SOCAR istiqrazları üzrə təkrar bazar əməliyyatlarının həcmi 100 milyon dolları keçib

SOCAR istiqrazları üzrə təkrar bazar əməliyyatlarının həcmi 100 milyon dolları ötüb.

“SOCAR Capital” şirkətindən bildirilib ki, Azərbaycanın qiymətli kağızlar bazarında tarixi hadisə baş verib. Ölkənin fond bazarında ən çox tələbat göstərilən qiymətli kağız olan SOCAR istiqrazları üzrə təkrar bazar əməliyyatlarının həcmi 100 milyon dolları keçib. Tarixi göstəriciyə səbəb olan əməliyyat avqustun 2-də reallaşıb. SOCAR istiqrazları üzrə əməliyyatların həcmi 100 milyon dolları ötüb.

Xatırladaq ki, SOCAR-ın daxili bazar üçün nəzərdə tutulan istiqrazları 2016-cı ilin sentyabr ayında 100 milyon dollarlıq həcmdə buraxılmışdı.

Başqa sözlə, buraxılmasından bir ildən də az vaxt keçməsinə baxmayaraq, Bakı Fond Birjasında (BFB) SOCAR istiqrazları üzrə alğı-satqı əməliyyatlarının həcmi istiqraz buraxılışının həcmini üstələyib. Bu BFB-nin fəaliyyət göstərdiyi dövrdə və ümumiyyətlə, Azərbaycanın fond bazarının tarixində ilk belə hadisədir.

SOCAR istiqrazları üzrə aktivlik hazırda da davam edir, istiqrazlara fiziki şəxslərlə yanaşı, hüquqi şəxslər tərəfindən də böyük maraq müşahidə olunur. Təkcə 2017-ci ilin ilk 6 ayı ərzində BFB-də bütün istiqrazlar üzrə təkrar bazar əməliyyatlarının 82 faizi SOCAR istiqrazlarının payına düşüb. Nəticədə, qarşıdakı dövrdə istiqrazlar üzrə əməliyyatların həcminin daha da artacağı gözlənilir.

SOCAR istiqrazlarına tələbatın belə böyük olmasının başlıca səbəbləri onun yüksək etibarlılığı və gəlirliliyi, bu istiqrazlar üçün SOCAR-ın geri alma zəmanəti (istiqrazların qiyməti heç vaxt 1000 (min) dollardan aşağı düşmür və onları istənilən vaxt dərhal nağd pula çevirmək mümkündür), eləcə də istiqrazlar üzrə öhdəliklərin qrafik üzrə yüksək intizamla yerinə yetirilməsidir.

SOCAR istiqrazları ölkənin ən böyük və etibarlı şirkəti olan SOCAR tərəfindən 100 milyon dollar həcmdə 5 illik müddətə, illik 5 faiz gəlirliliklə buraxılıb. Nominal qiyməti 1000 ABŞ dolları olan hər bir istiqrazın illik gəlirliliyi 50 dollar olmaqla, hazırda maliyyə sektorunda ən yüksək gəlir sayılır.

SOCAR istiqrazları üzrə faizlər əvvəlcədən açıqlanmış qrafik üzrə həyata keçirilir. İndiyədək istiqrazlar üzrə 3 dəfə (17 yanvar, 17 aprel və 17 iyul tarixlərində) faiz ödənişi olub və istiqraz sahibləri ümumilikdə 3,75 milyon dollar qazanc əldə ediblər. 2017-ci il ərzində növbəti faiz ödənişi oktyabrın 17-si tarixində baş tutacaq. Məhz bu göstəriciləri sayəsində SOCAR istiqrazları investorlar üçün olduqca əlverişli yatırım aləti sayılır. Onları bir neçə dəqiqəyə alıb-satmaq, hissə-hissə və ya bütünlüklə nağd pula çevirmək və ya yüksək qazanc götürmək mümkündür.

Təkrar bazarda SOCAR istiqrazlarını Azərbaycan vətəndaşları və şirkətləri ilə yanaşı, xarici fiziki və hüquqi şəxslər də ala bilərlər. Ötən müddət ərzində qiymətli kağızlara xarici investorlar tərəfindən də böyük maraq müşahidə olunub. Hazırda SOCAR istiqrazı almış xarici investorlar arasında Rusiya, Türkiyə, Ukrayna, Gürcüstan, Qazaxıstan və digər ölkələrin vətəndaşları var.

Bazarda SOCAR istiqrazlarına olan yüksək tələbatın qarşılanması üçün investorlar və bazar iştirakçıları tərəfindən SOCAR-a yeni istiqrazların və ya alətlərin buraxılması barədə müraciətlər daxil olmaqdadır. Hazırda bu müraciətlər və bazardakı vəziyyət araşdırılır.

SOCAR istiqrazlarını təkrar bazardan əldə etmək üçün 1 və 5 saylı “ASAN Xidmət” mərkəzlərinə və ya *19 99 qaynar xəttinə müraciət etmək lazımdır.