"ANS ÇM radiosu erməni mahnıları ilə xalqımızı qıcıqlandırmağa son qoymalıdır" – Bəyanat

14:17 / 02.05.2014

Strategiya.az-a Beynəlxalq Münasibətlərin Araşdırılması Mərkəzinin sədri Rufiz Qonaqovun ANS ÇM radiosunun efirində erməni mahnılarının səsləndirilməsinə dair BƏYANATI daxil olub

Rufiz Qonaqov: "ANS ÇM radiosu erməni mahnıları ilə xalqımızı qıcıqlandırmağa son qoymalıdır".

Bir müddətdir ki, ANS ÇM radiosunun efirində hər şənbə günü erməni mahnıları səsləndirilir. "Qafqaz TOP-20" mahnı verilişində bir neçə dəfə - 06, 12, 19 və 26 aprel 2014-cü il tarixlərində erməni mahnıları efirə getmişdir. İctimaiyyətin buna etirazına baxmayaraq, ANS rəhbərliyi belə həssas bir məsələyə çox etinasız münasibət bildirmişdir. Layihə müəlliflərinin əsaslandırmasına görə, veriliş Qafqaz musiqiləri adını daşıdığına görə erməni musiqilərinin də burada yer alması təbiidir. Lakin hazırki şəraitdə Ermənistan-Azərbaycan Dağlıq Qarabağ münaqişəsinin davam etməsi, Ermənistan rəhbərliyinin sülh danışıqlarına pozucu fəaliyyətləri, təmas xəttində mütəmadi atəşkəsi pozması və mülki vətəndaşlarımıza, eləcə də, Milli Ordumuzun əsgər və zabitlərinə qarşı təxribatlar həyata keçirməsini nəzərə alaraq, ANS ÇM-in bu addımını qəbulolunmaz sayırıq.

Ermənilər xarici ölkələrdə belə bizim milli mədəniyyət nümunələrimizi, etnik yaradıcılıq xüsusiyyətlərimizi daşıyan maddi-mədəni abidələrimizi, musiqilərimizi, musiqi alətlərimizi və ümumilikdə musiqi mədəniyyətimizlə bağlı bir çox şeyi erməniləşdirməyə, başqa ölkələrdə öz adlarına çıxmağa çalışırlar. Düşmən ölkənin bu cür fəaliyyəti qarşısında Milli Qəhrəman və I Qarabağ müharibəsinin - erməni işağlı və erməni vəhşiliklərinin dünyaya çatdırılmasında əvəzsiz xidməti olan Çingiz Mustafayevin adını daşıyan ANS ÇM radiosunun bu cür hallara yol verməsi olduqca üzücüdür və buna öz təəssüfümüzü bildiririk.

Əlbəttə ki, ANS müstəqil teleradio şirkəti kimi öz fəaliyyətində qanun çərçivəsində azaddır. Lakin qanun və milli heysiyyatımız hər bir azərbaycanlıdan və onun rəhbərlik etdiyi qurumdan dövlətçiliyimizə, xalqımıza sədaqətli olmağı, dosta dost, düşmənə düşmən münasibət göstərməyi tələb edir. Mədəniyyətin və musiqinin milliyəti olmur, əlbəttə, bunlar ümumbəşəri dəyərlərdir. Lakin bu cür hərbi-siyasi vəziyyətdə erməni musiqisinin Azərbaycan efirində səsləndirilməsi məqsədli olub-olmamasından asılı olmayaraq, birbaşa erməni təbliğatıdır. ANS rəhbərliyinin nümayəndələri öz açıqlamalarında bildirirlər ki, burada narahat olası bir iş yoxdur, İrəvanda da Azərbaycan mahnıları səsləndirilir. Dərin təəssüflə ANS rəsmilərinə xatırlatmaq istəyirik ki, azərbaycanlılar işğalçı deyil və Ermənistanda Azərbaycan mahnılarının səsləndirilməsi də onlar üçün problem deyildir. Lakin ermənilər işğalçıdır və Azərbaycanda erməni mahnılarının səsləndirilməsi qəti şəkildə yolverilməz haldır. Bu fəaliyyətə davam etmək ANS rəhbərliyi tərəfindən çox kobud və böyük səhv olardı.

Eyni zamanda BMAM olaraq inanırıq ki, ANS rəhbərliyi bu məsələ ilə bağlı ictimaiyyətin münasibətini nəzərə alacaq, mövqeyini dəyişdirəcək. ANS ÇM radiosu erməni mahnıları ilə xalqımızı qıcıqlandırmağa son qoymalıdır.

"ANS ÇM radiosu erməni mahnıları ilə xalqımızı qıcıqlandırmağa son qoymalıdır" – Bəyanat

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə