Onun bir arzusu var. Güclü və birinci olmaq...

Güc-qüvvət deyiləndə güclü cinsin nümayəndələri olan kişilər yadımıza düşür. Bu bizi Yaradanın pozulmaz nizamlarından biridir. Ancaq elə məqamlar olur ki, zərif və zəif bildiyimiz cinsin nümayəndələri arasında da güclüləri görəndə təəccübümüzü gizlədə bilmirik, həm də heyrətlənirik. Sonradan düşünəndə isə bizi heyrətə salacaq hər şeydə bir qanunauyğunluğun olmasının fərqinə varırıq. Bəzən düşüncəmizdən kənar baş verənlərə ad qoymaqda çətinlik çəkirik. Gözümüz önündə ağlının və biləyinin gücü ilə cinsindən asılı olmayaraq uğur qazananlara hər zaman əlçatmaz bir zirvə kimi baxırıq, onlara oxşamağa çalışırıq. Bəs onları çoxumuzdan fərqləndirən nədir? Bax elə bu sualın cavabını həmkarımızın ömür və uğur yolunu izlədikdən sonra tapa bildik. Zəhmət, fədakarlıq, güclü və birinci olmaq üçün hər çətinliyə qatlaşmaq istəyi...

İdman aləmi onu usta bir karateçi kimi tanıyır. Ölkə və beynəlxalq yarışlarda birincilik qazanıb, ən mötəbər kürsülərdən səsi gəlib. Daha doğrusu, onun şərəfinə himnimiz səsləndirilib, bayrağımız uçaldılıb. İdmanda qazandığı uğurları görən DİN rəhbərliyi daha bir arzusunu çin edib, ona polis leytenantı rütbəsi verməklə həmdə çiyinlərinə etibarı və etimadı doğrultmaq adlı böyük bir məsuliyyət qoyulub. Polis leytenantı Ədilə Qurbanova haqqında çox yazılıb, adı hər yerdə hörmətlə çəkilib. Onunla həmişə ünsiyyətdə olanda görmüşük ki, qazandığı uğurlarla qürrələnmir, öyünmür. O, sözünün də çəkisini bilən adamdır. Söz verdimi arxasında durmağı bacarır. Bu dəfə də verdiyi sözün arxasında durdu, əldə etdiyi uğurla bir daha təsdiq etdi ki, istənilən idman növündə gücünü sınayar, güclülər sırasında yer ala bilər.

O, sözünün üstündə durdu. Hətta hər kişinin cürət edib gücünü sınamaqda çətinlik çəkdiyi idman növündə birinci oldu. Onun qələbə xəbərini eşidəndə Sabunçu Rayon Polis İdarəsində hamı, hər kəs idarəyə yenicə təyin olunmuş bu idmançı qızın uğurlarından danışırdı. Bəli, sözün əsl mənasında, bunun adı heyrət idi...

Həmkarımızı təbrik edənlərin sırasında biz də vardıq. Ancaq duyğularımızı qələmə almaq üçün onunla mütləq görüşməliydik. Və görüşdük də...

Qarşımızda incə, gözəl bir xanım durmuşdu. Gözündən günəş yağırdı. Bu da mən, buyurun, suallarınızı cavablamdırmağa hazıram. Beləcə söhbətimizə illərin o üzündən körpü saldıq...

Karatedə qazandığı uğurları xatırladı. Dedi ki, həmişə ürəyində kişilərdən belə güclü olduğunu nümayiş etdirmək üçün arzusunu reallaşdırmaq üçün çox gözləyib və sonunda buna nail olub. Valideynləri narazılğını bildirsə də onu inadından döndərə bilməyiblər. İnadkarlığı gücünə-güc qatıb, zəhmət də ki, öz yerində.

Deyir ki, idmanın paurliftinq növü bütün dünyada məşhurdur. Azərbaycanda kifayət qədər güclü kişi idmançılarımız var. O güclülərin cərgəsinə qoşulmaq üçün illərlə yox, cəmi 4 ay məğul olub. Çəkisi 53 kiloqramdır. Azərbaycan çempionatında 4 rəqiblə üzbəüz gəlib. Yerdən təkanla qaldırmaqda 110 kiloqramın və 130 kiloqramın öhdəsindən gəlməklə çempion adını qazanıb. Bu təsnifat turniri onun oktyabr ayında Azərbaycanda keçiriləcək dünya çempionatında təmsil olunmasına həmdə hazırlıq xaraxteri daşıyırdı.

Sabunçu RPİ-nin kadr və peşə hazırlığı üzrə baş inspektoru kimi işi çox olsa da, o, tapşırılan hər bir işin öhdəsindən uğurla gəlir. Səbrlə, əzmlə sentyabrda Azərbaycan kuboku uğrunda yarışlara qatılmaq üçün gecəsini-gündüzünə qatır polis leytenantı Ədilə Qurbanova.

Uğurların davamlı olsun, həmkarımız. Sənə uğur yaraşır!

Könül Nəbizadə,

Sabunçu RPİ-nin əməkdaşı

Hafiz Təmirov,

DİN Mətbuat Xidmətinin əməkdaşı