Strategiya.az -

20:38 / 20.10.2017

Dövlət İmtahan Mərkəzinin Direktorlar Şurasının sədri Məleykə Abbaszadə oktyabrın 20-də Şəmkir rayonundakı Heydər Əliyev Mərkəzində valideynlər və şagirdlərlə görüşüb.

Görüşdə ümumtəhsil məktəblərində şagirdlərin yekun qiymətləndirilməsi (buraxılış imtahanlarının) və ali təhsil müəssisələrinə qəbul imtahanlarının 2019-cu ildə tətbiqi nəzərdə tutulan modeli haqında məlumat verilib.

M.Abbaszadə bu məsələlərlə bağlı təqdimatla çıxış edib.

Qeyd olunub ki, bu tədris ilində ali məktəblərə qəbul qaydalarında dəyişiklər edilməsi nəzərdə tutulur və XI sinfi bitirənlərə qəbul imtahanlarında iki dəfə iştirak etmək imkanı veriləcək.

Ötən il bu yeniliyin yalnız bir qrup çərçivəsində tətbiq edildiyini bildirən M.Abbaszadə deyib: “Abituriyent qəbul imtahanının birinci mərhələsində hansı qrup üzrə iştirak etmişdisə, iyulda keçirilən ikinci mərhələdə də eyni qrupun imtahanında iştirak etməli idi. Gələn il isə hər abituriyent iki fərqli qrup üzrə də imtahan verə biləcək. Onlar istəsə, qəbul imtahanlarının hər iki mərhələsində eyni və ya fərqli qrupda imtahan verərək ali məktəblərə qəbul müsabiqəsində iştirak edə biləcəklər”, – deyə Dövlət İmtahan Mərkəzinin Direktorlar Şurasının sədri bildirib.

2019-cu ildə XI sinif şagirdlərinin buraxılış imtahanlarında tətbiq olunacaq yeniliklər barədə məlumat verən M.Abbaszadə deyib ki, şagirdlərə açıq tipli suallar, mətn üzərində iş, riyaziyyatdan situasiyaya aid məsələlər və fənlər üzrə müvafiq tapşırıqlar təqdim ediləcək. İmtahanın nəticəsi qiymətləndirilən zaman hər bir fəndən 100 bal toplamaq mümkün olacaq. Burada toplanan maksimum 300 bal ilkin nəticə kimi sonradan ali məktəblərə qəbul imtahanı müsabiqəsində nəzərə alınacaq.

Diqqətə çatdırılıb ki, yeni imtahan modelində hansı növ tapşırıqların olacağı, qiymətləndirilmənin necə keçiriləcəyi ilə bağlı cəmiyyətdə müəyyən narahatlıq var. Bu məsələyə aydınlıq gətirən Şura sədri qeyd edib ki, bu il həm XI, həm də X siniflər üçün sınaq imtahanları keçiriləcək: “Hər il XI sinif üçün sınaq imtahanı keçiriləndə onların 30 faizini X sinif şagirdləri təşkil edirdi və onlar bir il əvvəldən öz biliklərini sınayırdılar. Bu il isə X sinif şagirdləri üçün ayrıca sınaq imtahanı keçiriləcək. Sınaq imtahanı zamanı X sinif proqramı çərçivəsində yeni növ tapşırıqların olması nəzərdə tutulur. Bununla da onlar təxminən gələcək imtahanın formatı, tapşırıqların forması ilə tanış olacaqlar”.

Görüş zamanı M.Abbaszadə buraxılış imtahanlarının mahiyyəti, strukturu və yeni qəbul qaydaları ilə bağlı müəllimlərin, valideynlərin və şagirdlərin suallarını cavablandırıb.

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə