Bakı-Tbilisi-Qars dəmir yolunun açılış mərasimi keçirilib - VİDEO

21:47 / 30.10.2017

Azərbaycan bu gün həm öz tarixində, həm də regionun tarixində önəmli bir gün yaşadı.

Şərq-Qərb nəqliyyat dəhlizini dəmiryolu ilə birləşdirən Bakı-Tbilisi-Qars dəmiryolu xətti təntənəli mərasimlə istifadəyə verildi. Bu strateji dəmir yolu layihəsi Azərbaycanla yanaşı, qonşu Türkiyə, Gürcüstan, eləcə də Orta Asiya ölkələrinin gələcəyində önəmli rol oynadığı üçün açılış mərasiminə bu ölkələrin dövlət və hökumət başçıları da qatıldılar. Mərasimi giriş nitqi ilə açan prezident İlham Əliyev Bakı-Tbilisi-Qars dəmir yolu xəttinin region ölkələrini bir-birinə daha sıx bağlayacağını, Avropa-Asiya ölkələri arasında əlaqələri möhkəmləndirəcəyini vurğuladı.

Dövlət başçısı uzunluğu təxminən 850 km olan dəmir yolu xəttinin böyük hissəsinin Azərbaycan ərazisinə düşdüyünü, buna baxmayaraq, ölkəmizin bu məsuliyyətli vəzifənin öhdəsindən layiqincə gələrək bütün infrastrukturun ən müasir standartlar səviyyəsində inşasını başa çatdırdığını bildirdi.

Prezident İlham Əliyev eləcə də Azərbaycanın Bakı-Tbilisi-Qars dəmir yolu xəttini inşa edərkən heç bir kredit almadığını və nəhəng layihənin dövlətin öz daxili imkanları hesabına tikilməsinin önəmini vurğuladı. Dövlət başçısı bir sıra ölkələrin bu dəmir yolu xəttinə böyük maraq göstərdiyini də diqqətə çatdırdı.

Prezident İlham Əliyev tarixi İpək yolunun yenidən fəaliyyətə başlaması və onun ticari-iqtisadi imkanlarının genişləndirilməsində Azərbaycanın önəmli rol oynadığına diqqət çəkdi. Dövlət başçısı Bakı-Tbilisi-Qars dəmir yolu xəttini istifadətə verməklə Azərbaycanın nəqliyyat dəhlizlərini genişləndirmək sahəsindəki işlərinin bitmədiyini və qarşıda yeni layihələrin olduğunu bəyan etdi.

Türkiyə prezidenti Rəcəb Tayyib Ərdoğan isə Bakı-Tbilisi-Qars dəmir yolunun təkcə regionun deyil, böyük İpək yolu üzərində yerləşən bütün ölkələrin tarixində önəmli rol oynacağına diqqət çəkdi.

Açılış mərasimində çıxış edən Gürcüstanın baş naziri Giorgi Kvirikaşvili, Qazaxıstanın baş naziri Bakıtjan Saqintayev və Özbəkistanın baş naziri Abdulla Aripov da yeni dəmir yolu xəttinin tarixi önəmini vurğuladılar.

Çıxışlardan sonra dövlət və hökumət başçıları Bakı-Tbilisi-Qars dəmir yolu xəttinin çivlərini vurdular və yoldəyişən qurğunu işə saldılar. Bununla da Bakı-Tbilisi-Qars dəmir yolu xətti ilə hərəkət edən ilk yük qatarı yola salındı.

Onu da qeyd edək ki, Bakı-Tbilisi-Qars dəmir yolu Mərkəzi Asiya ölkələrinin - Türkmənistan, Qazaxıstan, Özbəkistan, Qırğızıstan və Tacikistan, həmçinin Əfqanıstanın Avropa və dünya bazarlarına çıxışını asanlaşdıracaq. Gələcəkdə Avropa və Asiya ölkələrinə məxsus yüklərin bu dəmir yoluna cəlb edilməsi hər iki istiqamətdə multimodal daşımaların həcmini artıracaq.

Bakı-Tbilisi-Qars dəmir yolunun açılış mərasimi keçirilib - VİDEO

Oxşar xəbərlər

Xəbərlər

Ədəbiyyat

© 2012 | Bütün hüquqları qorunur.

Əlaqə