Fransada Novruz bayramı

Azərbaycanın Fransa Respublikasında Səfirliyi, “Azərbaycanın Dostları Assosiasiyası” və Parisdəki “Azərbaycan Evi” ilə birlikdə Beynəlxalq Novruz Günü (Bahar bayramı) münasibəti ilə Fransanın Arkaşon şəhərində bir sıra tədbirlər düzənləmişdir.

İlk öncə Arkaşon şəhər bələdiyyəsində deputat-mer İv Fulon, Azərbaycanın Fransadakı səfiri Elçin Əmirbəyov, “Azərbaycanın Dostları Assosiasiyası”nın Prezidenti, deputat Jan-Fransua Mansel, Assosiasiyanın Baş Katibi, “Azərbaycan Mədəniyyət Evi”nin rəhbəri Mirvari Fətəliyeva arasında rəsmi görüş keçirilib. Daha sonra Toplantılar Sarayında “Azərbaycan - ənənələr və müasirlik ölkəsi” mövzusunda konfrans öz işinə başlayıb. Tədbirə qatılmış 300 nəfərdən çox iştirakçının Odlar Diyarı ilə yaxından və məmnunluqla tanış olması üçün Azərbaycanla bağlı qısa təqdimat olub.

Bunun ardınca səfir E. Əmirbəyov öz ölkəsinin tarixi, mədəniyyəti və ənənələri barədə konfrans iştirakçılarına daha ətraflı məlumat vermiş, Azərbaycan cəmiyyətində qadınların rolundan, ölkəmizin Cənubi Qafqazda liderlik rolundan, Fransa və Azərbaycan arasında mövcud olan yüksək səviyyəli münasibətlərdən danışıb. Tədbirin sonunda ölkəmizdə ictimai həyatla, təhsillə, təbii sərvətlərlə bağlı və eləcə də, Ermənistan tərəfindən Azərbaycan ərazilərinin 20%-nin işğal edilməsi və Minsk Qrupunun həmsədrlərindən biri kimi bu münaqişənin həllində Fransanın rolu ilə bağlı iştirakçıların sualları cavablandırılıb və bununla da konfrans öz işini yekunlaşdırıb.

Ölkəmizlə tanışlıq saat 16:30-da “Bakı Media Mərkəzi”nin istehsalı olan və Azərbaycan Demokratik Respublikasının 1919-cu ilin yanvarında Paris Sülh Konfransına göndərdiyi nümayəndə heyətinin mürəkkəb taleyindən bəhs edən “Ömürlük ezamiyyət” adlı sənədli filmin göstərilməsi ilə davam etdirildi.

Filmə baxışdan sonra Arkaşon şəhərinin meri, deputat İv Fulon Novruz bayramına və Azərbaycanla yaxından tanışlığa həsr edilmiş və martın 31-ə kimi davam edəcək foto və rəsm sərgisinin açılışını edib. Sərgidə nümayiş etdirilən foto və rəsm əsərlərinə baxışdan sonra tədbir Olimpiya Teatrında Azərbaycan nümayəndə heyətinin rəsmi qəbul mərasimi ilə davam etdirilib.

Səfir E. Əmirbəyov Meriya tərəfindən təşkil olunmuş qəbula görə “Azərbaycanın Dostları Assosiasiyası”na, “Azərbaycan Evi”nə və Arkaşon şəhər rəhbərliyinə minnətdarlığını bildirdi. O, çoxlu sayda insanın qarşısında Azərbaycanda və eləcə də bir sıra qonşu ölkələrdə qeyd olunan bahar bayramının ənənələrindən və əsrlərlə Azərbaycanda möhkəmlənmiş mültikulturalizm mühitindən və müxtəlif millətlərin mehriban birgəyaşayış təcrübəsindən danışdı.

Sonda “Azərbaycanın Dostları Assosiasiyası” adından çıxış edən cənab Jan-Fransua Mansel, ölkəmizin multikultural dəyərlərə sadiqliyini və xüsusən, azərbaycanlıların qonaqpərvərliyini təqdir etdiyini bildirərək tədbir iştirakçılarını Assosiasiyanın təşkil etdiyi səyahətlərdə iştirak etməyə dəvət etdi.

Arkaşon şəhərinin sakinləri və tədbirə qatılan qonaqlar yeni tanışlıqlarla zəngin olan bu günün sonunda Yusif Qasımovun bədii rəhbərliyi altında çalışan “Bakının ulduzları” rəqs ansamblının ifasında ənənəvi Azərbaycan rəqslərindən ibarət tamaşaya baxmaq imkanı qazandılar. Altı rəqqasın bir saat davam edən

möhtəşəm ritmli rəqslərindən sonra min nəfərdən çox tamaşaçı rəqs qrupunun ifasındakı peşəkarlığa, gözəlliyə və zərifliyə heyranlığını gurultulu alqışlarla ifadə etdilər.

Fransada “Azərbaycan Evi”nin rəhbəri,

“Azərbaycanın Dostları Assosiasiyası”nın Baş katibi

Mirvari FƏTƏLİYEVA