Azərbaycanın Avroatlantik məkana inteqrasiyası Avropa Şurası ilə əməkdaşlıq kontekstində

Müasir beynəlxalq münasibətlər sisteminin nüfuzlu aktoru, Cənubi Qafqaz regionunun isə lider dövləti olan Azərbaycan Avroatlantik məkanın başlıca təsisatları ilə özünün milli maraqları əsasında qarşılıqlı faydalı əməkdaşlıq münasibətlərinin inkişafına xüsusi əhəmiyyət verir. Avroatlantik strukturlarla əməkdaşlıq həm Azərbaycanın milli maraqlarına, həm də ölkəmizin beynəlxalq nüfuzunun artmasına xidmət edir. Bu əməkdaşlığı mümkün edən əhəmiyyətli faktorlardan biri isə ölkəmizin Qərbin müvafiq qurumlarında uğurla təmsil olunmasıdır.

Avropa Şurası ilə əməkdaşlıq əlaqələri müstəsna əhəmiyyət kəsb edir

Bu sırada Avropa Şurası ilə əməkdaşlıq əlaqələri müstəsna əhəmiyyət kəsb edir. Şübhəsiz, Avropa Şurası müstəqil daxili və xarici siyasət kursuna malik olan, demokratik təsisatların qanunlar çərçivəsində sərbəst fəaliyyət göstərdiyi, mütəmadi olaraq siyasi-hüquqi islahatların keçirildiyi bir dövlətlə - Azərbaycan Respublikası ilə əməkdaşlıq münasibətlərinin dərinləşdirilməsinə böyük önəm verir. Bu və ya digər formatda davam etdirilən əməkdaşlıq bu əlaqələrin inkişafında mühüm rol oynayır.

Azərbaycan Avropa Şurası Nazirlər Komitəsinə sədrliyi uğurla başa vurub

Məlum olduğu kimi, cari il mayın 6-da Avstriyanın paytaxtı Vyana şəhərində Avropa Şurası Nazirlər Komitəsinin 124-cü sessiyasında bu təşkilata sədrlik Azərbaycana keçmişdi. 14 may tarixindən başlayan sədrlik müddəti altı ay davam etdi. Bununla da, BMT Təhlükəsizlik Şurasına iki illik üzvlükdən sonra Azərbaycan diplomatiyasının tarixinə daha bir uğurlu səhifə yazıldı. Artıq Azərbaycan Avropa Şurası Nazirlər Komitəsinə sədrliyi uğurla başa vurub.

Azərbaycanın sədrlik müddətində əsas tutduğu prioritetlər bu dönəmin kifayət qədər səmərəli olmasını təmin edib. Çünki müəyyən olunmuş prioritetlər bütün dünya, o cümlədən ölkəmiz və sözügedən təşkilat üçün kifayət qədər aktual olub. Bu kontekstdə Azərbaycan Avropa Şurasının təməl prinsipləri olan insan hüquqlarına, qanunun aliliyinə və demokratiyaya güclü dəstək verib, Avropada təhlükəsizlik və sabitlik sahəsindəki mövcud problemlərə, korrupsiya ilə mübarizədə səmərəli əməkdaşlığa, cəmiyyətlərin həssas təbəqəsi olan qaçqınların və məcburi köçkünlərin hüquqlarının müdafiəsinə ciddi diqqət yetirib, mədəniyyətlərarası dialoqa böyük əhəmiyyət verərək Avropada diskriminasiya və dözümsüzlüklə mübarizəyə yardım edib, təhsilli və məsuliyyətli gənclər nəslinin tərbiyəsinə xüsusi əhəmiyyət verib, siyasi islahatların həyata keçirilməsi hədəfini yekdilliklə və güclü şəkildə dəstəkləyib. Avropa Şurasının yaradılmasının 65-ci ildönümünün qeyd edildiyi bir vaxtda bu təşkilatın Nazirlər Komitəsinə sədrliyi üzərinə götürən Azərbaycan müəyyənləşdirdiyi hədəflərə nail olub.

Tərəflər arasındakı münasibətlərin gələcək inkişafına dair optimist proqnozlar səsləndirilir

Ümumilikdə, bu kontekstdə Azərbaycan Respublikası ilə Avropa Şurası arasındakı münasibətlərin gələcək inkişafına dair optimist proqnozlar səsləndirmək mümkündür. Azərbaycanın sədrlik müddətini uğurla başa vurmasından sonrakı mərhələdə yeni əməkdaşlıq platformalarının müəyyənləşdiriləcəyi və münasibətlərin əhatə dairəsinin daha da genişlənəcəyi söylənilir. Bu zaman ölkəmizin demokratik dəyərlərə sadiq olması, insan və vətəndaş hüquq və azadlıqlarının təmin və mühafizə olunması ilə yanaşı, Azərbaycanla Avropa Şurasının ötən zaman müddətindəki əlaqələrinin uğurlu və səmərəli xronikası kimi amillər əsas götürülür. Məlumdur ki, ölkəmiz 13 il əvvəl - 25 yanvar 2001-ci il tarixində Avropa Şurasına tamhüquqlu üzv kimi qəbul edilib və qurum daxilində səmərəli ikitərəfli və çoxtərəfli münasibətlərə malikdir. Bəhs edilən quruma üzv qəbul edildikdən sonra Azərbaycanla Avropa Şurası arasında sıx əməkdaşlıq münasibətləri mövcuddur. İlk növbədə, insan hüquqları və demokratikləşmə sahəsində sıx əməkdaşlıq əlaqələri formalaşdırılıb. Mövcud münasibətlər isə ölkəmizdə hüquqi dövlət və vətəndaş cəmiyyətinin mütləq komponentlərinin bərqərar olunmasına, qanunvericilik bazasının zənginləşməsinə, ictimai-siyasi institutların fəaliyyət mexanizminin səmərəlilik səviyyəsinin artırılmasına fundamental töhfələr bəxş edib.

Nəticə etibarilə, Azərbaycanın Avropa Şurası Nazirlər Komitəsinə sədrliyi həm bəhs olunan təşkilat, həm də ölkəmiz üçün olduqca faydalı olub.