“Qarabağ”ın oyununda biabırçılıq, azarkeşin ayaqladığı polis– REPORTAJ+FOTOLAR

18:30-dur. “Gənclik” metrostansiyasından çıxıram. Amma demək olar ki, azarkeş gözə dəymir. Xarici klublarla oynayanda sifətinə “İnzaqi”, “Buffon”, “Zanetti” yazıb stadiona təşrif buyuran, oyundan əvvəl “Gənclik” metrosunun qarşısını cəhənnəmə döndərən azarkeşlərdən də səs-soraq yoxdur. Tək-tük azarkeşlər yaxınlıqdakı “butka”lara yaxınlaşıb tədarük görürlər. 

Amma deyəsən az da olsa maraq var oyuna...Hər halda gözlənilən qədər yox! 

Tofiq Bəhramov adına Respublika Stadionunun girişindəyəm. Oyuna giriş pulsuzdur deyə içəri daxil olmaq üçün bir neçə mərhələdən keçməyə də ehtiyac yoxdur. Bu arada bir məqam diqqətimi çəkir. Məsələn, Azərbaycan İspaniya ilə oynayanda stadionun girişində atlı-eşşəkli mühafizəçilərə qədər var idi. Hətta əlində bilet ola-ola içəri girmək belə mümkün deyildi. Maraqlıdır, “Qarabağ” “İnter” oyununu (4:1-İ.V) izləyənlər azarkeş deyillərmi? Onların təhlükəsizliyini qorumağa ehtiyac yoxdurmu? 

Çempionluğun taleyin həll olunan qarşılaşmada kimsə təxribat törədə bilməzdimi? Şəxsə bu mənzərəni görəndə sonra belə təəssürat yaranırdı ki, bu cür “təhlükəsizlik tədbirləri”nin qarşılığında istənilən partlayıcı maddəni tribunaya qədər gətirib çıxarmaq olar. 

Oyun başlayır. Azarkeşlər yerini rahatlamamış asayişi qorumalı olan polis çavuşları da oynamağa başlayırlar. Amma camaatın əsəbləriylə. Təsəvvür edin ki, küləkli havada stadiona gəlmisən, istirahət eləmək istəyirsən və bu məqamda 3 aylıq çavuş məktəbini bitirən birisi sənə “əə ordan durun keçin qapının arxasındakı tribunaya” deyir və cəmi 20-30 saniyə sonra daha sərt tonda “əə bə eşitmədiyiz, hi?” qışqıraraq əmr verir. Vəziyyəti təsəvvür edirsinizmi? Halbuki həmin tribunada bir neçə nəfər var ki, mundir sahibi onlara dəyib dolaşmağa cəsarət etmir. Yerimdən qalxıb bayaqdan camaata rahatlıq verməyən çavuşla həmsöhbət oluram.

Daha doğrusu, həmsöhbət olmağa məcbur oluram. Çünki indi mənimçün oyundan daha çox maraqlı olan bu gənc çavuşun “düşüncəsidir”. Məlum olur ki, 23 yaşı var, cəmi bir ildir polisdə işləyir və işlədiyi qurumun azsaylı rəhbər şəxslərini tanıyır. Bu məqamda bir neçə azarkeş polis əməkdaşının “qadağan elədiyi” sektora yaxınlaşır. Yaşı 50-55 arası olan azarkeşlər əllərindəki qəzeti oturacağın üzərinə sərməyə macal tapmamış həmsöhbət olduğum polis əməkdaşı daha sərt tonda onların digər sektora keçməsini tələb edir. 

Kişi həmin tribunada əyləşən “seçilmişlər”i göstərəndə mübahisə yaranır:

– “Əşşi niyə başa düşmürsən axı? Onlar AFFA-nın işçiləridir da bə. Sən də orda işləyirsənsə vəsiqəvi göstər keç otur. 

- Ay oğul, oyunun ləzzətini qaçırtma, burdan baxmaq rahatdır. Sən dediyin yer qapının arxasına düşür axı. 

-Dedim da, vəsiqən varsa, göstər keç otur. 

- Ay oğul, o uşaqlar var e, 5-6 yaşında, onlar da AFFA-nın işçiləridir? 

- Söz güləşdirmə, dedim ki, keç bu tərəfə”. 

“Qadağa zona”ya bir daha göz gəzdirirəm. Doğrudan da VİP lojada əyləşənlərin əksəriyyəti azyaşlı uşaqlardır. Digər sektorları da müşahidə edirəm. Orda da eyni durumdur. Oyun gedə-gedə polis əməkdaşları azarkeşləri burdan ora, ordan bura “qovmaqla” məşğuldurlar. Oyun sona yaxınlaşır və vurulan 5 qoldan cəmi ikisini görə bilmişəm. Çünki... Hər kəs tədricən tribunanın aşağısına doğru hərəkət edir. Final fitindən sonra nələrin baş verəcəyini təsəvvür etmək belə çətindir. 

Artıq iki saata yaxındır azarkeşlərin əsəbləriylə oynayan çavuşlar da aciz durumdadırlar. Əmrləri xahişlər əvəzləməyə başlayıb. Amma deyəsən bu da işə yaramayacaq. Final fiti çalınır...Bayaqdan həmsöhbət olduğum 23 yaşlı gənc çavuşu tribunadan stadiona axışan azarkeşlərin ayağının altında görmək heç xoş deyildi amma. 

P.S. Məncə “azarkeş stadiona gəlmir” deyən AFFA səlahiyyətlilərinə səbəblərdən biri bəlli oldu./AzNews.az/

İntiqam Valehoğlu