xüsusilə vurğulamışdır ki, bu gün müstəqil Azərbaycanın daha da qüdrətlənməsinə çalışan  çox istedadlı və geniş dünya görüşünə malik gənclərimiz var. Mən inanıram ki, dünya arenasında ölkəmizin nüfuzunun günü-gündən artması üçün siz gənclər əlinizdən gələni əsirgəməyəcəksiniz.

Plenar iclasda növbəti məruzələr dinlənildi. Azərbaycan Əmək və Sosial Münasibətlər Akademiyasının “Ümumi humanitar və sosial fənlər” kafedrasının müdiri Rafiq Zeynalov “Azərbaycan: reallıq və ümidlər”, AƏSMA-nın III kurs tələbəsi Məmmədzadə Mahmud “Yüksək rəqabət qabiliyyətli iqtisadiyyata doğru inkişaf” AƏSMA-nın III kurs tələbəsi Camalzadə Nigar isə “İnsan kapitalının inkişafı və səmərəli sosial müdafiə sisteminin qurulması” adlı məruzəsini konfrans iştirakçılarına təqdim etdilər.

           Daha sonra konfrans öz işini ayrı-ayrı bölmələrdə davam etdirmişdir. Burada iştirak edən tələbələr iştirakçıların marağına səbəb olan müxtəlif məruzələrlə çıxış etmişlər. Ümummilli liderimizin ölkəmizin tərəqqisi uğrunda səmərəli fəaliyyətinə həsr edilmiş bir çox məruzə dinlənildikdən sonra, onlar H.Əliyev ideyalarının layiqli davamçıları olacağlarını bildirərək, onun bu fəaliyyətinin gənclər üçün vətənpərvərlik örnəyi olduğunu qeyd etdilər.

Konfransın sonunda isə rektor H.Qaraşov “XXI əsrin ilk onilliyində sürətlə inkişaf edən informasiya və kommunikasiya texnologiyaları və qloballaşma prosesləri ölkələrin sosial-iqtisadi həyatına ciddi şəkildə təsir etməkdədir. Hazırkı mərhələdə siz tələbələrin qarşısında duran əsas vəzifə, mövcud imkan və resursları nəzərə almaqla, ölkəmizin sürətli inkişafına nail olmaqdan ibarət olmalıdır.

Mən, ayrıca konfransda iştirak edən bütün ali təhsil müəssisələrinin nümayəndələrinə təşəkkür edir və tədbirin uğurlu təşkil edilməsinə zəhməti keçən təşkilatçıları təbrik edirəm.”

Konfrans müxtəlif bölmələr üzrə işini yekunlaşdıqdan sonra, dinlənilən məruzələr münsiflər heyəti tərəfindən qiymətləndirilərək, hər  üç bölmə üzrə ən yaxşı üç məruzəçi mükafatlandırıldı və diplomlarla təltif olundu.