"Dərman zəhərlənmələri zamanı..."

17:29 / 04.05.2017

Strategiya.az bildirir ki, müxtəlif səbəblərdən baş verən toksiki zəhərlənmələr həmişə narahatlıq doğuran məsələdir. İlin arxada qalan dörd ayında bu sahədə hansı hallar qeydə alındığını öyrənmək üçün AZƏRTAC-ın müxbiri Bakı şəhər Kliniki Tibbi Mərkəzin toksikologiya şöbəsinin baş həkimi Azər Maqsudovla görüşüb. Baş həkim deyib:

- Bu ilin dörd ayında ən çox dərman zəhərlənmələri ilə əlaqədar müraciətlər daxil olub və 221 müraciətdən 140 nəfəri stasionar müalicəyə qəbul olunub. Dəm qazı ilə əlaqədar 123 müraciətin 84-ü, allergik reaksiyalarla əlaqədar 112 müraciətdən 76-cı, məişət kimyəvi zəhərlənmələri ilə əlaqədar 83 müraciətdən 46-sı, sirkə turşusu zəhərlənmələri ilə əlaqədar 41 müraciətdən 34-ü stasionar müalicəyə qəbul olunub. İlan sancması ilə əlaqədar cəmi 1 xəstə qəbul etmişik və bir neçə günlük müalicədən sonra sağalaraq evə qayıdıb. Dörd ayda ümumən xəstəxanaya daxil olan 470 xəstə müraciətindən 380 nəfəri stasionar müalicəyə qəbul edilib və yalnız 4 xəstəni həyata qaytarmaq mümkün olmayıb.

- Toksiki zəhərlənmələrdə ilkin yardım kimi hansı üsullardan istifadə etmək olar?

- Dərman zəhərlənmələri zamanı mədəni su ilə yumaq və ya imalə etmək ən yaxşı çıxış yoludur. Sirkə turşusu ilə zəhərlənmələrdə isə bu üsul özünü doğrultmur və əksinə, daha da fəsadlaşmaya səbəb olur. Həkim gələnə qədər göstərilən ilkin yardımlardan biri də qara kömür həbi qəbul edilməsidir. Dəm qazı ilə zəhərlənmə isə bir qədər spesifik xarakter daşıyır. Əgər zəhərlənən huşunu itirməyibsə, onu təmiz havaya çıxarmaq, isti çay və ya qaynar su içirmək məsləhətdir. Huşu özündə olmayanda isə boğulmaması üçün ağız boşluğunu selikdən təmizləmək və açıq havaya çıxarıb həkimə çatdırmaq lazımdır.

- Yay mövsümü daha çox hansı müraciətlər olur?

- Yayda əsas müraciətlər əsasən göbələklə zəhərlənmələr və ilan sancması ilə əlaqədar olur. Əvvəla, zəhərli göbələklə sağlam göbələyi ayırd etmək çox çətindir. İkincisi, bir səbət sağlam göbələyin içərisində bir ədəd zəhərli göbələyin olmağı kifayətdir ki, bişərkən parçalanaraq yerdə qalanları da zəhərləsin. Göbələk zəhərlənməsi birinci iki gündə başağrısı, qarın nahiyəsində narahatlıq verir, sonrakı gündə ağrılar o qədər intensiv xarakter alır ki, bəzən həkim briqadası özünü çatdıranda iş-işdən keçmiş olur. İlan sancması zamanı isə ilkin yardım dərhal həmin nahiyəni sarımaq və onun üzərinə buz parçası qoymaqdan ibarətdir. Bütün hallarda xəstəni dərhal, mümkün qədər tez müalicəxanaya çatdırmaq lazımdır.

- Kadrların ixtisaslarını təkmilləşdirməsi, müasir texnologiya və müalicə üsullarından xəbərdar olması üçün hansı tədbirlər görülür?

- Toksikologiya şöbəsinin həkimləri vaxtaşırı olaraq müxtəlif ölkələrdə keçirilən konfrans, simpozium və treninqlərdə iştirak edirlər. Son vaxtlar onlar Almaniya, İngiltərə və Türkiyədə, eləcə də postsovet ölkələrində, o cümlədən Moskva, Sankt-Peterburq, Kiyev, Almatı şəhərlərində keçirilən tədbirlərdə olublar. 2 aparıcı həkim Almaniyada, 4 həkim isə Türkiyədə uzunmüddətli kurslarda iştirak ediblər. Sentyabrda daha iki həkim Türkiyədə keçirilən kursa göndəriləcəkdir.

"Dərman zəhərlənmələri zamanı..."

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə